خالد فتوح يكتب .. حسام البدري .. يستاهل الكابوس

خيرا تعمل .. شرا تلقي .. بعدما قبلت المنصب , وطلع عيني , وجبتلهم بطولة الدوري , وطلعتلهم أكثر من سبعة ناشئين مكنش حد يعرف عنهم حاجة , واصبحوا نجوم , ومطمع للفرق الاخري.
وبقوة لاتتعدي ربع القوة الفعلية للفريق بسبب الاصابات التي وصلت في بعض الاحيان الي 11 لاعبا مصابا من الاساسيين , وانخفاض مستوي معظم اللاعبين , وارتفاع أعمار نجوم الفريق احمد حسن , ومحمد ابو تريكه , ووائل جمعه , واحمد حسن , ومحمد بركات الذي لايلعب في الموسم أكثر من ربع المباريات والباقي في حجرة طبيب الفريق ايهاب علي .. اما استشارة من آلام الحوض المتكرر , أو تنفيذ برنامج علاجي.
ولما يرجع حلني لو كمل ثلاثة مباريات أو أربعة ورااا بعض .. ومجلس الادارة ودن من طين وودن من عجين ,, وعد بصفقات سوبر , لا جاب سوبر ولا كليوباترا , ولاحتي حجر شيشه من قهوة بلدي .. ولما تمخض .. ولد فرانسيس.
ياااااادي النيلة ,, ااايه اللي انا عملته في نفسي ده ؟؟؟ كنت فاكر ان مجلس الادارة هيقدرني ويسندني بعد ماجبتلهم بطولة الدوري لكن الواضح اني هاكون كبش فدا .. اصحي يابدري .. فووووق .. ماتصغرش نفسك مع ناس كانت قطة مع جوزيه , وأسد عليا .. لازم تاخد موقف يابدري .. انت مطلوب مدير فني في أندية كتيرة محترمة وممكن تجيبلك لبن العصفور بس انت تشاور ,, أي نعم الاهلي مالوش مثيل , ونعيم مابعده نعيم .. لكن في وقت لازم تكون أكبر من كده.
استحملت كتير قوي لحد مابقيت الرجل الاول في الجهاز الفني , وجبت بطولة في الوقت اللي جوزيه هرب من الفريق بحجة تدريب منتخب انجولا , لما حس ان الفريق راجع لي وراااا .. , وأنهيت البطولة بهزيمة واحدة .. مش ثلاثة ذي جوزيه الموسم الماضي .. وخد البطولة بالعافية بعد مباراة فاصلة مع الاسماعيلي .
وانا شيلت الشيلة بكل مساوئها وعيوبها وعملت من الفسيخ بطولة شربات ,, أيه يعني اتغلبت ماتشين في افريقيا , والماتش الاخير أمام الاتحاد الليبي اللي اتغلبته صفر \ 2 ان شاء الله هطلع عنيهم الماتش القادم وبعون الله هكون في دوري المجموعات .. وأيه يعني عملت اعلان لشركة الاتصالات ؟؟ هم مش عايزين يرحموا ولا يسيبوا رحمة ربنا تنزل ؟؟ طب ما جوزيه كان بيلبس ملابس غير اللي النادي متعاقد معاها.
ولا الكعكة في ايد البدري عجبه ؟؟ ده يادوووب اعلان بمليون جنيه فقط .. .. لكن ياواد يابدري أنا شامم ريحة غدر . عايزيين يجيبوا مدرب اجنبي .. مايجيبوا .. أنا عملت ايه لكل ده ؟؟ .. جبت البطولة قبل نهايتها بثلاث جولات .. سبحان الله .. هتضايق نفسك ليه يابدري ؟؟؟ سيبهالهم مخضرة .. وعسي ان تكرهوا شيئا وهو خير لكم .. خير اللهم اجعله خير حلم ده وللا كابوس يابدري ؟؟؟