حرب التغيير على فيس بوك..الشباب يريد زوجة صينية والبنات تتحداه بالزوج الصيني

الشباب يريد زوجة صينية والبنات تتحداه بالزوج الصيني!!
محيط – محمد يونس
العروسة الصيني
حرب تغيير جديدة ولكن طريفة ظهرت منذ سنوات عبر وسائل الاعلام المختلفة عن عروض الزوجة الصينية فائقة القدرات كثيرة الامكانيات وقليلة التكاليف حسبما يتخيل الكثير من الشباب والرجال المصريين .
وبالفعل نالت الفكرة الاعجاب الشديد من باب التغيير لما يلمسوه من واقع مع الزوجة المصرية بالاضافة للمزايا التي سيحصلون عليها مع الزوجة الصينية ، وتساءل الكثيرون لما لا؟ وتعبر فكرة الزوجة الصينية حاجز المزاح و الفكاهة الى حيز الجد و الاستيراد بالفعل !!
و بالطبع كان لمستخدمي "فيس بوك " رد الفعل المتباين بين المرح و الجدية و التفكير و التخيل في العروسة الصينية ، ولكن بطبيعتها لم تقف البنت المصرية صامتة امام تلك الافكار وتهميش الشباب لها وتفضيلهم للصيني على بنت بلدهم حتى لو من باب التغيير !!
وطالعتنا جروبات بنات مصريات بفكرة "الزوج الصيني" والذي سيدخل على خط المنافسة مع المصري ردا على افكار الزوجة الصينية موضحين الكثير من مزاياه وانه محطم للاسعار ايضا بتكلفة اقل من الزوجة الصيني.
وانتشرت تلك الافكار التي اوردناها على جروبات وبيدجات " الزوجة الصينية.. تزوج باقل التكاليف " و "نعم للزوجة الصينية لكسر احتكار الزوجة المصرية" و "عاوزين الزوجة الصينية" و "العروسة الصينية" بالاضافة لجروب البنات "الزوج الصيني" .
وتساءل الشباب : هل تشعر برغبة ملحة في الزواج؟ هل تعاني من عدم امتلاكك لتكاليف الزواج الباهظة؟ هل تقدم بك العمر ومبقتش قادر خلاص؟ يبقي مفيش الا حل واحد -- ( الزوجة الصينية) وتتكلف من 1200 – 1500 جنيه مصري.
وكانت المزايا في وجهة نظرهم :
- ان الزوجة الصينية صغيرة الحجم، سهلة الاستخدام .
- الزوجة الصينية قليلة الاستهلاك لصغر معدتها.
- الزوجة الصينية ذات جلد ناعم وشعر طويل.
- الزوجة الصينية مزودة بخاصية اغلاق الصوت للتتكلم وانتا لا تسمعها علي الاطلاق.
- الزوجة الصينية مزودة بخاصية مانع النكد والزن.
- الزوجة الصينية من غير اهل يعنى مفيش حد هيتحكم فيك ويقول مهر وشبكة.
- الزوجة الصينية مش بتعرف تروح المحكمة عشان تخلعك.
وجاء رد الفتيات عنيفا بفكرة "الزوج الصيني" مؤكدين انه في الفترة الاخيرة زاد عدد البنات فى مصر وبذلك زادت نسبة العنوسة وزادت نسبة اجرام المراة فى قتل زوجها بسبب خيانته وطلباته الكثيرة، وبما ان الصين احتلت الصدارة العالمية فى دخول منتجاتها الى البلاد فكل شيئ اصبح منه الاصل والصينى وايضا ظهرت الزوجة الصينية فبحق المساواة بين الرجل والمراة تتطالب المراة العصرية الان بظهور الزوج الصينى وبالمواصفات التى ترغبها وباقل التكاليف والاسعار وهذا يعتبر حق من حقوق المراة للمطالبة به
العريس الصيني
وكانت مزايا الزوج الصيني في عيون الفتيات :
- انه وجه جديد بدل الرجل المصرى الى خلقته معتادة (عيون صغيرة - شعر ناعم - قصير ) .
- مريح فهو يقوم بجميع الاعمال المنزلية يعنى هيغسل وهيكنس وهيمسح وهيطبخ ويوفر فى مصاريف البيت يعنى راجل غسيل ومكوة من الاخر.
- مش هياخد مكان كبير فى البيت يعنى مش هيعمل كركبة وزحمة (فى اى درج ارميه او على الغسالة حطيه).
- مش هيكون معاكى مزعج علشان اصلا مش هتفهمى كلامه يعنى من الاخر كأن وجوده زى عدمه.
- وعلى فكرة هو بياكل اى حاجة بس اهم حاجة اديله سلكتين سنان علشان ياكل بيهم.
- من الاخر ولا واحد يتأمر ولا يتحكم فيكى ولا يشك فيكى ولا بليل يرميكى ويروح يقعد على الكمبيوتر وشات بقى وبتاع وانتى عارفة الى بيحصل ولا حتى هيسيبك ويروح على كافيه مع صحابه ولا يسيبك ويروح لوحده تانية(طبعا مش هنقول مين اللى بيعمل كل ده لان كلنا عارفين انهم الشباب المصرى).
- بالاضافة الى ان الزوج الصينى هيحل عقدة بنات كتير زى القصيرين هيحسوا بطولهم والى عنيهم صغيرة هيحسوا بوسعها والهادين هيحسوا برغيهم .
- اما انتى يالى متجوزة وتخنقتى من جوزك ومن طلباته وعدم اهتمامه بيكى وبنفسه ومظهره الخارجى دلوقتى هيكون معاكى احسن محاميات علشان تخلعى وتشترى زوج صينى وتريحى دماغك .
- وبعد كل الكلام دة اكيد عرفنا مميزات الزوج الصينى وانه مرتب ومنظم ومش روتينى ومش رغاي ، وباقل الاسعار وضربنا السعر ب 500 جنيه بس.
وكانت ابرز التعليقات على فكرة الزوجة و الزوج الصيني :
Ana Bobosh : الصينيين دول اصلا اخرهم فوانيس موبيلات دا اخرهم لكن زوجة غير صالحة بالمرة متعرفش دين ربنا بيقول ايه لو انتوا هتبصوا للصح هتعرفوا ان ملهاش لازمة اصلا غير انهم هما الى عندهم عنوسة عشان كدا مرخصين سعرهم اوى فى بلد بيبص على الحاجة الى ببلاش.
Hany Apdo: ايوة كدة هاتو كام مليون للشباب المصري .. بكرة البنات هتبور وهتقعد فى البيوت والعشرة منهم هيكونو على البطاقة بتاعت التموين زى الزيت ..افضلو قولو دة وحش ودة مش معاة شقة ودة مش جاهز ومش عارف اية بكرة تندم يا جميل .
Basam Mohamed Shahwan : حد يعرف طريقة الوصول للعرايس الصيني ازاي ؟
: Teko Mohamed انا عايز عروسة صيني بقي تيواني اي حاجة بجد ونبي عشان بنات بلدنا راكبهم التعالي مش عارف ليه بس بجد انا عايز واحدة.
: Eslam Elsayed انا عايز واحده اعمل عليها المشروع بتاع الجامعه .
:Taher Hassan Taher لا تلوثوا العرق المصرى يشرطون فى العقد عدم الزواج بمصريه و الا بطل لانهم يريدون نسائنا ان تتعنس فلا تجد سوى الزوج الصينى او ياخدو الجينات المصريه الى هيا جينات خير اجناد الارض.
الزوجة الصينية
:Marawan Ismail ياجماعة حد يدلني على مكتب الجواز الصيني مش معقول الكل بيكتب و محدش عارف فين المكتب انا دورت كتير و لقيت مكتب أسمه ( روتال سي ) في المهندسين بس مش متأكد من المعلومة.
Mohamed Elhady : ايوه كده يا وديع .. هي دي العولمة بصحيح .. انا هاجيب اتنين واحدة للاعمال المنزلية والتانية سكرتيرة..وبعد كده هاخش جمعية واجيب حق واحدة تسوقلي العربية .
:Ahmed Ali طب ولو ده حصل والفكرة نجحت .. العيال اللي هيتولدوا هيبقي شكلهم مصري والا صيني
يعني ابوه هيبقي مفضوح.. مفضوح انه اتجوز صينية.
Kazanofa Elking: ياعيني عليكم يابنات مصر هاتعنسوا وكل ده بسبب الفشخرة الكدابة بتاعتكم وبتاعت اهلكم والله العظيم الشباب كلها تعبانة في حياتهم والعيشة اللي زي الزفت دي مش عارف نروح فين يعني هانعمل ايه كتر خيرها الصين والله حاسة بينا.
Fares Arabe : والله تشكر الصين، كل الى نفسه فى حاجة عملتهاله، الى نفسه فى عربية ركبتهاله، والى نفسه فى موتوسيكل ركبته، والى نفسه يتجوز جوزته .
وفي النهاية وضع الشباب اعلانهم المنتظر للوصول الى العروسة الصيني :-
بشرى لكل شاب مصرى جاد زهق من مواويل الزواج من المصريات هذا هو الموقع الذى تستطيعون من خلاله اختيار الزوجة الصينية المناسبة لاحتياجاتكم و بأقل سعر فى السوق و بداية الاجراءات الفعلية للزواج من خلال وسائل الاتصال المتاحة على الموقع مع المسئولين.