منى فاروق: "أي حد بيحبني يدعيلي لأني مدمرة نفسيا"

وجهت الممثلة الشابة منى فاروق، رسالة جديدة عبر مواقع التواصل الإجتماعي، مؤكدة خلالها أنها مدمرة نفسيا.
وكتبت منى، عبر ستوري حسابها على إنستجرام: "هقفل السوشيال ميديا لفترة وجيرة.. وأي حد بيحبني يدعيلي أعدي الفترة دي على خير لأني مدمرة نفسيا".
وكانت منى فاروق، أعلنت التراجع عن اعتزال الفن بعد ساعات قليلة من إعلان الإعتزال، لتناشد الفنان أشرف زكي نقيب المهن التمثيلية بالعمل.
وكتبت منى، عبر صفحتها بموقع التواصل الاجتماعي "إنستجرام": "مساء الخير .. الكلام اللي بقوله ده خارج خالص عن فكرة إني أخد التريند وأعمل زي أي حد .. أنا قلت أعتزل الفن لسبب واحد وهو إن ده مصدر رزقي الوحيد اللي أنا بحبه وعايزة أشتغله، لكن لما أوصل لمرحلة إني مش عارفة أدفع إيجار بيتي حاجة تتعب".
وتابعت: "أنا محتاجة أشتغل عشان أقدر أعيش زي أي بني آدمة طبيعية.. أنا غلطت وربنا بيسامح.. ليه البني آدمين مش عايزين يسامحوا؟ أنا بسمع بودني بلاش منى عشان الفيلم ميضرش، ليه يا ربي أنا بقيت منبوذة من كل الناس؟".
واستكملت: "أنا مش طالبة غير إني أشتغل في الحاجة اللي بحبها عشان أعرف أعيش .. المجتمع حاططني في المكان الوحش بس مش يمكن عايزة أبقى كويسة زي أي واحدة؟ ليه بتقفلوا قدامي كل حاجة؟".
وأردفت: "عشان كدة، أنا بناشد دكتور أشرف زكي والأستاذ أشرف عبد الباقي وشركات الإنتاج .. محتاجة الشغل عايزة أعرف أعيش .. ولما قلت قرار أعتزل من أجل لو حد شافني بشتغل في محل لبس أو أي شغل ميقولش إيه ده؟ والله مش طالبة غير أشتغل .. عايزة أشتغل أبوس إيديكم".
وكانت منى فاروق، أعلنت في وفت سابق اعتزالها الفن والسوشيال ميديا، عبر حسابها على "إنستجرام"، قائلة: "تعبت وأشعر بعدم التقدير لشخصي ولموهبتي، ولم أعتد البقاء في مكان، ومع أشخاص لا تقدرني".
وأضافت: "إجازة مفتوحة من ال سوشيال ميديا مش هكون موجودة، مش عاوزة حاجة من حد ولا عايزة حد يعوز مني حاجة".
وأختتمت منى حديثها: "أنا دلوقتي هعيش لنفسي محتاجة أكون نفسي محتاجه سلام نفسي اللي بيحبوني شكرًا، وكتر خيرکم، واللي ما بيحبنيش شيلوني من حساباتكم لحد ما أقدر أواجه الحياة الظالمة دي تاني".
يذكر أن منى فاروق، شاركت في أكثر من عمل درامي ، كان آخرها مسلسل "أيام" مع حورية فرغلي، شيري عادل، وأحمد صفوت، وسلوى خطاب، وميدو عادل، ومحمود حجازي، ورياض الخولي، وندى موسى، مي القاضي، وحجاج عبد العظيم ولقاء سويدان، وسماح السعيد، حنان يوسف، صفاء جلال، محمد دسوقي ومحمد مغربي، تأليف سماح الحريري وإخراج محمد أسامة.