أسرار خناقة " 6 ابريل " و " تمرد "بكاميرا رحيمة الشريف

قالت رحيمة الشريف صاحبة ورشة فنية لاحتياجات الاطفال ، انها شاهدت بعينيها و رصدت بالفيديو من بلكونة ورشتها التي تقع اعلي كافيه شانتيه بشارع علوي بمنطقة البورصة بوسط القاهرة ، الخناقة التى دارت بين احمد دومة و حمادة المصري من حركة ابريل ، و حسن شاهين المتحدث باسم تمرد ، و ابرزت رحيمة دور سيد المصري من وسط البلد و فضحه لكل هؤلاء المرتزقة ،حسب قوله ، و استطاعت رحيمة تصوير مشاهد للواقعة بالفيديو
و لنتركها تحكى ما رأته و ما صورته بالفيديو الذى تجدونه اسفل الموضوع:
" ... تعالوا احكي لكم النهاردة الفضيحة بجلاجل اللي حصلت بين حسن شاهين المتحدث الرسمي باسم تمرد و بين الواد احمد دومة و شوية عيال سرسجية من 6_ابليس تحت ورشتي ومحلي بالظبط ... طبعا انتوا عارفين ورشتي في شارع البورصة و همة ملهومش ملجأ غير هناك قاعدين ليل نهار عواطلية
المهم كانوا واقفين يحششوا في شارع هدي شعرواي و ده شهرته شارع الضرب عشان ضلمة و مفيهوش رجل ( بكسر الراء و تسكين الجيم يعنى مارة ) كتير ... متعرفش الي حصل بينهم سخنوا علي بعض و الواد شاهين ضرب محامي من بتوع 6 برميل و فرفروه
المحامي رجع بعد ساعتين علي قهوة البورصة وجايب ناس و مسكوا كل عيال 6 ابليس كلوهم علقة موت و الشارع ولع والقهاوي كلها لمت الكراسي و دخلوا شاشات العرض جوه، و جت مباحث عابدين و حسام العشماوي المعاون لمهم فى البوكس و ع القسم ... بما فيهم دومة وحمادة المصري و شاهين والمحامي و شوية العيال الباقيين ... المهم اتصالحوا و معملوش محضر لبعض
و رجعوا عالقهوة حوالي الساعة 12 بالليل وانا واقفة فوق فالبلكونة وشايفاهم بيضحكوا و بيتصوروا مع بعض والدنيا اخر حلاوة ... و طبعا قاعدين في ضيافة عصام الشريف رئيس الجبهة الوطنية للتغيير السلمي ... المهم يا معلم فجأة وبدون اي مقدمات لقيتهم بيزعقوا وبيرفعوا كراسي علي بعض و ماسكين في شعر بعض وصوتهم جايب اخر الشارع .. محدش عارف سبب الخناقة
طبعا القهوة علي بعد خطوات من مبني البورصة وواقف هناك مدرعتين بالعساكر والظباط لحماية البورصة ... اول ما سمعوا الزيطة جه ظابط الجيش ومعاه عساكر و شخطوا فيهم " مش عايزين نشوف كلب هنا " كله يروح من هنا حالا
طبعا العيال اتبخروا في دقيقة ولا بان لهم اثر .. لفوا من ورا ورجعوا اتجمعوا تاني تحت ورشتي و بدأت المناوشات بينهم بس المرة دي مع اصحاب قهواي البورصة اللي بيكروههم لله × لله وتحديدا اشهر شخصية داعمة للجيش المصري عندنا
( سيد الصعيدي ) بيكلم حسن شاهين بيقوله امشوا من هنا عشان القهوة
رد شاهين : وانت تطلع مين بقا انشالله ؟؟ سيد قاله انا وسط البلد ياض
رد شاهين : ( ك...م ) وسط البلد ودي نفسه فداهية
طبعا سيد قلع الحزام و طاح فيهم ضرب في دومة و شاهين وكله مخلاش حد
و الظباط واقفين جنب البورصة لكنهم عارفين ان سيد من مؤسسين المنطقة ومينفعش حد يتعدي عليه كدة ابدا والا هتقوم مجرزة بكل المقاييس
دومة طبعا لابس طقم شيك اوي وغالي وماسك آيباد بعدما كان بييج القهوة بالشبشب في عز الشتا و راكب عربية شيفروليه 2013 و عامل فيها نجم
وجاي يقول لسيد خلاص يا عم حقك علينا سيد رد عليهم بشخرة محترمة
وقاله ... شغل الثورجية ( الخوا جات ) ده تعملوه فالتحرير ياض هنا لأ .. انتوا اخركم تروحوا تحدفوا شوية طوب و تقبضوا المعلوم ... اوعي تعمل راجل هنا !!!
ده احنا دافنينه سوا يا ولاد الوسخة ومعروف انتوا مين و اساسكم ايه !!!
طبعا سيد طايح والشارع كله ساكت وانا واقفة بصور بالموبايل
وفى الاخر اتطردوا طردة الكلاب برة المنطقة و سيد يتوعد هم لو جم تاني هيزعلوا
... وسط البلد رجالة علي اي حد يا فانلات #6_ابليس