آسف يا صاحبي

يا صاحبي يا اللي حكيت عذابك من حكايتك
ورضيت أكون صورتك قصاد عينك مرايتك
كَلّمها لكن قبل ده لازم تقول لي
يا صاحبي فين حقك؟ وفين راحت كرامتك؟
مابقيتش ليك مابقيتش منك فوق بقى
نكِّس علم قلبك وخلِّي جفاها رايتك
الحب ده طرفين وحبل ولو يدلدل
زي السبَت راسك تكون وتهون رجولتك
صوتك يسرسع يترفع وصراخ يجلجل
وإنت معاش م الحب ممضي قرار إحالتك
تمسك إيديه تتدفا بيه والبرد ينزل
فوق جتتك تعطس حياه تقطم رقبتك
مبشور بصل على القلب كان الدمع دمه
إزاي تضمه؟ خلاص نسِت عقبال أملتك
معزوم كمان على حفلة فيها إمام بيخطب
هتروح تصلي على اللي كان؟.. رايح جنازتك؟!!
صدّق في حق الموت على الأرواح وسيبها
القلب مابيقبلش جوز هَيجُوز في حالتك؟
ما خلاص يا صاحب العقل فكر بيه يا صاحبي
كلمها يَّلا وبعتذر علشان سألتك!