شريف مدكور: "أدفع الزكاة وأتصدق لكن مش مأمور أني أسلف ناس لا أعرفها"

كشف الإعلامي شريف مدكور تفاصيل البوست الخاص به بشأن رأيه في طلب بعض الأشخاص اقتراض المال منه.
وقال مدكور في مداخلة هاتفية مع الإعلامي عمرو أديب، ببرنامج "الحكاية"، المُذاع عبر فضائية "mbc مصر"، مساء السبت: "فيه ناس كتير هاجمتني والموضوع بقى تريند مع أنه تافه جدًا، ومش أول مرة أكتبه، فيه حد أنا معرفوش يبعتلي يقولي أنا عاوز استلف 100 ألف جنيه، أولا اللي عاوز يستلف عمره ما بيبعت لحد ميعرفوش هيبعت لحد من أهله، وفي حدود في الطلب والسلف".
واستطرد الإعلامي شريف مدكور: "أنا شخص صريح في ناس قالوا عني أني قليل الأدب بس دي فلوسي وأنا بشقى فيها، يعني إيه أسلف حد بيقولي محتاج 6000 جنيه علشان أدفع قسط الموبايل"، مضيفًا: "في ناس بتقول خسارة فيك الدعاء اللي كنا بندعيهولك، أنا مطلبتش من حد يدعيلي أنا وقت مرضي حكيت اللي حصل والناس المحترمة دعتلي بس محدش يذل حد بالدعاء".
وأكمل الإعلامي شريف مدكور: "أنا مأمور في ديني أني أدفع زكاة وأتصدق، مش مأمور أني أسلف ناس لا أعرفها معرفة شخصية، مش طبيعي اللي بيحصل".