نشوى مصطفى ترد على سائق ''التوك توك''

علقت الفنانة نشوى مصطفي، على تصريحات سائق التوك توك، والذي حظى باهتمام الرأي العام منذ اللحظة الاولى في ظهوره في برنامج "واحد من الناس" مع الاعلامي عمرو الليثي، قائلة :" حقه يقول آه ولكن احنا في وضع مأزوم، ولازم نقف جنب بعض شوية".
وقالت مصطفى، عبر حسابها الشخصي على موقع التواصل الاجتماعي"فيسبوك" اليوم الخميس، "تابعت زى غيرى فيديو سائق التوك توك ربنا يعينه ويفك كربه، ويعين كل محتاج ويفك ازمة كل مأزوم، لكن اسمحولى اقول كلمتين، اولاً اعترف اننا فى وضع اقتصادى كلمة صعب حتكون هينة لو قلتها، وللمعلومة الوضع صعب على كل الفئات لا استثنى منها سوى طبقة الواحد فى المائة اللي فلوسهم بره مصر، انا واحدة من الطبقة اللي تحسبهم اغنياء من التعفف، اللي بالبلدى شغلهم بالارزاق، وشغل جوزى الحمد لله موصلنا لحد الكفاف، حد الكفاف اللي معاه كنت مضطرة انى استغنى فى بيتى عن حاجات تتصنف ضرورة ملحة، ومش شايفه ده بطولة منى، انا اتربيت كده، امى الست البسيطة اللي مش متعلمة علمتنى كده، انى وانا معايا اشكر ربنا، وانا ماعنديش اشكره اكتر وادبر امورى، وابويا علمنى ان الرجولة انى استحمل الصعب فى الشدة ومااقولش آه ".
وأضافت قائلة :" نرجع لاخونا سواق التوك توك، حقه انه يقول آه ويصرخ من قلبه لان الوضع صعب وادينا بنحارب ، بس واجب نفهمه اننا فى وضع مأزوم، وليه اسباب كتير اهمها أننا ورثنا من اهالينا بلد خربانه فقيرة مسروقه لصالح طبقة حصل عليها ثورة، وحد يفهمه ان منظومة التعليم والصحه محتاجة مدى زمنى كبير ومحتاجة فلوس كتير ومحتاج ضمير، حد يفهمه اننا فى الحرب وان مصر زمان كانت بتحارب اسرائيل دلوقتى بتتحارب من اكتر من دولة لصالح اسرائيل الكبرى، حد يفهمه انه يحمد ربه انه شغال على توك توك بيمشى فى شوارع فيها بيوت مش اطلال بيوت صواريخ العدو والحبيب بتدمر فيها، شوارع فيها ناس مش جثث مش لاقيه اللي يدفنها، حد يفهمه ان احنا فى وقت الشدة الصعب ويفكره ان اهالينا فى الوقت الاصعب كانوا رجالة ووقفوا وقفة رجالة، المصريين فى الشدة ياكلوا نص بطن ومايضحوش بوطنهم، نقف جنب بعض شوية ومانفتحش جبهات تضعفنا ومعلش هانت ان شاء الله، وفى الاخر حلال على قنوات العدو الفضائية الفيديو الهدية ده اللى شغال عرض مستمر، يالا خليهم ياكلوا عيش".