العربية دي ضعيفة ....دي حتى مافيهاش صاج ..... وبيقول لك كلها فايبر! لو جينا بصينا على عربية و لقينا إن أجزاء "الفيبر" فيها كتير هقول لك : " يا عم كده أحسن ليك .. صدقني "، بغض النظر عن إنك في مصر و نادر قوي لما تلاقي عربية مش واخدة خبطة أو حكة تملى العين!، إلا لو كانت لسه واقفة في معرضها وما إتباعتش!.. وعشان تصدقني تعالى نشوف إيه حكاية "الفيبر" دي: " الناس كانوا زمان مهتمين قوي ب "الصاج" ويقول لك دي عربية ناشفة، لو دخلت في سور هتعدي الناحية التانية!، عشان كده كان بيعمل لها محرك كبير، ونظام تعليق ضخم، يقدر يحرك الوزن ده كله، و استلم عندك : تلوث ماشي و استهلاك وقود عالي .. شغال .. و لو حصل حادث – لا قدر الله - يبقى أكيد فيها دم!! وغير كده العربية برده لسه مش بالأداء المبهر اللي ممكن يطلع من محرك زى ده!، وكان الحل إننا نفكر إزاي نخفف وزن العربية، في نفس الوقت اللي نحافظ فيه على الركاب. تخيل معايا كده إنك ماسك "قضيب" حديد من آخره، وبتضرب على حرفه ب "الشاكوش" إيه اللي هيحصل لإيدك؟!! ، الوقتي بقى هات قلم جاف، بس يكون "فايبر" و يكون نفس طول "القضيب" الحديد، تمام؟.. اضرب بقى على آخره .. هه .. حسيت بحاجة؟.. لا طبعاً على الرغم من إنه هيتكسر ! هى دي بالظبط نفس الفكرة اللي تم تطبيقها لتخفيف الوزن، وفى نفس الوقت حماية الراكب، يعني تلاقي "الصاج" و "الفيبر" اتكسروا، بس "الكابينة" ما اتأثرتش بالخبطة. وقد بدأ بالفعل تطبيق النظام ده مع بداية القرن الحالي، زي عربيات "المرسيدس S-CLASS "، كل العربية "فيبر" ماعدا "غطاء المحرك" و "الشنطة" و "غطاء خزان الوقود"، أما السقف فمكون من شرائح من "الفيبر" و "الألمونيوم". مش بس كده ..ده فيه كمان تطوير في أساليب الأمان، زمان مثلاً، كانت قواعد المحرك ذات صلابة عالية، وتحمل للصدمات، لكن الوقتي غيروا الفكرة خالص، فأصبحت القواعد الأمامية للمحرك ذات صلابة عالية وتحمل للصدمات، أما القواعد الخلفية فقابلة للكسر في حالة سرعة الاصطدام العالية، بحيث يسقط المحرك على الأرض، وتصعد عليه العربة، وتنتقل قوة الصدمة إلى بطن العربة، وبذلك تكون أسفل كابينة الركاب. بالإضافة إلى أكياس الهواء، فهى إما أمامية أو ستائر جانبية، فالأمامية تعمل على امتصاص صدمة الراكب، ولكنها ليست بالليونة المتخيلة، وعلى الرغم من أنها أشبه بضربة قوية في الوجه، إلا أنها بالتأكيد ليست بقوة الصدمة العادية، وعلى الأقل فهى تحمي من الوفاة. أما الستائر الجانبية، فتعمل على حماية الرأس من الاصطدام بجسم السيارة، وعدم وصول أجزاء الزجاج المتناثرة إلى الراكب. وأهم حاجة : "أحزمة الأمان"، اللي بتعمل على حماية الراكب من الاصطدام، بالزجاج الأمامي في حالة الفرملة الفجائية. و في الآخر أحب أقول لكم إن شاء الله سبحانه وتعالى ما حدش يحتاج يجرب كل أنظمة الأمان دي اللي ما ينفعش نعتبرها كماليات من هنا ورايح. نصائح الكاوتشات R14-195/6 • الجملة دي معناها إن "الجنط" قطره 14 بوصة، و عرضه 195 مم، و ارتفاع "الكاوتش" 65% من عرضه. • و لو عايز تغير قطر "الجنط" يبقى لازم تقلل ارتفاع "الكاوتش"، ونفس الفكرة لو عايز تزود عرض "الكاوتش"، مع العلم إن عرض "الجنط" لا يتغير، يعني ممكن تغير عرض "الكاوتش" ويفضل "الجنط" زي ما هو. •في الصيف لازم يكون ضغط الهواء داخل "الكاوتش" أقل من الشتاء، نتيجة لارتفاع درجة حرارة الأسفلت اللي بيخلي الهواء يتمدد داخل "الكاوتش". •ما ينفعش تستخدم "الكاوتش" لحد ما تتآكل الطبقة الأولى منه، و يلزم تغيير "الكاوتش" كل 70 :80 ألف كيلو متراً. •في حالة و هتركن عربيتك فترة طويلة،يبقى لازم ترفع العربية، وما تفضلش واقفة على "الكاوتشات"، و لو حصل و فضلت واقفة عليهم، يبقى لازم تغير "الكاوتشات" قبل ما تمشي بيها. •مهم جداً تتأكد من تاريخ صلاحية و ضمان "الكاوتش" و تكون شاريه من مكان مضمون.