عصير القلم

برلمان الثورة

عايزين ايه من برلمان الثورة ؟! ..عايزينه يكون فعلا برلمان ثورة .. يحقق مطالب الثورة .. ويلبي آمال وتطلعات الناس اللي قاموا بالثورة..
عايزينه يوفر العيش علشان نعيش .. ويوفر الحرية علشان نتمتع بالعيشة.. ويوفر العدالة علشان نضمن العيش والعيشة..
عايزين نواب يعرفوا انهم خدام الشعب مش أسياده .. عايزين نواب يطاردوا الوزرا باستجواباتهم مش بطلبات خدماتهم ..
عايزين نواب يعرفوا ان الحصانة بتحميهم لمايطالبوا بحقوقنا مش لما بيسرقوا حقوقنا..!
مش عايزين نائب يقول الجماعة أولا ..ولا نائب يقول الدين آخرا..
عايزين نائب يقول مصر أولا وآخرا..
مش عايزين نواب يقولوا علي كل حاجة موافقون..وبرضه مش عاوزينهم من غير سبب يقولوا معترضون ..
عايزين برلمان يبني ويعمر..عايزين برلمان يقنن ويشرع .. عايزين برلمان وقت اللزوم يسحب الثقة من الحكومة .. عايزين برلمان يحس بالناس المظلومة .. الناس اللي عاشت 30 سنة محرومة .. وكانت فاكرة ان البلد دي مش هاتقوم لها قومه.
عايزين حاجات كتير كتير ما احنا عشنا طول عمرنا نرضي بالقليل .. !
احنا دفعنا التمن غالي .. دم زهرة شبابنا وعيون اجمل ولادنا وآن الاوان نحصد ثمرة تعبنا..
عايزين برلمان من غير تأشيرات حج وقرارات علاج ممضية علي بياض
عايزين برلمان يراقب الحكومة بجد مش برلمان يبارك خطواتها ويقنن اخطاءها
عايزين مجلس شعب بحق وحقيق مش مجلس اعيان وبهوات
عايزين نواب متفرغين يحضروا كل الجلسات ويناقشوا كل الملفات .. مش عايزين واحد نايم وواحد بيقزقز لب وواحد بيلعب فيديو جيم داخل الجلسات
عايزين نائب يعرف يناقش ويستجوب .. مش نائب كل همه بدل الجلسات ويظهر امام الكاميرات
وقتها سيكون بالفعل برلمان ثورة اسم علي مسمي.