بالصور.. سيدة ل''مصراوي'': بناكل عيش حاف.. وبنحرم نفسنا علشان عيالنا ياكلوا''

لم يمنعها التواجد الأمني المكثف من التعبير عن غضبها، بعد قرار وزير التموين بخفض حصة الخبز التموينية، ورفض المخابز منحها حصتها بالبطاقة الورقية، لتبدأ بالهتاف وزميلاتها من نساء الإسكندرية، أملا في أن يستمع إليهن أحد المسؤولين، للعدول على القرار.
"مصراوي" رصد هتاف السيدة "س. ت" - رفضت نشر اسمها خوفا من تعرضها لتهمة التظاهر- والتي قادت وقفة احتجاجية لعشرات النساء المتضررات من القرار، واللائي رددن هتفافات منها: "الصحافة فين.. الشعب جعان أهو"، "الشعب يريد إلغاء القرار".
وقالت السيدة الغاضبة: "مش عايزين غير لقمة العيش، لغوا التموين علينا وقولنا ماشي، ورضينا بكل حاجة، عايزين نقول للحكومة إننا محتجاين إزازة الزيت وكيس السكر، وكيس الأرز راضيين بيه رغم إنه مش نضيف، ودلوقتي مش لاقيين الزيت ولا السكر ولا الرز".
وتضيف ل "مصراوي": "أوقات بناكل عيش حاف، وأنا وجوزي بنمنع نفسنا من الأكل علشان عيالنا، بقول لجوزي كمل أكلك يقولي لأ.. قومي علشان عيالنا يكملوا ويلاقوا حاجة تشبعهم".
وتابعت: "بضطر اشتري ب 10 جنيه عيش بالسعر الحر، لأن مفيش حد عايز يصرفلي بالبطاقة، في شرع مين نقوم جعانين علشان نأكّل عيالنا، مش بنطلب غير عيشنا وتموينا، محدش عايز يصرفلي بالبطاقة، أصبر إزاي".
وقد تصاعدت حدة الاحتجاجات الشعبية بالإسكندرية، على قرار وزارة التموين بخفض كميات الخبز المسموح بصرفها من كارت "المفتش"، الذي يتيح الصرف لحاملي البطاقات الورقية من 3 آلاف إلى 500 رغيف فقط لكل مخبز، وقطع عشرات الأهالي، الطريق بمنطقة المنشية في قلب المدينة بجوار مكتب التموين الرئيسي.
كما قطع المواطنون خط السكة الحديد أمام قطار أبو قير شرقى الإسكندرية، فيما قطع آخرون خط ترام الرمل، اعتراضا على قرار وزير التموين.