إيناس النجار : أنا وسوار والفن

كتبت الفنانة" إيناس النجار " على مدونتها الشخصية تقول : " فيه ناس كتير بتتلخبط بينى وبين سوار أختي من قوة الشبه في الشكل بيننا وعايزة أقول لكم كمان إن الشبه بيننا مش في الشكل بس لكن في الطباع والفن كمان، بمعنى إن أنا في الأصل ممثلة بس كمان بأغنى، وسوار هي كمان أصلها مطربة وألبومها الأخير حقق نجاح كبير لكن عندها موهبة التمثيل عالية جداً ومثلت في أكتر من عمل ونفسى نجتمع إحنا الإتنين في عمل واحد، فبابا وماما علمونا نحب ونحترم بعض أنا و أختي علشان كده تلاقى علاقتنا والحمد لله قوية جداً رغم ما يتردد من إشاعات عن وجود خلافات ومشاكل وغيرة، على فكرة الإشاعات دى عمرنا ما بنصدقها أبداً.
بأستغرب جداً من الأخبار اللي بأشوفها على النت وفى الجرايد والمجلات واللي بتقول إني مش عايزة أحترف الغنا علشان خاطر سوار ما تزعلش منى، على فكرة سوار أكتر واحدة نفسها إن أنا أغنى لكن أنا اللي عايزة أركز في التمثيل بس لأني حاسة إن مستقبلي كله هايكون فى التمثيل إن شاء الله "