بعد انتقاد فستان خطيبته السابقة.. أحمد العوضي ل"متابعيه":"الحريم خط أحمر"

أعرب الفنان أحمد العوضي عن استيائه من تداول صور خطوبته السابقة التي مر عليها عام ونصف، كما انتقد الذين هاجموها بسبب فستانها، حسبما أوضح عبر صفحته الشخصية بموقع التواصل الاجتماعي "فيسبوك".
وكتب "العوضي": "طيب مبدئيًا كده صور الخطوبة اللي غرقت الفيسبوك إمبارح دي من سنة ونص.. تاني حاجة أنا كنت خاطب وزي أي علاقه في الدنيا قسمة ونصيب.. ثالت حاجة أنا كنت خاطب واحدة لو قعدت أقول عملت إيه عشاني من هنا لسنين قدام مش هيكفي فهي وأهلها يفضلوا دايما على راسي".
وأضاف: "رابع حاجة كل الرجالة اللي اتكلموا في حقي كلمه حلوة أو حتى انتقدوني لشخصي على راسي.. الناس اللي احلوت بقي واتكلموا في فستان خطوبة مقفول من فوق (وكانو متخيلين إني هلبسها عباية) ونظروا علي بنت محترمة عشان يضربوا فيا أنا".
وتابع:" أنت لو كان أبوك تعب شوية علي إنه يعلمك إن الحريم خط أحمر وإنك لما تحب تضرب في راجل بيبقي منك ليه.. لو كان علمك كده كان زمانك فاهم في الأصول".
واستطرد: "انسي بقي إني ممثل والكلام ده لا أنا في الأول والآخر منكم يعني، وارد تقابلني في أي مكان أنا مش عايش في النمسا فأعمل حساب إنك خضت في سيرة ناس مني واسترجل كده وسيبك من جو حرفين هتكتبهم وقلبك ميت عشان ساعة الجد الموضوع بيختلف محروق من حاجة أسأل أنا بروح فين وتعالى قولي إنت وإنت وإنت وإنت عادي بس هتعمل فيها جريندايزر على الفيسبوك؟".
وختم كلامه:" لما تخطب يا حلو ابقي لبسها عباية في الخطوبة أو خبيها أقولك ابقي لبسها بدله عشان انت أرجل مني يا جامد.. آخر حاجة أنا سنجل فيا ريت بلاش كلام في حاجات غلط.. كل الشكر للناس اللي انتقدت كلامي ككلام إنه شرقي زيادة وكل الشكر للناس اللي شايفة إني صح.. صباح الفل عليكم وكل الاحترام لبنت أنا مشفتش منها غير كل خير واحترام.. وأنا آسف ليكي".