عمال سكة حديد المنصورة يسردون ل 25 يناير أسباب اضرابهم عن العمل

التقت جريدة " 25 يناير " الالكترونية مع عمال محطة السكة الحديد بالمنصورة بعد إضرابهم أمس وتقابل محرر الجريدة صالح شيحة مع أحد المسؤولين الذي رفض ذكر أسمه والذي قال أنه لن ينصلح حال هيئة السكة الحديد إلا بعودة الهيئة كما كانت قبل 2008موضحا أن النظام البائد قد استعان بشركة أمريكية لا تعرف ما هى مشاكل المصريين ولا يهمهم تحقيق مصالح المصريين ، وقد جاء النظام البائد بهذه الشركة لتنفيذ غرض سياسى وهو بيع هيئة السكة الحديد لشركات استثمار وقد أحدثوا خلافات بين العمال والمهندسين وقسموا وميزوا بين العمال .
وأثناء تجولنا في المحطة تقابلنا مع عم محمد " كمسرى " وعندما قلنا له أننا صحافة قال : الكلام ده كله فى الفاضى محدش هيعبرنا يا بيه حسبى الله ونعم الوكيل أهو المحافظ عرف أن احنا عاملين إضراب ومتفش حتى فى وشنا ولا مفيش أى مسئول عبرنا يا بيه اسكت ..قلت له إيه مشاكلك بس : يا باشا مفيش شرطة بتطلع معانا تحمينا من البلطجية لا ده مش كده بس ده الواحد منهم تجى تقوله تذكرتك يقولك شرطة حتى بعد الثورة ومعظم التصاريح اللى بتكون معاهم مضروبة يا باشا خلينا أسكت ويا سلام على المديرين بتوعنا كأننا كلاب عمرهم ما بيحمونا وكمان يقولوا لنا لو محصلتش هتأخذ جزاءات وخصومات طب وفرلى حماية من البلطجية وضحك بسخرية وقالى يا باشا أجهزة اللاسلكى بايظة .

وأضاف عم محمد أن من الطرائف التي يتعرضون لها ان أحد الركاب قام باصطحاب جاموستين معه داخل القطار وعندما قولت له مينفعش ياعم الحاج الراجل قاله الثورة قامت وأنا هقطعلهم تذاكر ورجع تانى للكلام اللى يوجع القلب يا باشا إحنا محرومين من أبسط حقوق الإنسان إحنا ناس بنبات برة بيتنا مفيش استراحة تحسسك إنك بنى أدم وبعدين يا باشا إحنا شيلنا مبارك ولسة القيادات فى كل مصلحة زى ماهى يا باشا ده مفيش ولا قلم ولا كاربون ولا ساعة ولا صفارة ولا بدلة بتتصرف لينا البدلة اللى أنا لابسها دى أنا اللى عاملها على حسابى واللى يضايقك بعد كده المفتش لو طلع القطار وأنت مش لابس البدلة يقولك هديك جزاء ليه هو مالأول إدينى بدلة وكمان مفيش طفايات حريق ....أعمل إيه يا باشا أسرق عشان أصرف على عيالى وسألته مفيش لجنة نقابية عندكم تال بحقوقكم قالى : يا باشا ده مكنش فيه إنتخابات دول جابوا واحد مفروض علينا ونجحوه بالتزكية والقطر بالليل بيبقى ضلمة ومليان بلطجية ومفيش شبابيك ده حتى ورقة الجدول مش بتتصرف ده عشان أكتب الجدول جبت ورقة من الزبالة وبعدين إزاى فى إختلاف فى الحوافز بين السواق والكمسرى وهم نفس الدرجة تلاقى كمسرى درجة تالتة بيأخد 570 جنيه وسواق درجة تالتة بيأخد 710 جنيه هو عشان السواق ممكن يوقف القطر طب ما الكمسرى هو اللى بيجيب الإيراد .