إحنا مين ؟؟؟ .. بقلم : نظير لطفى

فى إيه بالضبط ؟ .. إحنا مين ؟ .. وبلدنا اسمها إيه ؟ .. وليه التوهان اللى إحنا فيه ؟.
إحنا مش إحنا خايفين ومرعوبين ومش مصدقين اللى إحنا فيه.
إحنا مش المصريين بتوع الزمن الجميل اللى كنا نعيشه مبسوطين نسمع ثومة وحليم وفريد ونفرح برمضان وبالعيد الصغير والكبير.
إحنا مش إحنا اللى كانت البسمة والقهقهة والدم الخفيف هى حياتنا.
إيه ياخلق ياهووو ؟ .. مالكم جرالكم إيه ؟ .. ليه بتقتلوا بعض وكل واحد مش طايق التانى .. ليه ؟ .. هو فى إيه ؟.
فين مصر وفين الأزهر والحسين ؟ .. فين ليالى الأنس والفرفشة والحب والألفة ؟ .. هو فى إيه ياناس ؟.
فين بورسعيد وجمالها وناسها وخفة دمهم ؟ .. فين الاسكندرية وكورنيش البحر الجميل ؟ .. فين ميدان التحرير وشوارع القاهرة الجميلة ؟.
فين رمضان وحلاوته ؟ .. فين الربيع والصيف ؟ .. وفين فرحتنا بنجاح ولادنا ؟ .. كل ده راح فين وعشان إيه ؟.
قمنا باللى سموها ثورة وفرحنا وقلنا الحمد لله وقالوا خلاص حتبقى الحياة حلوة وكلها عدالة وحرية وعيش وسعادة .. كلام كتير قالوه !!!.
شباب مات منهم شهداء ومنهم بلطجية وقالوا عليهم برضه شهداء مش مهم .. المهم اللى مات واللى سرق الثورة سرقها وفى الآخر طلعوا كدابين ومش مهم الشعب .. طظ فينا المهم الكرسى واللى مش عاجبه يضرب دماغه فى الحيط وضربناها لحد ما نزفت.
عمالين نسمع عن ميليشيات وعن إنقاذ وكلام مالوش طعم ولا لون.
قالوا المخلوع والفلول والخلول ويسقط حكم العسكر.
شفنا اللى عمرنا ماشفناه .. قتلوا ولادنا فى رفح وفى رمضان.
مش لاقيين بنزين ولا سولار وعايشين حياتنا طوابير بعد ماكنش فى إلا طابور العيش ايام المخلوع.
الكهرباء بقت زى الفاكهة وبقينا نفرح لما تيجى الكهربا .. ما إحنا عايشين على طول فى ضلمة.
من الآخر خربوا مصر وقعدوا على تلها وحرقوها وسابونا نسأل : إحنا مين ؟.
====================
القراء المحترمون أعذرونى لقد سطرت كلماتى بالعامية التى لا أجيدها ولكنى آثرت أن أعبر عما يجيش فى صدرى دون تنميق ودون قيود.