«أنا مش مهتم أساسًا بالشهادة».. اعترافات رمضان صبحي أمام النيابة في تزوير كراسات الامتحانات (خاص)

اعترف لاعب بيراميدز رمضان صبحي، في تحقيقات نيابة جنوب الجيزة، بشأن اتهامه و3 آخرين بتزوير كراسات امتحانات معهد الفراعنة للسياحة، بأن «هو أنا مش مهتم أساسًا بالشهادة، وكان كل اهتمامي إني أخد إثبات القيد علشان أعرف أسافر، وأبان مقيد في المعهد بعد الثانوية العامة»، موضحًا أن الهدف من وراء هذه الخطوة لم يكن سوى الحصول على أوراق تثبت وضعه الدراسي أمام الجهات الرسمية والظهور بمظهر اجتماعي أفضل.
اعترافات رمضان صبحي في قضية تزوير الامتحانات
«مرحتش ولا مرة».. انفراد بنص اعترافات رمضان صبحي في قضية تزوير امتحانات معهد السياحة
وكشف صبحي في الجزء الثالث اعترافاته التي تنفرد «المصري اليوم» بنشرها، أن المتهم طارق المصري «كان بيتواصل معايا كل ترم ويطلب فلوس لكن مكنش بيقولي أنا في سنة كام أو في الترم الكام»، مشيرًا إلى أنه دفع له مبالغ وصلت إلى «30 أو 40 ألف جنيه كل ترم» منذ عام 2019 أو 2020، بعضها كاش وأخرى عبر تحويلات «إنستا باي». ولم يكن صبحي، على حد قوله، يهتم بمتابعة وضعه الدراسي داخل المعهد، بل اكتفى بالحصول على «إثباتات القيد فقط لا غير».
نص أقوال لاعب بيراميدز رمضان صبحي
«ماعرفش المعهد فين ولا أنا في سنة كام».. اعترافات رمضان صبحي أمام النيابة في قضية التزوير لأداء الامتحانات (خاص)
وتطرّق إلى ملابسات ضبطه في مطار القاهرة عند عودته من معسكر تدريبي في تركيا فجر 29 يوليو 2025 حيث أوضح: «أول ما وصلت المطار قبضوا عليا وقالولي فيه تشابه أسماء، وبعدها أخدوني على مركز شرطة أبوالنمرس».. وإلى نص أقواله:
س: وهل أخبرك المتهم / طارق المصري بالتحاقك بمعهد الفراعنة العالي للسياحة والفنادق وقيدك فيه على وجه رسمي وتنقلك ما بين السنوات الدراسية المختلفة؟
ج: هو كان بيتواصل معايا كل ترم ويطلب فلوس لكن مكنش بيقولي أنا في سنة كام أو في الترم الكام.
س: وهل تحصل منك سالف الذكر على ثمة مبالغ مالية؟
ج: أيوه.
س: وما هو مقدار تلك الأموال تقريبًا؟
ج: هو كان بياخد مني 30 أو 40 ألف جنيه كل ترم وده من بداية عام 2019 أو 2020 مش متذكر بالظبط.
س: وما هي طريقة تسليمك سالف الذكر تلك المبالغ المالية؟
ج: هو في الأول كان بياخد كاش وبعدين بقيت بحوله على برنامج إنستا باي.
س: وهل من ثمة إيصالات دفع أو إيصالات تحويل تحصلت عليها من سالف الذكر مقابل تلك المبالغ؟
ج: أنا بس كنت باخد منه إثباتات القيد فقط لا غير، وحتى التحويلات كانت الأخيرة على إنستا باي.
س: ومن أي هاتف جوال كنت تقوم بإرسال تلك المبالغ له؟
ج: من على تليفوني.
س: وأين ذلك الهاتف المحمول خاصتك؟
ج: هو مع شريف إكرامي أخو مراتي علشان لما وقفوني في المطار أخد متعلقاتي خلاها معاه.
س: وما الذي حال دون وقوفك على حالتك وموقفك الدراسي في المعهد محل الواقعة؟
ج: أنا ما سألتش لأن كان كل اللي يهمني إثباتات القيد علشان أسافر وأكون مقيد بمعهد ومايبقاش آخر مؤهل بالنسبة لي الثانوية العامة علشان تقديم أولادي في المدارس والمظهر الاجتماعي.
ملحوظة: حيث قمنا بعرض برنت الأحوال المدنية والمشمول على صورة المتهم طارق محمد محمد صالح على المتهم الماثل فأقر بأنه ذاته المعني بالواقعة.
س: ما هي ظروف ضبطك وإحضارك وعرضك علينا؟
ج: اللي حصل إني كنت في معسكر تدريب في تركيا وبعدين أول ما وصلت المطار قبضوا عليا وجابوني النهاردة على النيابة وده اللي حصل.
س: متى وأين حدث ذلك؟
ج: الكلام ده حصل النهاردة 2025/7/29 الساعة 2 الفجر تقريبا في مطار القاهرة.
س: وما سبب ومناسبة تواجدك بالزمان والمكان سالفي الذكر؟
ج: أنا كنت راجع من معسكر تدريب في تركيا ووصلت مطار القاهرة.
س: ومن كان برفقتك آنذاك؟
ج: كان معايا شريف إكرامي أخو زوجتي وراجعين مع بعض.
س: وهل من ثمة تفتيش صرف إلى شخصك؟
ج: لا.
س: وإلى أين تم اقتيادك تحديدًا؟
ج: هما أخدوني من المطار وقالولي إن فيه تشابه أسماء، وبعدين ناداني واحد ظابط وقاللي «افضل معانا»، وقعدت في أوضة لحد ما قوة جت وأخدتني على مركز شرطة أبوالنمرس.
س: وما هي وسيلة انتقالك إلى ديوان المركز تحديدًا؟
ج: هما أخدوني في ميكروباص وبعد كده ركبوني في بوكس شرطة.
س: وهل تقف على شخص قائدها وأرقام وبيانات لوحاتها تحديدًا؟
ج: لا ماخدتش بالي.
س: وما الإجراء الذي تم اتخاذه حيالك بديوان مركز شرطة أبوالنمرس؟
ج: أنا فضلت هناك مقعدني لحد ما جيت على النيابة.
س: وما علاقتك بالمدعو / محمد إبراهيم عبدالواحد الشهير ب «العمدة»؟
ج: أنا معرفوش ولا رحت المعهد مرة واحدة حتى ولا أعرف المعهد نفسه فين.
س: وهل دار فيما بينك وبين المتهم طارق المصري ثمة حوار أو أبرمتم أي اتفاق بشأن تحصلك على الشهادة الخاصة بالمعهد سالف البيان؟
ج: هو أنا مش مهتم أساسًا بالشهادة وكان كل اهتمامي إني أخد إثبات القيد علشان أعرف أسافر، وأبان مقيد في المعهد بعد الثانوية العامة، وفي نفس الوقت هو كان بياخد مبلغ قليل حوالي 30 أو 40 ألف جنيه في الترم ومكنتش بسأله كتير ولا قليل، وكان كل اللي يهمني يجيب إثبات القيد، وماكنتش بسأله أنا في سنة كام، لأني كل اللي فاكره إنه بيأجلني، فمكنتش بسأله على أي حاجة، لأن مصلحتي ودنيتي ماشية في إثبات القيد وبسافر براحتي ومقيد بمعهد عالي.
س: وهل قمت بالاطلاع على أي إثبات قيد صادر من المعهد محل الواقعة ومراجعة بياناته؟
ج: لا أنا مكنتش براجع حاجة، لأنه كان في الأغلب الإداريين بتوع النادي هما اللي بيستلموه ويخلصوه ساعات، والإدارة العامة للتجنيد علشان يجيبوا تصاريح السفر، وعلشان كده مادام مصلحتي ماشية مكنتش بهتم.
س: وما الذي حوته تلك الإثباتات وما مضمونها؟
ج: كان مضمونها إني مقيد في المعهد.
س: وكم عدد إثباتات القيد التي قمتم باستخراجها تحديدًا؟
ج: هو عدد كتير من بداية 2019 أو 2020، ولكن أنا مش متذكر العدد بالظبط. وأنا برضه بقالي سنتين ماخدتش إثباتات قيد لأني أخدت شهادة إعفاء نهائي من التجنيد.
س: ومتى كان تاريخ آخر إثبات قيد تحديدًا؟
ج: أنا مش فاكر بالظبط كان آخر إثبات قيد إمتى، بس ممكن يكون ساعة ما كنت بجدد البطاقة بتاعتي وينقل من أرض اللواء للبالم هيلز.
س: قررت سلفًا بعدم استخراجك إثباتات قيد منذ استخراجك شهادة الإعفاء النهائي، في حين إقرارك باستخراج إثبات قيد حال استخراجك البطاقة الرقم القومي وتجديدها؟
ج: ممكن أكون استخرجته وأنا بطلع البطاقة بس مش متأكد قدمته فيها ولا لا.
س: وهل استخدمت إثبات القيد في استخراج تلك البطاقة؟
ج: أنا مش فاكر قدمته ولا لا.