أهالي البحيرة يشكون من نقص الزيت: ''أكيد مش هنقلي البطاطس بالصلصة''

أبدى عدد كبير من مواطني محافظة البحيرة شكواهم من عدم توافر بعض السلع التموينية لدى البدالين التموينيين، خاصة الزيت مما اضطرهم لصرف حصصهم التموينية دون الحصول عليه.
قالت منى .ن:" ده تالت شهر على التوالي أروح و أصرف التموين من غير زيت و المتعهد يقولي خدي حاجة تانية مكانه علشان مفيش، طيب لغاية إمتى هيفضل الحال ده والزيت في السوق غالي".
وقال راغب: " حد يفهم الناس دي إن البيوت ما ينفعش تستغنى عن الزيت بسلعة تانية، يعني هنقلي البطاطس بصلصة مثلا".
وقال "س.ع" بدال تمويني: "الناس زعلانة مننا ومفيش حاجة بإيدينا إلي بيجيلنا بنصرفه و مش بنخبي حاجة عن الناس، ما وصلناش زيت وبنقول للناس ياخدوا حاجة تانية مكانه فيه إلي بيرضى وفيه إلي بيمشي وميرضاش يصرف من غير الزيت".
وقال المهندس صبري عبد المقصود، وكيل وزارة التموين بالبحيرة: بالنسبة لمشكلة نقص الزيت التموينى تم صرف 60 ألف و 503 كرتونه حتى تاريخ 2/1/2017 وجار صرف باقي الكميات اليوم لسد العجز في بعض الأماكن.
وأوضح عبد المقصود أن أسعار المقرارات التموينية كالتالي:- السكر 7 جنيه، الزيت 10 جنيه، المكرونة 350 جرام 2.25 جنيه، صلصة 320 جرام 3.25 جنيه، الشاي 40 جرام 2.75 جنيه، مسحوق عادى واحد كجم 8.5 جنيه، مسحوق اتوماتيك واحد كجم 11.5 جنيه، فول معبأ نصف كيلو 3.5 جنيه، عدس معبأ نصف كيلو 100 جنيه.
على جانب آخر فوجيء عدد من أصحاب البطاقات التموينية بحذف بعض الأفراد المقيدين على البطاقة دون سبب معلوم، وتم صرف المخصصات التموينية بدون أنصبتهم.
قال "محسن.س":" فوجئت بحذف شقيقي من البطاقة رغم أنه موجود بالبلاد ولم يغادرها ولا أعرف السبب وراء ذلك".
وقالت "زكية .خ" " البطاقة متسجل عليها 6 أفراد النهاردة رحت أصرف عطوني 5 أفراد بس وكلنا موجودين محدش سافر و لا مات الحمد لله".
قال وكيل وزارة التموين: "فيما يتعلق بحذف بعض الأفراد من علي البطاقات التموينية بأنه يجري حاليا تنقية البيانات لمنظومة صرف السلع التموينية لضمان وصول الدعم لمستحقيه، وعلي كل صاحب بطاقة تم حذف احد أفراد بطاقته بالخطأ التوجه للمكتب التابع له ومعه صورة ضوئية من الرقم القومى الخاص بالفرد المحذوف ليتم إضافته".