هرشح نفسى للرئاسة وأمرى إلى الله

يا جماعه أنا خلاص نويت أرشح نفسى لانتخابات الرئاسة أصلى أنا شاركت فى الثورة عن طريق الفيس بوك، وكنت بعمل شير للأخبار والصور والفيديوهات وكنت بكتب كومنتات ضد النظام السابق.
ووعد منى لو نجحت حدى كل مواطن لاب توب هدية، وأوعدكم مش حقطع عليكم النت، ده غير كمان إن أنا مشيت فى مظاهرات 2001 عشان فلسطين ضد إسرائيل، ما هو أى حد عايز يبقى رئيس يطلع ويقول أنا بكره إسرائيل وأى حد حواليه شله تقوله انت محبوب ووطنى ولازم ترشح نفسك يسمع كلامهم ويصدقهم، ما هو الكل طلع له صوت بعد الثورة ما نجحت، وعايز يبقى رئيس مصر كده عالجاهز.
يا جماعة هو انتم لسه معملتوش ثوره على نفسكم؟ ولا لسه معرفتوش إن الشعب المصرى شعب طيب بس مش عبيط يا خلق هووه افهموا بقى إن الشعب المصرى عارف هو بيعمل ايه كويس ومش أهبل وبيصدق أى كلام وإلا مكانش عمل ثورة بيشيد بيها العالم كله.
يا جماعة افهموا إن رئيس مصر القادم مش بس لازم يكون وطنى وشريف وبيحب مصر ده لازم يكون مؤهل إنه يكون رئيس أكبر دولة فى المنطقة ويكون فاهم سياسة خارجية ويعرف يخرجنا من البلاوى المتلتلة اللى دخلنا فيها النظام البائد، ولو جه رئيس ضعيف ممكن يودى مصر فى داهية بحسن نية وانتم شايفين الدول الكبيرة بتقسم فى الدول الصغيرة والحدق يفهم والدنيا بايظة آخر حاجة وسلم لى على الترماى.
يا ريت يكون عندنا وعى سياسى ونعرف حننتخب مين كويس ده مش عضو مجلس الشعب من بتوع بلدوزر الخدمات ورمز الكنكه اللى حيشغل ابنى فى البترول، ولا فى شركة الميه ده رئيس مصر أكبر دولة فى المنطقة.
يا ريت تصلوا على النبى وتستهدوا بالله وتفكروا قبل ما تعملوا حاجه والناس تضحك عليكوا.