آه يا أمي يا قوية

مصر بتولع وبتولول واخوات بيموتوا بعض واحلامهم ماتت معاهم احلام بسيطة زيهم وجثث في كل مكان لناس كانت بتدور علي مكان ياسلام بس لو تعرف تعيش فيه.
آه يا أمي يا قوية
واطفال شوارع في كل مكان بتجري وتصارع علشان هي كمان نفسها تاكل عيش نسيت حلم الامان والاب والام والاخوان، نسيت طعم الحضن اللي ممكن فيه تنسي ذل ايام سودا في شوارع ضلمة ولا حد بيحس ولا حد بيراعي.
آه يا أمي يا قوية.
وام بتبكي ابنها والناحية التانية جنبها واحدة بتشكي همها لا لقمة عيش مكفية ولا هدمة علي الجسم مدفية ،وواحد تالتة بتجري من الصبح للليل بكيس مناديل بتنادي واللي يدي واللي يقول يحنن وقلبك يا مصر بئة علية قوي جاحد مش انتي كنتي أمي رجعتي وقلت لأ انا مرات ابوك ومن الذل قلت تدوق، دلوقتي مني بتتبري وتقولي علي باب الجامع كنت انا واقع.
آه يا أمي يا قوية
وناس بتجري وتصارع علي كراسي و أبراج و حلم امتلاك كان منهم ضايع ، وناس قاعدة مستخبية بفلوسها تنادي بلطجية تضرب وتقتل وتحرق قلب مصر من جوة ، و ناس علي كراسي تسأل تنادي ايه اخبار بلادي يرد واحد من ناس الكراسي ينادي بخير وكويسة واللي بيبكي ده مش مننا ده كلب وفي منه بدل الواحد هتلاقي ملايين بسعر رخيص تشتري براحتك وتبيع.
آه يا أمي ياقوية
وجنود وضباط محتارة انا معاك ولا معاهم اجري احمي حدودي ولا أحمي قوادي احمي صاحب الكلمة ولا اللي عمال بينادي ،ويقول في سره كلام الحق اللي قدامي ولا اسمع كلام اسيادي.
آه يا أمي يا قوية
وانا وانت واللي زينا يبكي ويجري علي حلمهم وحلمنا لا في يوم عرفنا نحققه ولا حتي عرفنا نبطله ، والحلم ايه مش صعب ولا جامح ده حلم ببكرة اعرف فيه ابص من الشباك الاقي ارضي خضرة وعليها علمي بيرفرف ولقمة بالحب هنية وارفع راسي للسما فرحان بإني من هنا فرحان بإني من هنا.
آه يا أمي يا قوية