هيسحبوا عينة من المخ..نجل محمد ثروت يعاني من مرض نادر وصديقه يكشف التفاصيل

كشف صديق المخرج أحمد ثروت نجل الفنان محمد ثروت، تفاصيل ما يعاني منه تزامنا مع سفره إلى ألمانيا لاستكمال رحلة العلاج هناك، وذلك إثر خضوعه للعلاج في أحد المستشفيات بالقاهرة، عقب إصابته بمرض نادر في الجهاز العصبي ويطلق عليها علميا اسم "متلازمة ميلر فيشر".
وكتب عثمان بدران صديق أحمد ثروت، عبر حسابه على "فيسبوك": "من فترة كنت كتبت على قصة الضغط العصبي وإن مفيش حاجة مستهلة وده كان بسبب حبيبي وصديقي أحمد ثروت اللي عنده 31 ولا 32 سنة وهو عنده شركة في مجال الدعاية والإعلان.. زميل صنعة زي ما بيقولوا ومن شوية ضغط في الشغل في خلال السنوات اللي فاتت جات له جلطة في عينه الشمال والحمد لله بتتحسن ولكن تطور الموضوع أكتر وجه له مرض في الأعصاب نادر أوي أوي اسمه "متلازمة الميلر فيشر" و ده مرض بيجي 1٪ في المليون بيخلي الجهاز المناعي يهاجم الجهاز العصبي وحاليا مأثر على رجله الشمال تماما واليمين بنسبة 50٪ زي ما أحمد قال لي".
عثمان بدران تابع: "الحمد الله عزيمة أحمد في حتة تانية خالص وبيهزر وبيضحك ومؤمن ومبسوط إن ربنا اختصه.. بس النهاردة يوم مهم جدا.. أحمد سافر لألمانيا علشان المرض ده محتاج مركز متخصص لعلاجه والنهاردة هيسحبوا عينه مياه من المخ علشان يحددوا الموضوع أكتر ويحطوا بروتوكول للعلاج بإذن الله".
صديق أحمد ثروت أضاف: "بناء علي نتيجة النهاردة هيتحدد حاجات كتير أوي.. فضلا وليس امرا ندعي لأحمد لعلكم أقرب الى الله إنه يشفيه ويهون عليه ويربط على أبوه الخلوق الجميل محمد ثروت وأمه وأخته وخطيبته".
وجاءت تعليقات الجمهور على الأزمة الصحية ل نجل محمد ثروت، كالتالي: "ألف سلامة إن شاء الله يرجع أحسن من الأول.. محروق الشغل على التايتل" ، "ربنا يشفيه ويقومه بالسلامة يا رب" ، "ربنا يشفيه يا رب هو وكل مريض" ، "ربنا يشفيه ويرجعه بالسلامة هو القادر على كل شئ" ، "ربنا يشفيه ويعافيه وينجيه من كل شر ويرده سالم غانم ويجعله كله في ميزان حسناته يا رب"، "ما شاء الله السماحة باينة على وشه، ربنا يكرمه ويرد له كامل صحته" ، "ربنا يشفيه ويعافيه يا رب إن شاء الله يقوم بألف سلامة" ، "ربنا يشفيه ويعافيه ويقومه بالسلامة إن شاء الله".
على جانب آخر، وجه أحمد ثروت رسالة لخطيبته، اليوم الجمعة، عبر حسابه على إنستجرام، وعلق: "لو وقفت تاني علي رجلي هيكون ليكي فضل بعد ربنا ف دة... وقفتي جنبي، سندتيني وسهرتي شهر جنبي من غير نوم وكنتي مؤمنه فيا من اول يوم عرفنا بعض فيه".
وأضاف نجل محمد ثروت: "فعلاً لو قعدت عمر كامل اوفيكي حققك ما يكفيش 1٪ من اللي بتعمليه معايا يا بنت الأصول وإن شاء الله أقوم بس وأيامك كلها تبقى عوض عن كل ليلة صعبة قضيناها مع بعض".