علاء عزت: عملت 47 فيلم قصير ونفسي أمثل قدام محمود عبد العزيز..!

مدام إسعاد يونس من أكتر الناس اللي بتشجع المواهب
شاب موهوب، دمه خفيف، بيحب شغله قوي، كاتب ومخرج وممثل، قدم حوالي 47 فيلم قصير، في السطور اللي جاية هنتعرف أكتر على علاء عزت ومشواره في التمثيل والأفلام القصيرة .
بدأت إزاي مجال التمثيل ؟
الموضوع جه بالصدفة.. أنا أصلاً كان نفسي أبقى لاعب كورة، بس في 3 إعدادي جالي واحد صاحبي قالي إنه بيمثل في مسرح المدرسة وأخدني معاه، وما كنتش مصدقه في الأول أصلاً.. بس رحنا، وكان المخرج عصبي جداً زعقله وزعقلي، وقالي أُدخل اقرأ، قولتله أنا مش ممثل، قالي مش مشكلة، ودي كانت البداية .
إنت درست تمثيل ولا إخراج ؟
أنا أصلاً خريج تجارة، وبعد كده درست في أكاديمية فنون وتكنولوجيا السينما قسم التمثيل، وبعدها في ورشة استوديو نيويورك اللي في القاهرة، وقدمت فترة في آداب عين شمس قسم دراما ونقد، بس أجلت الفترة اللي فاتت لارتباطي بكذا فيلم منهم مركب ورق .
صحيح إنك عملت 47 فيلم قصير ؟
آه أنا فعلاً عملت 47 فيلم، بس كان فيهم حوالي 15 أثناء دراستي والباقي بعدها، منهم "قلبين وسما" مع ميار الغيطي، إخراج مينا سليم، و"ألبوم صور" مع إيمان أيوب، إخراج نورهان متولي، وفيلم "شوية دم" مع الفنان سامي العدل .
هل شاركت بيهم في أي مهرجانات ؟
فيه أفلام شاركت بيها في مهرجانات، وأخذت الحمد لله أحسن ممثل في مهرجان الساقية عن فيلم "الأسطى عزرائيل"، والمهرجان القومي للسينما شاركت فيه بفيلم شوية دم .
بس مش شايف إن اهتمامك أكتر بالأفلام القصيرة فيه ظلم ليك، لأن مفيش متابعة ليها باستمرار ؟
الأفلام القصيرة برغم إن عدد مشاهديها قليل.. لكن بظهور الأفلام المحترمة اللي بتناقش قضايا جريئة ما تقدرش السينما تناقشها لارتباطها أكثر بشباك التذاكر، الناس بقت تهتم أكثر، وبقابل كثير شافوا أفلامي دي ومتأثرين بيها جداً الحمد لله .
والحمد لله في ناس كثير وقفت جنبي وبتساندني، زى إيهاب العشري.. وهو اللي اقترح إن "علي حسين" يغني أغاني فيلم مركب ورق، وأمير رمسيس، وعماد البهات، والفنان سامي العدل، وكمان مدام إسعاد يونس من أكتر الناس اللي بتشجع المواهب، وأنا كان ليا الشرف إني قابلتها مرة وهي إنسانة متواضعة جداً، وبتتابع كل المواهب باستمرار، وأنا متفائل إن أعداد الناس اللي بتتابع الأفلام القصيرة هيزيد إن شاء الله.
ما قدمتش أي عمل في التلفزيون أو السينما ؟
لا.. أنا شاركت قبل كده في مسلسل "أين ذهب الحب؟" لإبراهيم الشقنقيري، ومسلسل "بث مباشر" إخراج حسين إبراهيم، ومسلسل "لحظات حرجة"، وفيلم "سحر العشق" تأليف وإخراج رأفت الميهي، وبطولة أحمد عزمي ويسرا اللوزي، بس الفيلم متوقف الفترة دية وهنكمله قريب إن شاء الله .
قدمت أي أعمال في المسرح قبل كده ؟
آه.. عملت مسرحية إسمها "العودة"، إخراج مايكل تادرس، تأليف ناجي عبد الله، وكنت عامل دور راقص تنورة، والمفروض إنها هتتعرض على المسرح القومي بس لسه محصلش .
اشتغلت مدرب تمثيل.. هل فكرت إنك تعمل ورشة تمثيل خاصة بيك بعد كده ؟
أنا بعمل ده فعلاً بس تابع لشركات، لكن إن دي تبقى وظيفتي على طول.. لأ، أنا بعمل كورس تمثيل مرة واحدة في السنة، بس مش حابب يبقى ده شغلي باستمرار .
يعني إنت شايف نفسك ممثل في المقام الأول ؟
آه طبعاً.. التمثيل بالنسبة ليا الأهم، وبعدها مدرب تمثيل وبعدها سيناريست، لإني بحب الكتابة بس بكتب لنفسي، ما فكرتش أكتب سيناريوهات عموماً للناس، وبعد كده الإخراج آخر حاجة بالنسبة ليا .
نفسك تتعامل مع مين من الممثلين والمخرجين ؟
نفسي أمثل سينما قدام الفنان محمود عبد العزيز.. لأني بحبه قوي، ونفسي أتعامل مع المخرج محمد أمين، وداود عبد السيد، وشريف عرفة.. لأنهم مخرجين محترمين، وبحلم أمثل في فيلم ليهم، وبحترم قوي عقلية عمرو سلامة ونفسي أشتعل معاه .
بتجهز لفيلم الفترة دي ؟
آه خلاص قربت أخلص فيلم مركب ورق، الفيلم بيناقش قضية العبَّارة، ويارب إن شاء الله يطلع فيه الإحساس اللي كان جوه كاست الفيلم كله، وهو بطولة علاء عزت، وإيناس الليثي، وشريف فاروق، وأولفا تيتو، ومحمد ماجد، وأحمد سيف الإسلام، وأغاني الفيلم ل علي حسين، وإنتاجها شركة ميدياهات م/خالد جمال .