أحمد أمين: "الأصليين" تحدي للأفلام المُقبلة على مستوى الفكر والفن الراقي

أعرب المذيع أحمد أمين مقدم برنامج "البلاتوه" عن إعجابه بفيلم "الأصليين"، الذي يُعرض ضمن أفلام موسم عيد الفطر الجاري.
وكتب أحمد عبر صفحته الرسمية على موقع "فيسبوك"، ليشيد بالفيلم وصناعه، مؤكدا أنه سيتسبب في مشكلة كبيرة للأفلام المُقبلة، لأنه قدم تحدي على مستوى الفكر والفن الراقي.
وأضاف "خرجت عندي أسئلة كتير آخرها علامات إعجاب مش علامات تعجب.. ايه الجمال ده؟، ازاي ماجد الكدواني راح لشخصية نمطية جدا بطريقة غير تقليدية خالص..جابها منين، وازاي خالد الصاوي راح منطقة غير تقليدية خالص بالبساطة دي وهو سايب ايده، وازاي محمد ممدوح أي ظهور له بيسيب الأثر ده، وازاي كنده علوش فجأة تحولت إلى زوجة مصرية جحيم كأنها متربية في بيت فيه تسع زوجات من نفس الصنف ده، وازاي منة شلبي كان عندها مونولوجات بالحجم ده وفي نفس الوقت كنا متمسمرين في الكراسي وعايزينها ما تبطلش كلام".
وتابع "وازاي أحمد فهمي يعمل دور كضيف مالوش علاقة بشخصيته وواضح جدا حبه للتجربة مش لفهمي، لا ثواني.. ازاي هشام نزيه كان بيجيب المزيكا ويقعد قدام الفيلم واحنا بنتفرج، وساعات يروح يستخبى ورا الحدوتة منغير ما نحس بس انت طول الوقت سامع منه صوت الشخصية من أول استخدام الجمل لغاية استخدام أصوات كورة البنج بونج اللي مرتبطة بتكوين البطل".
وعن مؤلف العمل أحمد مراد ومخرجه مروان حامد، قال "ازاي عرف زي ما بيعمل روح سينما في كتاباته قدر المرة دي يعمل عمق كتاب في فيلمه، وازاي مروان حامد بيجدد وبيجرب بالثقة دي والنضج ده"، لافتا إلى أن مجهود كل فريق العمل واضح، من مهندس صوت، مصمم الجرافيك، رجال الإنتاج، مهندس الديكور.
"الأصليين" من بطولة منة شلبي، خالد الصاوي، ماجد الكدواني، محمد ممدوح وكندة علوش، وقصة وسيناريو أحمد مراد في ثاني تجربة له سينمائيا بعد فيلم "الفيل الأزرق"، وأيضا ثاني تعاون بينه وبين المخرج مروان حامد مخرج الفيلم، وإنتاج شركتي "ريد ستار" و"نيو سينشري".