باهر النويهي وديانا هشام يكشفان لغز صورتهما مع نيرة أشرف (فيديو)

خلال الساعات الأخيرة الماضية، تم تداول صورة ظهرت فيها نيرة أشرف، مع الممثلين محمد شبانة، وباهر النويهي، وديانا هشام، والشيف شريف عفيفي.
ومن جانبه؛ علّق الفنان باهر النويهي، على الصورة المتداولة في مقطع فيديو نشره عبر حسابه بموقع "إنستجرام" تحت عنوان "مفيش كلام تاني أقوله في حادثة نيرة أشرف"؛ وقال: "الفترة اللي فاتت أنا قريت وشوفت اسمي في كذا خبر وفيديو له علاقة بحادثة مقتل نيرة أشرف، الموضوع ده مضايقني جدا لأن الأخبار دي في منها كتير ملهوش أي أساس من الصحة، وأنا بالنسبة لي الحادثة أصلا مروعة ومش مستحملة إننا نقعد نتكلم فيها وتبقى تريند وكده".
أضاف: "اللي مضايقني أكتر أن في ناس بتقرى الأخبار دي وتصدقها وتيجي تكتب عندي تعليقات، واللي يقولك ده باين عليه حبيبها ومخبي ومش عارف إيه، وبعدين واحد دخل كتب على صورة أنا عامل فيها حادثة وكنت مقلوب بالعربية وهموت (عشان تعرف إن الموت قريب من كل الناس عشان تبقى تتخلى عن نيرة أشرف وتمسح صورها)، هو الحقيقة إن أنا مسحت صورها فعلا، بس أنا مسحت صورها لأن في ناس بعتتلي إنه بسبب الصور دي نيرة أشرف بيتشهرّ بيها، وأنا أصلا مش فاهم إيه اللي في الصور يشهرّ بنيرة أشرف، مفيهاش أي حاجة مسيئة، أنا قررت إني أمسحها عشان مبقاش حزء من الموضوع ده".
تابع: "أنا مش عايز الناس تشير حاجات هما مش عارفينها ولا يكتبوا كلام يضايق وملوش أي معنى، دي بنت ميتة، اعتبرها أختك، الله يرحمها".
View this post on Instagram
A post shared by Baher El Newehy - باهر النويهى (@baherelnewehy)
واستكمل في فيديو آخر: "أنا أعرف نيرة من خلال ناس صحابي، اتقابلنا كذا مرة واتكلمنا كذا مرة بس الكلام كان على القد، من خلال معرفتي بنيرة هي بني آدمة كويسة جدا ومحترمة جدا، وعمري ما شوفت منها أي حاجة وحشة، ولا عمرها اتكلمت معايا عن الوسط الفني ولا إنها عايزة تدخل الوسط الفني".
وحول الصورة المتداولة؛ قال: "دي صورة جماعية وفي مكان عام، وعادي جدا كلنا بنتصور في جماعة مع حد ممكن نكون لسه مقابلينه أو حد نعرفه بطريقة سطحية ومن غير ما يكون بينكم أي علاقة طالما في جروب، والصورة مفيهاش أي حاجة مشينة ولا تدينها".
View this post on Instagram
A post shared by Baher El Newehy - باهر النويهى (@baherelnewehy)
اقرأ أيضا| "إيه اللغز؟".. أول تعليق من ديانا هشام على صورتها مع نيرة أشرف - فيديو
وكانت الفنانة ديانا هشام، أيضا، علّقت على الصورة المتداولة؛ وقالت في مقطع فيديو نشرته عبر حسابها بموقع "إنستجرام": "أنا صاحية على تليفونات كتير بيسألوني عن حكاية الصورة دي، أنا عايزة أعرف إيه اللغز يعني؟ إيه اللغز اللي يخليكم تحطوا دايرة حمراء على وشي؟ مش قادرة أفهم يعني بتدوروا على إيه؟".
أضافت: "ده مكان كنت أنا مدعوة فيه، مناسبة زي أي مناسبة معزومين فيها، وده مش معناه إن أي حد معايا في الصورة يبقى صاحبي أو من أنتيمي أو من عيلتي، صورة جماعية في مناسبة عامة، اتصورنا صورة في المناسبة لا بينا لقاءات تانية ولا حاجة تانية بتجمعنا ولا أعرفها معرفة شخصية".
تابعت: "هي كانت صاحبة لناس صحابنا وكانت معزومة في المناسبة دي، وصورة من 2020، بعد مقتلها إيه! هو أي بروباجندا! يا جماعة عيب، دعوا الخلق للخالق، ربنا يرحمها، وهي دي المرة الوحيدة اللي أنا شوفت فيها نيرة الله يرحمها، وأنا مش هنكر معرفتها، أنا هنكر معرفتها ليه؟ دي الصدفة الوحيدة اللي جمعتنا مع بعض".
استكملت: "أنا معرفهاش شخصيا، إحنا حتى يومها متكلمناش مع بعض، البنت بنت محترمة جدا، وسمعتها كويسة جدا، وربنا يرحمها برحمته، وكلنا قلبنا اتقطع عليها، يا جماعة خلاص بقى، وارحموا من في الأرض يرحمكم من في السماء، ولو تم استغلال اسمي أو صورتي هتخذ إجراء قانوني".
وعلّقت ديانا على الفيديو، قائلة: "أي حد بيشوف الفيديو ده يترحم ويقرأ الفاتحة على المرحومة نيرة أشرف، أما بقى اللي بيستغل موتها عشان يحقق مشاهدات ويكون تريند فحسبنا الله ونعم الوكيل".
View this post on Instagram
A post shared by Dayana Hesham (@dayanahesham.official)