قال "نور"، نجل الفنان هشام سليم، عدة تصريحات بشأن عبوره الجنسي من "نورا" إلى "نور"، في أول ظهور له، إذ تطرق للحديث عن العديد من التفاصيل المتعلقة بقصته، في لقاء "أونلاين"، مع برنامج "جعفر توك"، مع الإعلامي جعفر عبد الكريم. ويستعرض "مصراوي" أبرز 17 تصريحًا ل نور هشام سليم: - "أنا مكنتش شايف مستقبل لنفسي لا جواز ولا شغل ولا أي حاجة، بس اتعلمت أحب نفسي وأعمل اللي عليا، ومكنتش عايز أقول لوالدي ووالدتي أي حاجة غير لما أكون أنا عارف أنا عايز إيه". - "أوصف نفسي بإني عابر جنسي وأنا مش هنا عشان أقنع حد بإن اللي بعمله ده صح أو غلط". - "أنا أتولدت وحاسس إن في حاجة غلط وده موضوع يرجع للدكاترة". - "أقول لأي حد بينتقدني إني بنى آدم زي زيك وحابب أعيش حياة كويسة". - "لو في حد بيعتبر اللي أنا فيه مرض فياريت نفهمه ونحس بيه ويساعدوا اللي زيي يعيش حياة أفضل مش ننبذهم". - "لو مكنتش عملت كدة كان زماني انتحرت وبابا بيدفني". - "أنا لسه بتقبل نفسي وبحاول أفهمها، أنا كنت نورا وبنت وكل حاجة إنما كانت كل تصرفاتي ولد". - "الحمد الله المرحلة الصعبة عدت وأنا كويس دلوقتي". - "وقفت قدام باب أوضة بابا 18 مرة عشان أبلغه بقراري، وكنت بخاف وأرجع وأبقى مش قادر أقوله". - "قررت أقوله وعيطت كتير ولاقيته بيقولي أنت عايز إيه وأقدر أساعدك إزاي، وقتها ارتحت". - "كل واحد بيتربى بطريقته وبيفكر بطريقته أنا مش عايز أغير نظرة حد ليا.. أنا بحترم كل الناس وأرجو إنهم يحترموني". - "قعدت سنتين مش عارف أسوق أو اتمشى، سنتين مش عارف أكون نور أو نورا ومليش هوية". - "أهلي بيدعموني جدًا وعيلتي واقفة ورايا، وكل اللي عايزه إني أعيش حياتي والبطاقة يبقى فيها اسمي ونوعي اللي حاسس بيه". - "أنا من المحظوظين أن والدي هشام سليم وبيساعدني، لما شوفته في التليفزيون بيتكلم عني حسيت إني اتولدت لغرض ما". - "أنا مجرد بني آدم واللي شايفيني غلطان أو اللي بعمله حرام تعالى اتكلم معايا". - "أنا بني آدم كويس، بعمل خير وبحترم اللي قدامي، تعالوا اتكلموا معايا وشوفوا أنا مريت بإيه في حياتي". - "أنا مصري وهفضل مصري ومش عايز أمشي وأسيب البلد ولو حصل إن الناس كلها كرهتني يبقى أنتوا بوظتوا حياتي متكروهنيش من غير ما تعرفوني". وكشف هشام سليم عن تفاصيل ابنه العابر جنسيًّا "نور"، لأول مرة خلال استضافته ببرنامج "شيخ الحارة والجريئة" مع إيناس الدغيدي، ولاقى تصريحه دعم كبير من الفنانين والجمهور الذين أثنوا على تفهمه للأزمة.
