"صديقة نزهات الصيف".. أفران الغاز تنافس الحطب على زبائن الذرة المشوية (صور)

أكوام من الحطب يجاورها وعاء من الألومنيوم أصطفت داخله كيزان ذرة بدأت تكتسب لونًا ذهبيًا بفعل جمرات تتلظى أسفلها، في مقابلها تمامًا يقف أحدهم ليزكي النيران، يحرص على إبقائها مشتعلة، معتمدًا على قطعة من الورق المقوى يحرك بها الهواء، يمينًا ويسارًا.
ظل المشهد السابق هو الصورة النمطية لبائع الذرة المشوية، والذي لا يخلو متنزه من تواجده في ليال الصيف، بيد أن هذه الصورة لم تعد الوحيدة وبدأت في التغير مع اعتماد بعض الباعة على أفران الغاز في الشواء.
في ميدان جلال قريطم بدمنهور، بمحافظة البحيرة، يجلس عم "عادل" أمام فرن من الغاز ليبيع الذرة، بينما يقف الشاب "محمد علي" بعد أمتار قليلة منه متمسكًا بطريقته التقليدية في الشواء باستخدام الأخشاب، لتحتدم بينهما المنافسة على اجتذاب الزبائن.
يقول عادل مخلوف، 57 سنة: "شوي الذرة شغلتي الأساسية، بقالي 19 سنة فيها، اشتغلت قبلها فران بس جالي الغضروف فاضطريت أغير شغلي ومن ساعتها والذرة مصدر رزقي الأساسي".
ويكمل عم عادل: "كنا الأول بتشتغل بالخشب، بس المحافظة طلعت قرار بمنعه عشان الدخان والبيئة، ودلوقتي بنشتغلوا بالغاز، ويعتبر أنضف وأحسن عشان الذرة بيطلع نضيف بعكس شوي الخشب إللي الذرة بيلقط منه الرماد".
أما محمد زبادي 35 سنة فيقول: "بشتغل في الذرة من 27 سنة من وأنا طفل، ورثت الشغلانة عن أبويا، بأشوي ذرة في الصيف وبطاطا في الشتا، شغلي كله بالليل من بعد العصر لغاية الساعة 3 الفجر، وبنام بالنهار".
ويكمل محمد وهو حريص على البقاء قريبًا من النيران المشتعلة: "لازم أبقى جنب النار، لو بعدت آخد طسة هواء وأتعب، الشوي بالغاز أسهل، بس مش أي حد يعرف يشوي بالخشب، بيبقى أصعب وعاوز مهارة بس الطعم بيبقى أحلى والأكيل مياكلش غير منه".
وإذا كان عم عادل، والشاب محمد، يختلفان حول الطريقة الأفضل لشواء الذرة، إلا أنهما يتفقان في زيادة أسعاره وتكلفة إنتاجه عليهما سواء كان ذلك باستخدام الفحم أو الغاز.
يقول عم عادل: "لغاية وقت قريب كنا بنجيب ال100 كوز ب100 جنيه دلوقتي بقوا ب200 جنيه، وأنبوبة الغاز بتنزلنا ب75 جنيهًا، ومع ذلك مزودناش أسعارنا كتير عشان نعرف نبيع، الكوز ب3 جنيهات والكوزين الصغيرين ب5 جنيهات".
ويؤكد محمد: "اشتغلت لما كان الذرة ال100 بعشرة جنيه، دلوقتي ال100 ب180 جنيه وعليه مشال 20 جنيه يعني بيوصل ل200 جنيه غير الخشب، وبنبيع الكوز ب 3 و4 و5 جنيه حسب الحجم، بنكسب في الكوز جنيه أو جنيه ونصف".