رسالة غضب " بمرارة أرواح ودم الأبرياء "

السيد وزير التموين ** احببتك لانك من شباب الثورة **كنت سعيد بيك جدا وأنت وزير من مصابي أحداث موقعة الجمل ** كنت حاسس ان الثورة هتتحقق مطالبها من خلال أول وزارة بوزير ثوري ** لم أفكر أن أقابل احد غيرك من بين كل الوزراء لأهمية الوزارة في تحقيق مطالب الناس ورفع الهم اللي عشش عليها سنين طويلة بسبب الفساد ** جينا وقابلناك وتكلمنا مع رجالة اللي احنا كنا فاكرين انك هتغيرهم لأنهم من أسباب الفساد السنين اللي فاتت كلها ** سيبنا لك مقترحات وحلول وفساد بمديرية التموين بالبحيرة ** نزلت من عندك وأنا طاير وكلي أمل انك هتغير وتعيد هيكلة مديرية التموين بالبحيرة علشان خاطر الناس تحس بفرق الثورة وتدعي للشهداء والمصابين واللي عملوا الثورة بدل ما يدعوا عليهم ** للأسف لم نرى منك اي اهتمام او اي إجراءات للتطهير أو التغيير ** حسيت انك مبتسمعش حتى كلامنا وبتسمع الفاسدين وبس ** أنا وقفت ضدك وأنت بتعزي في اثنين من المفتشين الغلابة بالبحيرة اللي كانوا بيشتغلوا بعد الظهر بتاع فاكهة او في محل عصير ومكنوش من اللي بيفتحوا الجيوب ** ناس فعلا ربنا اختارها علشان لازم يكونوا دول شرارة البدء في التطهير الكل زعلان عليهم بجد ** لا احد هيتنازل عن التطهير والتغيير ** كنت فاكر انك هتقعد معاهم وتسمع منهم مشاكلهم وتغير فورا وانت هنا** لكن للاسف رحت قعدت مع السبب في الفساد وفي موت الناس دي ** ومسمعتش منهم حاجة ** قلت لك انك شغال شو اعلامي ** ايوة انزل الشارع تعالى واحنا نوريك عيش بيروح للناس بالملايين في عربيات روث البهائم ** ناس مش لاقية سولار ولا بنزين ناس مش لاقية علف ولا ردة للمواشي ناس مش عارفة تعمل اشتراك عيش اشتراكات وهمية بالآلاف مفتشين عايشين باليومية او الجمعة او الشهرية وغيره وغيره فساد بلا حدود ** والنتيجة ناس ماتت وسابت وراها اسر فقيرة لانهم كانوا شرفاء مش حرامية لا عندهم حسابات في بنوك ولا اراضي ولا شقق ولا محلات ولا عربيات زي غيرهم من الحرامية اللي عايشين على دم الغلابة واللي بيتاجروا في دم الناس ** طظ في الزيارة اللي متحققش مطالب الناس وتجيب حق الدم ** طظ في اللي يصقفلك من غير ما توصل حق الناس اللي تستاهل فعلا وتحارب الحرامية ** طظ في ال30000 جنيه اللي خدوهم العيال اكترهم ديون هتسدد انا متأكد ** طظ في اي حاجة متحققش التطهير من الفساد والفاسدين ** دم الناس دي في رقبتك مش بس اللي ماتوا بسبب انك مخدش اجراءات للتطهير ** لا كمان كل واحد مش عارف ياخد حقه وكل الحرامية بتاجروا عليه ** كل واحد مش لاقي رغيف محترم ياكله ** كل واحد مش لاقي انبوبة ب8ج اللي انت قلت عليها** كل واحد ميعرفش حقه في التموين لا بياخد ايه ولا بيدفع كام ** كل فلاح مش لاقي الردة ** كل واحد حقه ضايع** ان كنت لسه عاوز تحافظ على حق الثورة والشهداء والدم ** غير ** طهر ** اللهم بلغت اللهم فإشهد ** مواطن لسه فاكر ان الثورة ماشية في اتجاهها الصحيح**