كاتب مصري ساخر، أمتعنا في شهر رمضان مع المذيع (أكرم حسني) في برنامج "أسعد الله مساءكم"، رافض للواقع وبيحاول تغييره من خلال قلمه الساخر، تجربته الكتابية نتج عنها سابقا "يوميات شاب مهزوم"، وجديده كتاب "أنا من البلد دي"، الذي يرصد حال الشعب المصري بأسلوب ساخر، ومن خلال السطور القادمة سنتعرف أكثر على الكاتب (سيد عادل) عرفنا بنفسك سيد عادل من مواليد طنطا بكالوريوس علوم حاسب وأعمل مهندس جودة امتى بدأت الكتابة؟ يعتبر ده العام التانى ليا في عالم الكتابة، بس أنا بعتبر نفسي تحت الصفر، لسه موصلتش لأي حاجه، وهفضل أكتب وأكتب لحد آخر يوم في عمري، ساعتها أكون وصلت للصفر إن شاء الله هل اتجهت للأدب الساخر عشان ليه جمهور كبير وسط الشباب؟ ولا عشان شايف إنه بيسلط الضوء على العيوب عشان نشوف لها حل؟ سؤال كويس، بس الصراحة معرفش إجابته، وأكدب عليكي لو قلت لك أنا ليه بكتب ساخر، أنا بكتب اللي عايشه واللي مصدقه غير كده مَكتبش، أما التصنيف ده فأنا بسيبه للقارئ هو اللي يقول بقي إذا كان ساخر أو فاخر، المهم إنه يصدق كل كلمة أقولها، بل انه يناقشنى فيها، اما التصنيف ده أنا ما أشغلش بالي بيه، لأني هَقول وبَقول وقُلت "انى مش أديب ولا كاتب، انا جوايا إنسان بيكتب" كلمنا عن تجربتك في برنامج أسعد الله مساءكم كانت تجربة جميلة ومفيدة جدا بالنسبة لي خصوصا إني اتعاملت مع شخصية جميلة جدا، اللي هي (أكرم حسنى) وكنت مبسوط جدا لما قال لي إنه اختارني أنا وكتاب شباب آخرين من وسط المئات، وكنت سعيد جدا بالثقة دي، وأجمل من التجربة هى إنها كانت البداية بالنسبة لي فى طريق كتابة السيناريو، وسط ورشة عمل فنية بيكتب فيها نخبة من أروع كتاب الكتابة الساخره في مصر كلمنا عن كتابك "أنا من البلد دي" "أنا من البلد دي" بعتبره بدايتي الحقيقية في الكتابة على الرغم من إنه مش أول كتاب، لكني اتعلمت من أول كتاب ليا "يوميات شاب مهزوم" واستفدت كتير جدا من النقد اللي اتوجه لي فيه، وطبقته في "أنا من البلد دي"، من أول حرف كتبته في الكتاب، وأنا كنت حريص جدا إني أقدم شئ واقعي بعيدا عن التصنع، والحمد لله ده أنا شايف إنى عملت اللي عليا فيه، والحكم بقى للقراء إن شاء الله، الغرض من الكتاب ليس التجريح أو إهانه البلد، لكن وجدت إنه حتى لو المشاكل والسلبيات مش هَتتحل، أو مش ناوية تتحل، فمن الواجب حتى إننا نذكرها ولو مش لينا، يبقى لعيالنا، ولو مش لعيالنا يبقى للتاريخ إيه إكتر الصعوبات اللي واجهتك في نشر الكتاب ولا حاجة، بالعكس أنا لقيت مساندة كبيرة جدا من "دار المصري"، ومن صاحبها (يوسف المصري) وكمان وجدت مساندة من شخصيات محترمة جدا وليها باع طويل في الكتابة الساخرة في مصر، على سبيل المثال طبعا، دكتور (محمد فتحى) طبعا، وكمان الكاتب الصحفي (إبراهيم الجارحي) والكاتب (أشرف توفيق) مين مثلك الأعلى في الكتابة الساخرة، واستفدت منه إيه أي حد كتب مقال ساخر وناقش مشكلة واقعية، بَعتبره مثلي الأعلى، لكن لنترك للراحل العظيم (محمود السعدنى) مساحه كبيره في حياتي الأدبية، اتعلمت منه كيف تكون متميز عن الأخرين، وإن لم تكتب ماهو مفيد فلتقرأ لمن هو أصدق منك شايف نفسك فين بعد 10 سنين؟ سيد عادل برده، مجرد إنسان بيقول رأيه في مجرد سطور، ينقل واقع مش مصطنع والناس مصدقاه إيه الجاي من الأعمال؟ إن شاء الله داخل مجال السيناريو بقوة، وهناك أعمال بالفعل يتم الانتهاء منها على المستوى القريب، فيلم ومسلسل وسيت كوم، ولكن تركيزي الأكثر دلوقتى إن شاء الله هو التحضير للكتاب التالت اللي أتوقع له يكون نقلة كبيرة في حياتي إن شاء الله
