هجوم من مرتضى منصور على المدير الفنى للزمالك بعد الفوز الهزيل على الاوليمبى

شن مرتضى منصور رئيس نادي الزمالك هجوماً حاداً على محمد حلمي المدير الفني للفريق بعد الفوز الهزيل على الأوليمبي بثنائية نظيفة في دور ال 32 بكأس مصر والخسارة أمام الإنتاج الحربي في الدوري بهدفين مقابل هدف.
وقال "منصور" في تصريحات لقناة "دريم" : "انا من حقي كمجلس إدارة أجتمع وأقيم وأقول الحتة دي في المية دي تغرقك لو نزلت فيها تغرق عشان غويطة ويقولي حاضر مش هنزل فيها ، وينزل ويغرق وانا اشدك".
وواصل رئيس الزمالك تصريحاته : "بعد فترة تانية اقولك الحفرة دي لو نزلت فيها هتقع مش هتطلع ، تقولي ياراجل هو انا صغير تروح واقع فيها تاني يبقى انت راجل مبتسمعش الكلام ده انت راجل عندي ومغرور ومحدش يسألني تفسيرات اللي بقوله".
وأضاف "منصور" : "انا عايز أسأل سؤال لما الاخوة في الأهلى ال 3 فتحي وحجازي والسعيد رجعوا مصابين ولا مرهقين ، لا رجعوا مصابين ، انا رجالتي الثلاثة مش مصابين ، طارق بيه حامد مش مصاب على باشا جبر مش مصاب ، الخديوي أيمن حفني مش مصاب ، حضرتك مريحهم ليه في ماتش مهم واتقالك قبليها دول مش جاين من الجبهة وسيناء بيحاربوا".
وأكمل رئيس الزمالك : "الأهلى اداك هدية ضيع نقطتين ، لا وانا اقوله وانا هضيع 3 يا باشا ليه ؟ عشان العند ولما يكون عندي لاعب ممتاز جاب جول ومكمل واطلعه بره وأحط لاعب بقاله بره 7 أشهر عن التشكيلة ، مش من حقي بقى أحاسب ؟ ، عملها في ماتش المصري استبعد كوفي وحفني وكان ماتش الدوري وبعتهملك يا باشا لغاية عندك وملعبوش الماتش ولو كنت كسبت كان الأهلى اتعادل ماتش الاتحاد".