ما دور"طارق المصري" في واقعة تزوير "رمضان صبحي".. شريف إكرامي يجيب؟(تحقيقات)

استجوبت النيابة العامة بالجيزة؛ حارس بيراميدز ومنتخب مصر والأهلي السابق" شريف إكرامي"عقب القبض على زوج شقيقته "رمضان صبحي" بمطار القاهرة قادما من تركيا، كونه مطلوبا على ذمة قضية تزوير "سندات حكومية" (تزوير مستندات)، بعدما فشل "عامل" أداء امتحانات بدلاً من اللاعب في معهد الفراعنة العالي للسياحة والفنادق منتحلًا صفته على الأوراق.
وكشفت أوراق الدعوى رقم 6407 لسنة 2025 جنايات الجيزة والمقيدة برقم 548 لسنة 2025 كلي جنوب الجيزة، والتي حصل "مصراوي" نسخة منها، أن الصدفة وتشابه الأسماء أزاحت الستار عن جريمة "التزوير" التي كانت تحاكٍ في الخفاء ودور كل متهما في الواقعة وصولاً للاعب.
س: ما معلوماتك بشأن الواقعة محل التحقيق؟
ج: اللى حصل إن احنا اتفاجئنا في شهر 5 تقريبا ولقينا المواقع على النت منزلة خبر إن حد دخل امتحان بدل رمضان صبحي وأنا كلمت رمضان وقتها وقلت له إيه الموضوع وقاللى في حد اسمه طارق كان بيجيب له اثباتات قيد من المعهد وإنه مبيروحش المعهد خالص وميعرفش عنه حاجة ولا يعرف مكانه فين، طارق هو اللى كان بيجيب له الاثباتات مقيد في المعهد علشان يسهل بس مواضيع تصاريح السفر بتاعته في مقابل أنه كان بيحوله فلوس وبعدين تفاجئنا بعدها أن في حد اسمه عبد التواب بيرن عليه وطلب مقابلتنا وحددنا معاد عند أشرف. ع ورحنا كان معاه 2 تانيين ولقيناهم بيقولولنا على موضوع فرد الأمن وحسينا أنهم بيدخلونا في مواضيع كتير، وطلبوا مننا نحل الموضوع وكانوا جم متأخرين عن معادهم وكان عندنا تدريب واحنا رحنا على التدريب وسبناهم مع أشرف وبعدين النهاردة الفجر واحنا راجعين من معسكر التدريب في تركيا اتفاجئنا إن رمضان عليه تشابه أسماء ووقفونا في المطار وأخدوا رمضان وأنا أخدت منه حاجته شنطته وتليفونه وكنت معاه لحد ما اتعرض على النيابة النهاردة وهو ميعرفش أي حاجة عن الموضوع ولا ليه أي علاقة بالتزوير ولا المتهمين اللي فيه وكل ما في الموضوع أن رمضان قلي إن طارق كان بيجبله إثباتات القيد ومن حوالي سنتين مبقاش ياخد منه حاجة لأنه خلاص استخرج شهادة إعفاء نهائي وهو دا كل اللي حصل.
س: متى وأين حدث ذلك؟
ج: الواقعة كانت في شهر 5 على ما أتذكر والنهاردة الفجر اتمسك رمضان في المطار.
س: وما مناسبة وسبب تواجدكم في سالف الزمان والمكان ؟
ج: كنا جايين من معسكر تدريب من تركيا.
س: ومن كان برفقتك آنذاك؟
ج: هو كنا لوحدنا وباقي المعسكر جاي على فترات ودفعات.
س: وما علاقتك وصلتك بالمدعو رمضان صبحي رمضان؟
ج: هو زوج أختي وأقرب كونه أخي الأصغر وزميلي في الفريق.
س: وما علاقة وصلة المدعو رمضان صبحي رمضان بالواقعة تحديداً؟
ج: إحنا اتفاجئنا في شهر 5 تقريبا ولقينا المواقع على النت منزلة خبر إن حد دخل امتحان بدل رمضان صبحي وأنا كلمت رمضان وقتها.
س: وهل من ثمة حوار دار فيما بينكما آنذاك؟
ج: أيوة
س: وما مضمون ذلك الحوار؟
ج: هو رمضان قاللى أنه كل صلته بالمعهد ده إنه بياخد منه إثباتات قيد عن طريق اللي اسمه طارق.
س: وهل تحصل المدعو رمضان صبحى على ثمة إثباتات قيد من المتهم طارق؟
ج: أيوة هو رمضان قالنا إنه أخذ منه إثباتات قيد كان يستخدمها في تصاريح السفر لحد ما طلع إعفاء نهائي من الجيش.
س: ومتى تحديدا صدرت له الإعفاء النهائي سالف البيان؟
ج: اللي أعرفه أنها من حوالي سنة ونص او سنتين.
س: ومتى كان تاريخ آخر إثبات قيد تحديدًا؟
ج: أنا معرفش رمضان صبحى اللي يسأل عنه.
س: وهل تم تقديم تلك الإثباتات إلى إدارة التجنيد؟
ج: أنا معرفش و يسأل في كده رمضان صبحى.
س: وما الذي أخبرك به المدعو رمضان صبحى بشأن المتهم طارق تحديدا؟
ج: هو قالى إنه طارق شغال زى سمسار لاعبين كورة وهو قاله على المعهد وخلاه يقدم فيه وكان بيجيب له إثباتات قيد علشان تصاريح السفر ولما الواقعة حصلت وعرفنا أن في حد اتمسك من على النت رمضان قال لى إنه ميعرفش اى حاجة عن الموضوع وأنه كان بيحول فلوس لطارق كل ترم علشان استخراج إثباتات القيد وعلشان تقديمات المدارس الخاصة بأولاده أنه لازم يكون الأب حاصل على مؤهل معين ورمضان قاللى أنه كان بيديله الفلوس في الأول كاش ومؤخرًا عن طريق "إنستا باي" وكان قبلها ممكن شيك وأنا معايا تليفون رمضان اللى عليه "الإنستا باي" وممكن نشوف التحويلات دى منه.
س: وهل تحصل المتهم طارق محمد محمد على ثمة مبالغ مالية أخرى؟
ج:أيوة هو رمضان قاللى انه كل ترم بيحوله في حدود 30 أو 40 ألف جنيه
س: وهل تحصل المدعو رمضان صبحى على شهادة الاعفاء النهائى من التجنيد؟
ج: أيوة هو أخذ الإعفاء النهائي من حوالى سنتين أو سنة ونص.
س: وما هو الدافع من وراء التحويلات المالية للمتهم طارق على الرغم من عدم احتياج المدعو رمضان صبحى ثمة إثباتات قيد لتحصله على شهادة الإعفاء النهائية؟
ج: علشان هو لازم يبقى مؤهل عالى ويسأل في ذلك رمضان صبحى.
س: وما ظروف تقابلكم مع المدعو عبد التواب؟
ج: احنا اتفاجئنا بعدها أن في حد اسمه عبد التواب بيرن على رمضان و طلب مقابلتنا وحددنا معاد عند أشرف ورحنا كان معاه 2 تانيين و لقيناهم بيقلولنا على موضوع فرد الأمن وحسينا أنهم بيدخلونا في مواضيع كتيرة وطلبوا مننا أننا نحل الموضوع وكانوا جم متأخرين عن معادهم وكان عندنا تدريب واحنا رحنا على التدريب وسبناهم مع اأشرف
س: وما هي ظروف ضبط وإحضار المدعو رمضان صبحى رمضان تحديدا؟
ج: هو النهاردة الفجر واحنا راجعين من معسكر التدريب في تركيا اتفاجئنا أن رمضان عليه تشابه أسماء ووقفونا في المطار واخدوا رمضان وأنا أخذت منه حاجته شنطته وتليفونه وكنت معاه لحد ما اتعرض على النيابة النهاردة وهو ميعرفش أي حاجة عن الموضوع ولا ليه أي علاقة بالتزوير ولا المتهمين اللي فيه وكل ما في الموضوع أن رمضان قال إن طارق كان بيجيب له إثباتات القيد ومن حوالي سنتين مبقاش ياخد منه حاجة لأنه خلاص استخرج شهادة إعفاء نهائي وهو دا كل اللي حصل.
س هل من ثمة علاقة أو خلافات بينك وبين أي من أطراف تلك الدعاوى؟
ج: لا.