رف السينما - إزاى الأوسكار بيشتغل؟ وتوقعات السنة دي

جوائز الأكاديمية لعلوم وفنون السينما (المعروفة إعلامياً بالأوسكار) هي الحدث السينمائي السنوي الأكثر إثارة للجدل، وده بسبب طبيعتها الإعلامية واشتراك الأفلام الأمريكية المعروفة فيها، مقارنة بالمهرجانات الدولية اللى لا يمكن لحد إنه ينكر أهميتها، لكنها مش على نفس القدر من الشعبية ودرجة متابعة الجمهور غير المتخصص ليها.
وكل سنة في ناس بتتعامل مع جايزة الأوسكار وكأنها صادرة عن جهة صاحبة قرار موحد، أو هيئة بسيطة وواضحة بتختار أنهى فيلم يكسب وليه، كأنها لجنة تحكيم مثلاً.. فبنلاقى الاتهامات الدائمة بالتحيز لنوع خاص من الأفلام أو قضايا وأفكار محددة، أو للممثلين اللي بيقوموا بأدوار معينة .. الخ ..
والسؤال البسيط اللي لازم يتسأل قبل أى تصور مسبق عن الجايزة ونزاهتها، هو: مين اللي بيختار الفائز بالأوسكار أصلاً؟ وإزاى؟
اللي بيختار الفائزين بجوايز الأوسكار ببساطة هما أعضاء أكاديمية علوم وفنون السينما كلهم، ودول يقدروا بحوالي 6000 شخص وشوية .. مش لجنة منهم أو أشخاص معروفين، ويقدر حجم المصوتين فعلياً من مجموع الأعضاء بحوالى 80% .. يعنى معظمهم بيشترك.
.. نبدأ بالترشيحات .. عشان الفيلم يتأهل لازم يكون تم عرضه خلال سنة الترشيح تجارياً فى سينمات لوس أنجيليس فى كاليفورنيا، ما عدا فئة الفيلم الناطق بلغة أجنبية.
وبعدين أعضاء كل شعبة بيقوموا باختيار داخلي للمرشحين بحيث يختار المؤلفين ترشيحات فئة السيناريو، والمصورين فئة التصوير .. لحد ما نوصل للقوايم النهائية للترشيحات، باستثناء فئات الرسوم المتحركة والفيلم الناطق بلغة أجنبية اللي بيدخل فى اختيارهم شعب متعددة، وبالتالى عدد الأصوات اللي محتاجها الفيلم للترشح لجايزة مختلف من شعبة لأخرى، فمثلاً شعبة زي المونتاج عدد أعضائها محدود، مقارنة بشعبة التمثيل اللي هي أكبر فئة وبتحتوى على حوالى 1200 عضو.. وفى حالة أفضل فيلم كل الشعب من حقها تساهم فى إختيار المرشحين.
بالنسبة للجوايز بقى، الاستمارة النهائية بمرشحين جميع الفئات بتتوزع على الأعضاء الفاعلين ورقياً أو على الإنترنت بحسابات سرية، ويحق لجميع الأعضاء التصويت في جميع الفئات، وفى كل الجوايز الموضوع بيبقى سهل.. الحائز على أكبر عدد من الأصوات في كل فئة هو اللي بيكسب.
.. ما عدا فئة أفضل فيلم .. هنا بقى بيتم إختيار الفايز بطريقة أصعب شوية لضمان إن معظم المصوتين يكونوا راضيين عنه، فاللي بيحصل هو إن المصوت بيرتب الأفلام اللي عايزها تكسب من 1 ل 8 (حسب عدد الأفلام المرشحة) .. وخلال الفرز بيتحط ترتيب الأصوات اللى خدها كل فيلم، ويشوفوا أقل فيلم خد أصوات كرقم (1) وماعندوش فرصة في الفوز وياخدوا أصواته يشوفوا الناس رتبت مين رقم (2) في الاستمارة وتتوزع على الباقيين، وبعدين ياخدوا الفيلم اللى بعده .. وهكذا .. لحد ما يتبقى في النهاية فيلمين واخدين كل الأصوات بحسب أولوية ترتيبهم في كل استمارة، والأعلى هو الفايز.. ده معناه إن صوتك مش هيروح حتى لو الفيلم اللي انت اخترته رقم (1) ماكسبش، وهيتنقل صوتك للفيلم اللى انت شايفه الأفضل من بين المتنافسين.
كل ما سبق لا يمنع وجود توقعات للأفلام اللى هتفوز، مش عن طريق افتراض المحاباة في الجهة المانحة، لكن عن طريق (التعاطف)، اللي يبدو كأنه المحرك الأكبر لكتير من أعضاء الأكاديمية .. وده دايماً بيخلي الفرص أعلى للأفلام ذات الصبغة القومية أو المناهضة للتمييز العنصري على أساس العرق أو اللون أو الميول الجنسية، وبرضه بيخلى الفرص أعلى للممثلين القائمين بالأدوار دى، أو للممثلين الكبار العائدين للساحة بعد غياب .. عامة، كل ما قدر الفيلم إنه يصنع دعاية في أوساط المهتمين بصناعة السينما وياخد جوايز فى مهرجانات مختلفة، أو يكون مثير للتعاطف أو الاهتمام الشعبي أو يناسب فكرة الأعضاء عن الفيلم (ذو القيمة)، كل ما زادت فرصه على منافسيه ..
وفيما يلى توقعاتى الشخصية لبعض الجوايز السنة دى، مش بناء على رغبتى فى فوز الفيلم من عدمه، لكن بناء على تخمين الفيلم الأقرب للفوز فعلياً بنفس المعايير دى:
أفضل ممثل رئيسى: (مايكل كيتون) عن Birdman.
أفضل ممثلة رئيسية: (جوليان مور) عن فيلم Still Alice.
أفضل ممثل مساعد: (جى كى سيمونز) عن Whiplash.
أفضل ممثلة مساعدة: (باتريشا آركيت) عن Boyhood.
أفضل تصوير سينمائي: Birdman.
أفضل خدع سينمائية: Dawn of the planet of the apes
أفضل مونتاج: هنا المرشحين متقاربين فى الفرص، يتصدرهم Boyhood و American Sniper
أفضل ميكساج: American Sniper
أفضل ديكور وإخراج فني: The grand Budapest hotel
أفضل أزياء: Into the Woods
أفضل ماكياج وتصفيف شعر: Foxcatcher.
أفضل موسيقى: Interstellar
أفضل أغنية: Everything is awesome من فيلم The Lego movie
أفضل فيلم رسوم متحركة: How to train your dragon 2
أفضل فيلم وثائقى طويل: Citizenfour
أفضل فيلم ناطق بلغة أجنبية: Leviathan
أفضل سيناريو أصلى: Birdman
أفضل سيناريو مأخوذ عن أصل سابق: Whiplash فى منافسة مع The Imitation game
أفضل إخراج: من أعلى الجوايز فى المنافسة، وأتوقع إنها تروح ل (ريتشارد لينكليتر) عن فيلمه (Boyhood).
أفضل فيلم: منافسة محتدمة بين (Birdman) و (Boyhood)، وأعتقد إنها برضه هتروح لفيلم (Boyhood).
.. حفل الأوسكار هيتذاع يوم الأحد بالليل والجوايز بتبقى متأخر (فجر يوم الإثنين) بتوقيت مصر، خدوا أجازة م الشغل عشان تسهروا، ومشاهدة ممتعة..