"المخرج يطلعنا بنطير هو حر".. مها نصار تدافع عن مسلسل "الملك" بعد إيقافه

دافعت الفنانة مها نصار، عن مسلسل "الملك" بعد الانتقادات التي تعرض لها وأدت إلى إعلان الشركة المتحدة للخدمات الإعلامية، وقف العمل وتشكيل لجنة عاجلة من مجموعة من المتخصصين في التاريخ والآثار وعلوم الاجتماع، لمشاهدة المسلسل ومراجعة السيناريو كاملا وإبداء الرأي بموضوعية ومهنية حتى لو ترتب على ذلك عدم عرضه في رمضان 2021.
"نصار" كتبت عبر حسابها بموقع "فيسبوك": "كلام الناس فوق راسي من فوق سواء بالسلب أو بالإيجاب، حقك تقول اللي أنت عايزه بس علشان أحترم كلامك لازم تكون بتتكلم صح وعن وعي ودا مبيتحققش غير بعد المشاهدة الجيدة للعمل".
أضافت: "أنا حابة أوضح حاجة صغيرة، إحنا بنعمل عمل درامي، مستوحى من التاريخ وليس فيلم وثائقي عن (الملك أحمس)، وإلا كنا هنعمل اللي في التاريخ بالظبط إن (الملك أحمس) اتجوز أخته لأن في العصر ده كان جواز الأخوات عادي، لكن إحنا بنعمل رواية اسمها (كفاح طيبة) للأديب العالمي نجيب محفوظ، اللي قرأ الرواية هيفهم كلامي كويس".
تابعت: "الأديب كان ليه رؤية مختلفة من خياله، ودكتور زاهي حواس في كلام سابق لما قرأ الرواية قال إنها مستوحاة من التاريخ وليست التاريخ.. فأنا مستغربة جدا لكلام دكتور زاهي حواس دلوقتي".
استكملت: "مدام المخرج بيعمل رواية من خيال الكاتب ومستوحاة من التاريخ ودا طبعا مكتوب على المسلسل فمن حقه يبدع، ليه نحصر الفن في دايرة ضيقة ونلف فيها، كلنا التزمنا بالرواية ودا بيحصل في العالم كله، ومش جديد أنه يضيف شخصية جديدة، يغير شكل الممثلين، يموت شخصية، يطلعنا بنطير هو حر، ولو كنا صبرنا كنا هنلاقي الكلام ده على التتر".
واصلت: "الفن للمتعة والحكم دايما بيبقى فيه للجمهور اللي إحنا بتشتغل علشانه، وإحنا جمهورنا واعي كفاية إنه يغير القناة لو حاجة معجبتهوش، وأنا بتحدى أي حد إنه بعد عرض الحلقه الأولى بس هيحصله انبهار وتشوق ومتعة وهيكمل المسلسل للآخر وهيحترم المجهود الضخم الواضح من كل صناع العمل".
اختتمت: "علشان تبقى ناقد وأحترم كلامك وأفهمه لازم تكون بتكتب كلام محترم وهادف أفهم منه فين أخطائي وأصلحها وتضيفلي شيء جديد، ودا مبيحصلش غير بعد مشاهدة العمل، وفي الحالة دي بس لازم أسمعلك لإنك هتضيفلي شيء.. أنا فخورة جدا إني اشتغلت في مسلسل الملك".
مسلسل "الملك" من بطولة عمرو يوسف، ماجد المصري، صبا مبارك، ريم مصطفى، محمد لطفي، محمد علاء، مها نصار، باسل الزارو، أمير صلاح الدين، ياسين السقا، معتز هشام، وسيناريو وحوار محمد وخالد وشيرين دياب، إخراج حسين المنباوي، وإنتاج شركة "سينرجي".
مسلسل "الملك" مأخوذ عن رواية "كفاح طيبة" حول قصة الملك أحمس وطرده للهكسوس من مصر، للأديب نجيب محفوظ.