من كام سنة

من كام سنة
وأنا واقفة هنا
كنت بضفاير
كنت بجونلة قصيرة
والقلب طاير
بين المرح ولا الفرح
يسدل ستاير
لكن السنة دي
كبرت أنا
وبقيت أفكر
وأكتشف كل الضماير
ماهو لما كنت أنا هنا
واقفة كده من كام سنة
كنت باغني للطفولة
جناحاتي طايرة
وأنا عصفورة
بين الجناين
أرقص تمطر السما
ينابيع سلام
شعر وغنا
وأبكي
أبَكِي أوراق الندي
بين الزهور
ويزعل مني
أيلول الشتا
ويصبح مكسور
دلوقتي باكبر وأستخبى
جوا كلامي
وقلبي خبى
كل المشاعر
ماهو لما بافرح باترسم
وأنده على نفسي
وأبوح لمرايا
ترد فيها الروح
ولما باحزن باتقسم
وباخبي نفسي بين الكفوف
وأقول لدمعي
إياك تبوح
شفتوا بقى
إزاي بنفرح لما كنا صغيرين؟
وإزاي بنفرح لما نكبر
حتى لو جوانا أنين
ماهو أصل قلبي
حبايبه هيزعلوا
لو شافوا حزنه
وألا دموعه بينزلوا
وكفاية إني أكون أنا
وأكبر سنة ورا سنة
راضية بحياتي وإيماني بيه
ما أنا كلي منه وكلي ليه
أنا كلي لمين؟
غير لرب العالمين