هي ....حدث بالفعل...لمحمود مصطفى

لو تتخيل..
أيّا كانت مين اللي إنت هتتجوزها
وشكل ملامحك
لما تدوب جواها، وتاخد من ملامحها
روحك تتجمّع مع روحها، (يطلع إبن)
يرجع من مدرسته ف يوم وكتابه ف إيده..
شُفت يا بابا؟! طلعت بتكذب!
إنت حكيت لي إنك في يناير
-من عشرين سنة وأكتر يعني- قُمت بثورة
آدي كتابي:
في المنهج، مكتوب إنها كانت "أحداث"
مش "أحداث" ده مكان القاصر
لو كان مجرم أو متشرّد؟!
ولاّ ف دي كمان كنت بتكذب؟!
واللي بيغلط،مابيتجابش، ولا بيتحاسب!
أنا خايف، لو مُت صغير أروح الجنة
ألاقي اللي إنت خلعته زمان!
ألاقي مبارك، جنب غنيمة السرقة
وحواليه الأعوان!
ماهو دلوقتي:
رجعوا، وحبسوا النُّشطا بحالهم
والسلفيين والإخوان!
أومال فاضل إيه م الثورة؟!
تصرخ في الواد: إطلع برّا...
يقول لك: أنا هعمل مش شايف..
كل ده, وأسأل -آخر مرّة-:
لسة ف كل مكان في الدنيا
كل الناس بيقولوا علينا
بلد الجَهَلَة،وبلد الفُقَرَا
وإحنا نرد عليهم -برضه-:
إحنا فراعنة
إلا كمان البردي بيكذب؟!
هتقول: لأ، ماتشوف أهرامه
وكل معابده...
هيقاطعك، ويقول لك: بابا..!
طب ثورتكم سابت إيه؟!