علاقة قوية ومتينة والي حد ما قديمة ربطت بيني وبين نضارتي ودخلنا مع بعض معارك كتيره هلخصها المعركة الأولي بدأت في تالته إعدادي لما ابتديت أحس إني مش شايفة السبوره كويس ومرورا بمحاولة إقناع نفسي أني ممكن أبقي أم نضارة ووصولاً لأول دكتور نظر اللي زعقلي عشان مش شايفة الحروف علي لوح اختبار النظر فحلفتله والله العظيم ماشيفه وماما سألته هل ممكن أكل معين يحسن نظرها زي الجزر قالها مااااااااااااااااااااافيش فاااااااااايده يا مدام كل ده كلام فارغ، طبعا جرينا من عيادته وطبعا دكتور بالشكل ده عملي نضاره ماكنتش بشوف بيها حاجة فاملبستهاش أصلا. المعركة الثانية زاد إحساسي السنة اللي بعدها أني مش شايفة السبورة ولا ترجمة الأفلام الأجنبي كويس روحت لدكتور تاني وعملت نضارة كويسة بقيت بشوف بيها كويس وبقيت طول ما أنا لبساها أحس إني متفاجأة قد كده ما كنتش شايفة كويس بدأ التصاقي بالنضارة يزيد يوماً عن يوم وبدأت ماأظهرش من غيرها مش عارفه إمتي ولا إزاي بدأت أستغرب شكلي من غيرها ويزيد إحساس اللي حوليا إني لما أشيلها بيحسوا إن فيا حاجة متغيرة وبدأت تعليقات ناس كتير تزداد سخافة مثلا لما أمشي في المطر كانوا يقولولي ركبلها مساحات وبدأوا يسموها الشوافة ويقولوا إني بأربع عيون وبدأوا الناس يميزوني بإني البت أم نضارة مثلا مدرسين الفصل أو صحابي أو أي حد مع ذلك ماكرهتش نضارتي بالعكس ابتديت أتمسك بيها أكتر وأكتر. المعركة الثالثه يوم انكسرت فيه نضارتي بسبب طفل شقي من النوع اللي اتوجدوا في حياتنا عشان يخلوها أصعب وبس كان بيهزر معايا خبطني بوكس كسرلي النضارة يومها حسيت إني في مشكلة أنا نظري مش ضعيف لدرجة إني ما شوفش خالص من غيرها بس هي بتمثلي أكتر من مجرد نضارة حسيت يومها إني فقدت حد غالي عندي رحت عملت نضارة جديدة الدكتور لقي إن نظري ابتدي يتحسن استغرب أوي وكأنه كان لازم يحصل الأسوأ ! في ناس اقترحوا أني أعمل لينسيز سألت الدكتور من باب الفضول فقالي عينيك زي الفل ممكن تتقبل الينسيز من غير مشكلة ودي حاجة ترجعلي طبعاً فرفضت بشكل قاطع؛ لأن لا يمكن حد يقلع عينه أو يمشي من غير هدومه؛ لأن النضارة بالنسبة ليا كده، عملت نضارة جديدة نفس شكل وحجم النضارة القديمة وموديلها لكن اللون اتغير بس. المعركة الرابعة لما ابتدت بعض البنات يلمحوا إن شكلي أحلي من غير النضارة والمفروض أعمل لينسيز أو عملية ليزر عشان شكلي، وكده وإن مافيش عريس بييجي لوحده بنضارة طبعاً أنا قولتلهم إن اللي يتجوز واحدة علي أساس نضارة دي تبقي مصيبة، فحبيت نضارتي أكتر وأكتر؛ لأنها مع الوقت بتدي للواحد هيبة وتحسس اللي حواليه انه دحيح أو دودة قراءة أو دكتور ودي حاجة مش سيئة خالص فزاد تمسكي بالنضارة وكأنها بتحميني من السطحيين والمغفلين . المعركة الخامسة وصلت مع نضارتي لمرحله الالتحام لأنها تقريبا لزقت في وشي ومابقتش بخلعها غير في تلات حالات لما أروح أنام أو استحمي أو أتصور صوره4 في 6 في أستوديو وبس وحالة كانت موجودة قبل كده وهي نزولي أي ماتش كوموتيه يعني اشتباك في الكاراتيه؛ لأنه كان إجباري خلعها ،وابتديت أحس إنها صديقة وفية جداً وعاصرت معايا أهم أحداث حياتي من يوم ما عملتها هي لازمتني أكثر من أي شخص في العالم لأني طول الوقت شايفة بعنيها وشايفة اللي هي بتوريهولي مش عارفة هل في يوم هاقدر أتخلص منها؟ - مع العلم أن نظري إلي حد كبير مش ضعيف للدرجة فخلعها وارد - وهل هاقدر أسيب صداقتها أو سيطرتها اللذيذة عليا مش عارفة علاقة الحب القوية اللي بيني وبينها دي نهايتها إيه؟!
