دراما العنوسة

تناولت السينما مع بدايات الصيف الحالى عرض فيلم حكاية بنتين و هو يتناول مشاكل العنوسة و ما تتعرض له البنات فى مجتمعنا للتخلص من لقب عانس
و وضع دبلة فى يدها اليمنى تمهيدا لوضعها فى اليد اليسرى ثم تظل بعد ذلك تلعن اليوم التى أقبلت فيه مفتوحة القلب و العين و برضاها على هذا المشروع
الفاشل إجتماعيا فى الوقت الحالى و طبقا لكافة معطيات الحياة التى تؤهله للفشل ألا و هو الزواج
ثم أهل علينا رمضان فإذا بالدراما التليفزيونية تشهر فى وجههنا سلاحين من العيار الثقيل , حيث إقتحمت حياتنا بمسلسلين , و غير أنى و لله الحمد لم أتابع
أى منهما , إلا أنى قد رأيت من كل منهما حلقة على الماشى ,,,, و قد جاء الإنتقاد لهذه الدراما من جانب الصحافة بأنها مبالغ فيها
فدعونى أخبركم بما يحدث فى الواقع , بما حدث بالفعل , لى شخصيا على إعتبار أنى من زمرة العوانس
سألتنى أختى يوما عما أرتبه للغد , فأجبت بلا شى
ردت ,,, كويس , عشان طانط عطيات سوف تأتى لزيارتك غدا
زيارتى أنا ؟؟؟ و من تكون طانط عطيات ؟؟؟
صاحبة المرحومة ماما ,, إنتى نسيتيها و الالا ايه ؟؟؟
أساسا أنا لا أعرفها
لأ , إنتى عارفاها , لما تشوفيها هتفتكريها
جاية تزورنى أنا ليه ؟؟؟
أصلها هتشوفك و تشوف الشقة بالمرة
هو فيه ايه ؟؟؟ مين قال إنى عايزة أأجر شقتى ؟؟
إحنا هنستغبى بقى ,,, طانط عطيات , جاية تخطبك لإبنها
مافيش حد من أصحاب ماما كان عنده أولاد مش متجوزين ,,, أنا عارفة
لأ , ماهو كان متجوز ,, و مراته ماتت
آاااه ,,, قولتيلى , خلص عليها
الأعمار بتاعت ربنا
أى نعم , بس عمرك سمعتى عن ست ماتت و سابت جوزها عايش ؟؟؟ ,,, ده سره باتع قوى
خايفة على عمرك ؟؟؟
المهم جاءت طانط عطيات و المفاجأة أنها لم تحضر بمفردها ,,, و لم يحضر معها إبنها كما كان متوقع ,, إنما حضرو معها أحفادها , ماشاء الله , ولدين و بنت ,,, حلوين
و فى غاية الشقاوة .... أنا بقى عادة عندى إذا بيزورنى أحد , و إذا يعنى ,,, و هذا نادرا ما يحدث , إستخدم الحمام بتاعى ,,, بسيبه يرجع الصالون أو
الليفينج ,,, و بهدوء أدخل أنظف الحمام و أعقمه و أجففه كويس , و أرجع أقعد مع الضيوف مرة أخرى
ممكن يكون وسواس قهرى ... ممكن يكون جنان ,,, بس عموما ده طبعى , و قد يكون عيبى ,,, و من منا خالى من العيوب
و لإن هذا الحدث لم يكن يتكرر , فلم يكن يشعر به أحد ............. إلا إن ما حدث من أحفاد طانط عطيات على مدار ساعتين هما وقت الزيارة ,, تكرر دخول
الأولاد الى الحمام 15 مرة ,,, نعم 15 مرة ,,, كل واحد من الأولاد دخل الحمام 5 مرات ,,, يعنى بحسبة بسيطة لو إستخدام الحمام يأخد 3 دقائق و تنظيفه
فى كل مرة يستغرق دقيقتين ,, أكون أنا قعدت فى الحمام خلال وقت الزيارة 75 دقيقة ,,,,, يعنى ساعة و ربع ,,,, و باقى الساعتين مابين واجب الضيافة
و إنقاذ ما يمكن إنقاذه من الفساد الذى كانو يضمرونه للشقة و لعبى و دمياتى و تحفى و مقتنياتى , حتى وصلو لحجرة النوم , البنت كسرت قلم الروج
و بوظت علبة الكريم ,, و إستخدمت أغلى بارفاناتى ............... كنت هعيط و أنا شامة ريحة الأوضة معبأة بالبرفان , ده أنا بأستعملها بالنقطة
ده غير إن طانط قامت بالواجب فى معاينة الشقة , و حجم الحجرات و عددهم , و تساءلت عن الأدوات الكهربائية المستخدمة ,, و نصحت بتجديد المتقادم و إستكمال الناقص منها
و طبعا لم يفتها أن تسأل عن كيفية إعداد الطعام , و عدد ساعات المكوث بالمطبخ ,,, ووقت الذهاب للعمل و ميعاد الرجوع ,, و المرتب و عدد مرات الذهاب للكوافير
إنتهت الزيارة بعد ما أوضحت طانط عطيات طيب الله وجهها أن شقة إبنها كانت ايجار جديد ,, و أن شقتها صغيرة لا تحتمل إبنها و أولاده خاصة عند زيارة باقى
أولادها و أحفادها , و كمان هى أصبحت سيدة مسنة لا تحتمل دوشة الأولاد و لا تقدر على خدمتهم ,,, يعنى طانط عطيات كانت جاية لسببين مهمين
و مقدمين على السبب الثالث الذى هو من المفروض أن يكون هدف الزيارة الأساسى
الأول طبعا .... معاينة الشقة
الثانى .... اختبار قوة تحملى لأحفادها الكرام البررة
الثالث ... تلاقى أى نيلة تشيل هم إبنها ,,, و الإش بقى لو كانت عانس ,,, يعنى هتعمل فيها خدمة ,, هتاخد بخاطرها هى و إبنها و أحفادها
بس بصراحة أنا أخدت بثأرى من طانط عطيات قبل ما تمشى ,,, لأنى سبتها تمشى و هى معتقدة إن كلها يومين ثلاثة بالكتير و أنا بنفسى سوف أذهب
لطلب يد إبنها الفحل المستجاب ,, و أقول لها إسمحيلى يا أم سعادة البيه أطلب منك إيديه على أن أكون خدامة تراب رجليه ,,,,,, بصراحة ماكانش هيجيلى نوم من غير ما أعمل كدة ,,, أنا بطبعى شريرة ,,, فقد عشت معها لحظات نونوة قططية و ووداعة حملية غريبة الشكل , حتى لما سألتنى بإستئساد , شايفاكى عاملة مانيكير هو إنت مش بتصلى ؟؟؟؟ فرديت عليها بصوت يشبه الهمس , و برقة أنا نفسى مش معتاداها عن نفسى و قلت لها لأ يا طانط بصلى يا حبيبتى طبعا , بس علمونى لما أكون بستقبل حد مهم زى حضرتك أكون فى كامل الأبهة و الرونق كى أنال إعجابه
بعد لما مشيت طانط , سألتنى أختى بإستنكار هو إنت موافقة تتجوزى إبن طانط عطيات ؟؟؟
إبن طانط عطيات مش محتاج عروسة , ده محتاج كاميريرا , جليسة , دادة ليه و لأولاده و لمامته طانط عطيات نفسها
أومال ايه النعومة و الرقة دى مع الست ؟؟؟؟
غاظتنى , كان لازم أعمل كدة ..... و بعدين حضرتك عايزة طانط عطيات الأرشانة دى , تخرج تقول لأصدقاء المرحومة ماما إن حكمة ما عرفت تربى بنتها , و هتقول
عندها بنت بايرة عانس و أنا كنت عايزة أجبر خاطرها آخدها للمحروس إبنى , لكن الحمد لله إنكشف سترها طلعت قليلة الأدب و عصبية ,, و عشان كدة لم تتزوج للآن ,,, و مش هتتجوز أساسا.................. خليها بقى هتفضل قاعدة كدة زى البيت الوقف ....... كنتى تحبى طانطك عطيات تقول عننا كدة ؟؟؟؟ , ثم قلت لأختى ,,, عموما مفتاح الشقة
عندك , لو تحبى تعطيه بنفسك لطانط و إبنها و أحفادها, إتفضلى ,,,
أما أنا هسافر
إما أروح المزرعة أعيش مع جدتى ,
أو عند أى حد من أولاد أخى سواء فى الكويت أو بولاندا , أو عند أولاد عمتى فى السعودية أو فرنسا , و كلها زى ما إنت عارفة بيوت ولاد أخى و أولاد عمومتى , يعنى كإنى رحت المزرعة
و ده طبعا إذا كانت مشكلة إبن طانط عطيات تهمك قوى و عايزة تحليها له
...... إنما أنا ,,,, مش ناوية على الإنتحار , أو إلقاء نفسى فى التهلكة .لألألألألألأ
أنا مؤمنة , و ربنا نهانا عن إلقاء النفس فى التهلكة , أو إيذاءها
شفتو بقى إن فى الواقع بيحصل حاجات أكثر بكتير من اللى بتمثلها الدراما