يا مرسى عايزين رئيس

باخلاق فرسان وثورى كمان .. صاحب كلمه ورأى وقراراته ثوريه .. مش ماسك ملف الرئاسه زى اخوانه ما قيلينله.. بلدنا ليس لها حل الا القرارات الثوريه .. تلم الشعب حوليك .. وكله يشتغل فى البلد ديه .. واللى مش عايز يمشى ويسيب مكانه للى شايف مصلحة مصرنا الأبيه .. عايزين الامن اولا مش عايزين الضابط اللى عاطى ضهره لاشاره المرور .. وسايبها حلة تقليه .. دا لسه ولائه للمخلوع وسيده العدلى .. وبيعترف بالحكايه ديه .. اللى عايز يخربها يمشى .. ونجيب مكانه الاصلح واللى يصلح ..
مش شرط ولائه ليك ولجماعتك يا مرسى .. حتى لو حولتها لشرطه مدنيه .. وخلى الضباط اصحاب الولاء للمخلوع وسيدهم العدلى فى اعمال اداريه .. بقوه وحزم وجرأه .. عايزين الرئيس ثورى باخلاق فرسان راجل ولا كل الجدعان .. لازم رئيس مصر يبقى كده .. اما انتم يا بتوع المعارضه .. عايزنها معارضه لنلتقى .. مش معارضه وخلاص زهقتونا وكرهناكم .. معندكمش غير تصريحات وخلاص.. مفيش حلول لأى كلام قولتوه .. ولا لكم ناس ولا شعبيه ..
اما ان تنضموا بسواعدكم لمساندة بلدنا وبلدكم .. او تشوفولكم لعبه تانيه .. اجنداتكم خلاص حفضينها وكلامها بقى حامض .. زيكم انتم واللى باعتينها .. زهقنا منكم خلاص انتم واللى حاكمينا .. صباحى عايش الدور ويا دوب زعيم حنطور .. والبردعى كان حيبقى الزعيم للمرحله دى .. انسحب لأسباب مش عارفينها .. وهو اول من كسر حاجز الخوف
..ولما انضم للصباحى وامثال نزل من نظر كل الشعبيه .. ايه رأيك يا مرسى تنفع تبقى زعيم بطلباتنا ديه .. صحيح جابك الصندوق ودى حاجه احنا عارفينها .. على عينا وراسنا يا سيدى كانت غلطخ وفهمينها .. بصراحه انت ومعارضيك مش خيالين مصر الابيه .. لا فيكم واحد باخلاق فرسان ولا تنفعوا اصحاب قرارات ثوريه .. الزعيم له طباع واخلاق فرسان وكمان قراراته ثوريه .. فينكم من كريزما البطل .. حطوا ايدكم فى ايدينا وتعالوا ندور على زعيم بمواصفات الزعامه المصريه مؤمن ويتقى الله فى شعب مصرنا القويه .. من غير زعل ولا مرازيه .. وانا قولت لكم مواصفاته .. ويكون كمان مصرى وحاسس بمصريته ومصر كلها حتكون شعبيته .. وصلت الرساله يا مرسى ولا لسه كلمتنا مش قويه