شيرين رضا: "أنا فاشلة في الجواز.. والحب مفيهوش عذاب"

قالت الفنانة شيرين رضا، إنها لا تحب أن تكون حياتها صافية طوال الوقت، قائلة: "هزهق طبعًا لازم يكون في أحداث وصوت للطبيعية ومفاجآت وحاجات مش متوقعه لأن دا اللي بحبه".
وأضافت "شيرين" في حوارها لبرنامج "أنا والقناع" والذي تقدمه الإعلامية منى عبد الوهاب، على فضائية "الحياة"، مساء الاثنين: "لا اعتقد أن الحب فيه عذاب لكن فيه شوق ووحشة والشخص في حالة بعده يكون لديه رغبة في القرب من جديد، العذاب دا مش حب، لأن الست لما بتبقى بتحب واحد وعلى طول بتعيط ومدايقة دا مش حب دا تعود أو حب تملك، الحب مفيهوش حد بيدايق التاني".
وتابعت: "واضح إني فاشلة في الجواز"، لتقاطعها الإعلامية منى عبدالوهاب، قائلة: "واضح من تجربتين بس؟ لترد شيرين: أمال أنا لازم أجرب كام مرة"، لتقاطعها مرة أخرى منى عبدالوهاب، قائلة: "في ناس جربت 13 و14 مرة ومش شايفين أنهم فشلة بل القصة هي اللي فاشلة"، لتجيب شيرين: "دي طريقتهم هما يحبوا يعملوا كده أنا محبش أحاول أحط في الفيشة فاتكهرب مرة واتنين وتلاته".
وأردفت: "كل مرة حطيت ايدي في الفيشة كنت بتكهرب"، موضحة: "مقدرش أقول إني عمري ما قابلتش الراجل المناسب، بس أقدر أقول إن العلاقة مكملتش".
وردت شيرين على سؤال الإعلامية منى عبدالوهاب: "جربتي تقول نعم وحاضر وتبقى نسخة من أمينة شوية؟"، قائلة: "أنا لا أمينة ولا سي السيد لما حد يقولي حاجة مظبوطة بوافق، أنا عمري ما هبقى أمينة ولا سي السيد، لكن نبقى بني آدمين طبيعين، لأن أمينة مستسلمة ومعندهاش مخرج أو حلول أو أمل تتعلق بيه، وهي منسحقة".
يذكر أن برنامج "أنا والقناع" هو برنامج رمضاني تقدمه الإعلامية منى عبدالوهاب ويُعرض على قناتي الحياة وcbc ضمن خريطة الشركة المُتحدة للخدمات الإعلامية وإنتاج شركة DS+، ويستضيف عدد من الفنانين، مثل النجمة يسرا والنجمة غادة عادل والنجمة نيللي كريم والنجم شريف منير وشيماء سيف والنجم الكبير محيي إسماعيل وبيومي فؤاد وريهام عبد الغفور.