تامر حسني يرد على دعوته لدعم مرضى ضمور العضلات ويطلق مبادرة

رد الفنان تامر حسني، عبر حسابه الرسمي بموقع فيسبوك، على أحد الأشخاص الذي طالبه بدعم مرضى ضمور العضلات.
وكتب تامر: "يا حسين يا حبيبي أنا معاك وبدعمك وبدعم حملتك الانسانية السامية وسلامي لصديقي وحبيبي استاذ خيري رمضان".
وتابع: "عندي فكره أتمنى رعايتها ودعمها من أجل كل مريض فكرة مش هتخلي مريض واحد في مصر يمد إيده لحد، لو مليون مصري اشترك فيها هنحل أزمة الأمراض المكلفة في مصر كلها".
وأضاف: "مليون مصري بس من ال 120 مليون مصري هيتطوعوا على حساب معين للتبرع وهيكون في لجنة مسؤولة من جهة رسمية مسؤولة في الدولة بتقيم الحاله مادياً والمليون مشترك دول هيكونوا بيتبرعوا بشكل دائم كزكاة عنهم وعن أولادهم لخدمة مجتمع كامل وممكن نسميها مثلاً صفحة المليون أخ".
واستكمل: "كل ما تظهر حالة محتاجة رقم صعب الصفحة هتدرسها وتعلن عن الحالة وتكلفتها، التبرع هيبقى في حدود من 20 جنيه ل 40 حسب الحالة، بس ساعتها أول ما هنعلن هنجمع الفلوس في ثانية لكل المحتاجين وكل المقتدرين اللي ربنا هينور قلوبهم وهيشتركوا في الحساب ده، مش هيحسوا إنهم دفعوا حاجة بس هينقذوا حياة أطفال كتير وناس كتير محتاجة".
وتابع: "ومين عارف جايز الفكرة دي تخلي مفيش ولا واحد مريض في مصر مش لاقي يتعالج و جايز المليون مشترك يكتروا، والله والله والله دي فكرة بسيطة مش هتكلف حد بس هتخدم ناس كتير، هتخدم بلد هتخدم كل المحتاجين ونخليهم ميمدوش ايديهم لحد يكسفهم".
واختتم تامر حديثه قائلا: "ربنا خلقنا عشان نساعد بعض وزي ما علمنا رسولنا الكريم، خير الناس أنفعهم للناس يعني ربنا بيحب الناس اللي بتنفع الناس وأي صدقة بتخرج من أي حد مستحيل تنقص ماله بالعكس هيضاعفها ربنا في رزقه وهيكرمه ويطهره ويرفع عنه بيها يارب الفكرة دي تتحقق".