طلعت والغازية

علي كلمات الست ام كلثوم جلس العمدة طه الحلوانى يروق باله مع كوباية الشاى التقيلة فى الدوار وسرحان بخياله مع الحان العبقرى رياض السنباطى اللى عزلته عن هم الدنيا وما فيه , فجأة يدخل عليه الغفير عويس اللى عكر صفو قعدته وهو يقول له الحقنى يا جناب العمدة البيه ابنك العمدة طلعت قالب استراحة الجبل مسخرة وقلة ادب ومقضيها كل يوم مع نرجس الغازية واعوذ بالله مقضيها خمور والذى منه يا جناب العمدة , ولما عاتبته على اللى عمله مد ايده عليا وضربنى .. يرضيك يا جناب العمدة .. العمدة طه الحلوانى جاتله صدمة من اللى سمعه وهو يضرب كف على كف من اللى سمعه وكان رده على الغفير هو مسمى نفسه العمدة كمان .. اجرى يا ولا ناديلى على اخواته هلال وضياء نروح نشوف المصيبة اللى عملها البيه اخوهم .. ولا استنى هاروح ابلغهم انا .. يدخل العمدة طه الحلوانى على هلال وضياء وعينه مش مصدقه اللى شايفاه .. هلال بيصلى امام وضياء وراه .. الدمعة هاتفر من عين العمدة بعد اللى شاف ان ربنا هدى ولاده واخوه التالت قاعد مقضيها مع الغوازى والرقاصات .
سابهم العمدة وشيع للشاويش عيسى اللى حضر فى غمضة عين اوامر لجناب العمدة اللى خده وطلع على استراحة الجبل وكل ما يقرب صوت المغنى والرقص يعلى من الإستراحة مع غضبه اللى بيزيد كل شوية لحد ما وصل لباب الإستراحة وضرب الباب برجله ويلقى ولده طلعت قاعد بالملابس الداخلية والغازية نرجس لابسة بدلة الرقص وشغالة على واحدة ونص , ومن غير ما ينطق ولا كلمة جرى العمدة والشومة فى ايده على ولده طلعت اللى نط من شباك الإستراحة بلبوص فى الجبل والغازية عمالة تلطم على وشها وتتوسل للعمدة اللى جابها من شعرها وتعيط عشان يرحمها والعمدة نازل فيها سب وشتيمة من اعمالها السودة وبلغ الشاويش عيسى ياخدها على النقطة لحد ما يشوف هايعمل ايه مع ولده طلعت اللى جابله العار ولوث شرف العمدية .
رجع العمدة للدوار والشر بيجرى فى عروقه وفى باله انه هايقابل طلعت ولكنه اكتشف انه مارجعش لحد دلوقتى .. قابل اولاده هلال وضياء اللى سألوه مالك يا حضرة العمدة .. متعصب ليه .. اخبرهم العمدة بعملة اخوهم طلعت السودة وهلال يحاول يهدى ابوه عشان الضغط والسكر مايتعبوش وضياء اللى لسه راجع من مصر فى اجازة من الجامعة الأمريكية وهو يسخن العمدة على اخوه طلعت ويقول له بصراحة يا عمدة دى مش اول مرة يعملها طلعت عشان اكتشفت الموضوع دا من فترة واما حذرته من عمايله السودة دى قالى مالكش صالح انت واياك تخبر العمدة بحاجة .. بص العمدة لضياء اللى نرفزه اكتر وقاله ازاى تسكت على حاجة زى دى .. يعنى الموضوع من زمان وانا نايم على ودنى ماعرفش حاجة .. نهارك ازرق انت وهو .. امشى من قدامى عيال مش متربية .. واحد هلاس والتانى بيكتم عليه .. وانت يا سى هلال تعرف حاجة انت كمان .. رد هلال وغلاوتك يا جناب العمدة .. قاطعه العمدة فى كلامه وقال له ماتكملش انت كداب مدام بتحلف بغلاوتى .. انا ماليش غلاوة عندكم اصلاً عشان تسيبو اخوكم بعمايله السوده دى ومحدش يعرفنى .. اقابل الناس ازاى بعد كدا .. اقولهم ايه .. اطلع نفسى من الموقف المهبب ده ازاى .. الله يخرب بيوتكم جبتولى العار .