"محسن سرحان كرهني الرجالة".. سميحة أيوب تكشف تفاصيل زيجاتها الثلاثة

أكدت الفنانة القديرة سميحة أيوب، أنها تزوجت 3 مرات من سعد الدين وهبة، ومحمود مرسي، ومحسن سرحان، مضيفة: "جوازتي من محسن سرحان كنت مراهقة وعيلة صغيرة وكان حب مراهقين يعني وشافني لما كنت بشتغل أخته الصغيرة في دوري في فيلم اسمه المتشردة، وجوازنا مكملش لأن ساعات البابان بتبقى مقفولة والطبائع بتتغير وأنا كنت عيلة صغيرة وهو راجل ناضج وكان نجم كبير أوي، وزي ما بيحصل في أي بيت وخلفت منه ولد".
وأضافت "أيوب" في حوارها لبرنامج "كلمة أخيرة " على فضائية "أون إي" اليوم الثلاثاء: "أن زواجي من محمود مرسي جاء بعد قصة حب كبيرة جدًا جدًا، واطلقنا وأحنا بنحب بعض جدًا، وسبب الطلاق أني بشتغل كتير والحقيقة كنت ظالماه، وقالي البيت وكده لأني كنت بخرج الصبح أروح الإذاعة وبعدها بروفة وبعدها التليفزيون وبعدها أعمل السوارية وبعدها أروح، وقالي إنتي صعبانة عليا يا سميحة بتحاولي لما تيجي تعملي مجهود مضاعف عشان تحسي أنك مش مقصرة فانتي صعبانة عليا".
وتابعت: "قولتله أنا ببني نفسي وأحنا بلد ذاكرتها ضعيفة لما بتمشي من الصورة بتتنسي فأنا دلوقتي عايزة بس أبقى في الصورة أثبت وقالي تفتكري الحياة هتستقيم وهو بالفعل كان مظلوم وخلفت منه ولد على طول"، مؤكدة: "اللي تركه محسن سرحان أني كرهت الرجالة كلها، لأن الضغط الزائد عن اللزوم ويقفل عليكي الباب بالمفتاح ومتقعديش مع أمك ولا أخواتك فهو كان صعب الله يرحمه".
واردفت: "محمود مرسي كان انسان راقي ومثقف وطيب وفي حاجات كتير أوي جميلة، وسعيد الدين وهبة كان راجل عاقل أوي وحياتنا كانت مع بعض صداقة وأصدقاء ودي الحياة اللي تستمر وثورة الحب تهدأ بعد كده والحياة أنك راكبة مركب انتوا الاتنين ماسكين الدفة ومفيش واحد عايز يعمل على التاني المهيمن والأمر دايما شورة ونقول لبعض كل حاجة".