جمهوريتنا

يقدمها سمير الجمل

** لايبأس مع الحياة ولا حياة مع الدرديري.
** شكر خاص للي اخترع "حادي بادي"..
الراجل ده ساعدنا في اتخاذ قرارات مهمة ف حياتنا.
- مفيش طريقة تانية الواحد ممكن يبتدي بيها يومه غير إنه يصحي من النوم؟! اللي يعرف يكلمني تحت اللحاف
** ان كان حبيبك عسل.. ما تحطلوش طحينة وارحمه!
** هل تعلم ان معظم اللي عدّوا حاجات وفوّتوها عشان "المركب تمشي"
هما أكتر ناس غرقوا!
** كمية المجروحين الزيادة ع الفيس بوك هتقل جداً لو الناس ابتدت تتعلم تمسك الفيس من الناحية التلمة مش من الناحية الحامية.
** خليك إيجابي وافقد الأمل
** نوم الظالم عبادة..
بعد اذنكوا أنا داخل أتعبد شويه
خلوا بالكوا من مصر وتربسوا الباب كويس
** الخلاصة..
ربوا عيالكوا عشان ميطلعوش إخوان أو إعلاميين
** قلب المرأة زي المركب لو له ريسين يغرق أما قلب الراجل زي الميكروباص ميطلعش غير لما يحمل واركبي رابع جنب اخواتك علي الكنبة اللي ورا
محمد سعد فرغل سوهاج
أم قويق خيرها علينا
طيب قوللي تعرف من هو "كلثوم" اللي تبقي الست "أم كلثوم"والدته؟ مش هاتعرف ولا احنا.. لكن جايز تعرف "أم المطاهر" اللي قال لها عمنا صلاح جاهين رش الملح سبع مرات وعلي كل حال في هذا الموضوع نقدم لك مجموعة أمهات لا يجوز ولا يمكن الاحتفال معهن بعيد الأم وبالتالي لا ينطبق عليهن أغاني فايزة أحمد وعبدالوهاب وصباح مثل أم قويق وأم جلامبو وأم سحلول.
أم الفرفشة
في حوار م أم الفرفشة.. بدأته المذيعة بتقديم التهنئة لأم الفرفشة بمناسبة حصولها علي جائزة "الأم المثالية" صاحت المذيعة: هييه "ألف مبروك" ردت "المثالية": الله يبارك فيكم.. خدي خمسة موواه علي خدك.. وعن سر فوزها باللقب أجابت: بص بقي..أنا باحب الصراحة.. إدييها مصر تديكي طراوه..وألف من يترمي عليكي ويصورك: وبعدها البنت طلبت مني مليون دولار.. وإديتها علي طول.. قالت لي: يا امه ده انتي الأم المثالية..وثاني يوم لقيت اسمي في التليفزيون.. أمال إيه.. هو إحنا بنلعب.
أم حشيش
أم بتدخن.. والتطور الطبيعي للتدخين.. الشيشة.. وطبعا الهانم وارثه فلوس من 5 أزواج.. ماتوا وتركوا لها فلوسهم. وبعدها أدمنت الشيشة وزوجها الخامس قهوجي.. المهم تدفع له العربون.. يا معلمة.. عايز إيه ياااه! نسيان النهاردة في المعلوم.. طيب ولع الشيشةواضبط العقدة.. وبعدها اديلك.. بس المشكلة سؤال؟إيه.. هوه التطور الطبيعي للشيشة طبعاً الحشيش.
أم جلانبو
قاعدة طول النهار تتخانق مع الجيران مع الزوج مع الأولاد مع قرايبها.. مع دبان وشها.. والمشكلة لا تملك غير سلاح واحد "الشبشب" مفيش غيره.. هات ياااو.. الشبشب.. وبسرعة تنزل تاخد حقها بأي طريقة حتي ان الشبشب لزق في ايديها وعايزه تعمل زار يمكن يفك لها الشبشب من إيدها.
حوار مع ام قويق
* إنتي مين؟
- أنا البومة يا سعيد الحظ عندك مانع
* يقولون أنك طائر ليلي فكيف تعيشين وتجمعي رزقك؟
- علي فكرة أنا أطير ليلا ونهارا ولكن الليل أفضل لي لأصطاد فريسة
* يا شيخة حد يحب الليل بظلمته علي النور؟
- لو عرف السبب لبطل العجب يا بني البشر.. فأنا رؤيتي أبيض فاسود فالأشياء الملونة أراها أبيض فاسود فليس هناك فارق في كوني أصطاد ليلا أو نهارا
* أبيض في أسود!!! طيب ليه؟؟
- لأن غالبية خلايا الشبكية من النوع الأبيض في أسود والخلايا الملونة المخروطية قليلة
* عندك حق.. أنا آسف ان أسألتي كثيرة ولكن منك نتعلم.. لماذا لا تشعر فيرستك بك وأنت تنسلين إليها؟
- أنت قلت إيه!! حقيقي أول مرة تتكلم كلام مظبوط فأنا أنسل بسرعة وإنقضاض دون إحداث صوت لأن الله زودني بريش كما تري مسنن الأطراف حتي لا يحدث جناحي أي صوت أثناء الطيران.
* سبحان الله العظيم شكل غريب وكلك غرائب وعجائب.. طيب ممكن تكلميني عن نفسك أكثر؟
- أفتكر أن "رمسيس الثاني" كان يحبني كثيرا واتخذني الطائر الأول له حتي ضربته بجناحي في عينيه وكدت أن أفقأها ومن يومها صار بيني وبينه ما طرق الحداد.
* علي فكرة معظم الناس يتشائمون منك؟
- أهو كده حرام.. ألا تعلم ان التشاؤم حرام.. وهو شكلي ماله ربنا خلقني كده وربنا جعل لي دور في حفظ التوازن البيولوجي ولولا كده الفئران والقوارض والحشرات والزواحف تملأ الأرض وتقل راحتكم.
أم الخلول
وجمعها بنات الخلول "جمع قياسي" وهي نوع من فصيلة بنات الخلول "Arcidae" وهي من الرخويات ذوات المصراعين.. توجد في البحر الأبيض المتوسط والبحر الادريارتي ومعني الاسم العلمي "arca noae" فلك أو سفينة النبي نوح "عليه السلام". وهذا النوع من الصدف يسمي أم الخلول في الاسكندرية وهي أم الجلول في النسخة المطبوعة وهي خطأ مطبعي والكتاب نشر في أوروبا بعد وفاة مؤلفه ونقلها العالم فريتاغ كما هي مطبوعة أي بالجيم والصواب بالخاء المنقوطة الفوقية أي أم الخلول وهذا الاسم مشهور في مصر "هذا الكلام للفريق أمين معلوف"
أم أربعة وأربعين
هي طائفة من كثيرات الأرجل.. وقد سميت بهذين الاسم نظرا لاحتوائها علي 44 زائدة ولكنها في الواقع تحتوي علي 42 طرفا وقرنين أماميين وهي حيوان يبلغ طوله في معظم الأحيان من 10 الي 15 سنتيمترا جسمه مفلطح من أعلي الي أسفل بتركيب من رأس وجذع والرأس مغطي بدرع رأسية ويحمل زائدتين طويلتين تسميان بالزبانين. ويعد الطرفان الخلفيان أطول من باقي الأطراف حيث تستخدمهم في الامساك بفرائسها ومهاجمتهم وتنتشر أم أربعة وأربعين في جميع أنحاء العالم وخصوصا قارتي أمريكا وأستريا.. وتوجد منها العديد من الألوان والأحجام.
وتعد أم أربعة وأربعين الأنثي أما مثالية حيث انها تحتضن بيضها من أسبوعين لثلاثة أسابيع وذلك بأن تلف جسدها حولهم لحين الفقس ثم تظل تحميهم عدة أيام حتي يخرجوا للعيش بمفردهم. وتبيض الأنثي من15 الي 30 بيضة.. وتصل أم أربعة وأربعين لسن التزاوج بعد ثلاث أو أربع سنوات وتعيش عشرة سنين تقريبا.
أم الشلاتيت
وهي الكرشة الخاصة بالحيوانات التي تذبح وتؤكل وتصنف ضمن حلويات اللحوم دي طبعا يا هوانم وبرنسيسات كانت زمان مقياس مدي نضافة الست في أكلها وشطارتها لما كانوا يخطبوا زمان كانت أم العريس تشيل الكرشة وأم الشلاتيت تعرفوها أكييييد لا طبعا المهم كانت تاخد الحاجات دي وتطلب من العروسة تطبخها لها ولو نضيفة وحلوة تكسب ومبروك عليها الجوازة.
أم سحلول
إنها تلك الشخصية الفكاهية الرهيبة.. المتناقضة التي ابتدعها الأديب الراحل "طه حراز" وكتب لها مئات الحكايات والمواقف.. بل وجعلها تدخل المحاكم وتقاضي الناس.. ثم تولها الزميل الساخر الراحل عبدالله أحمد عبدالله "ميكي ماوس" استكمال مسيرة هذه الشخصية ضمن مواد صحيفة "البعكوكة" التي كانت تصدر في الأربعينيات والخمسينيات من القرن الماضي "العشرين" وهو صاحب فلسفة دعم الفكاهة قضية أمن قومي.. وتصوروا ان مجلة البعكوكة صاحبها ورئيس مجلس ادارتها ورئيس التحرير والمحررون ومدير الاعلانات ومدير التوزيع شخص واحد اسمه "عزت المفتي" ومعه المحرر الوحيد ميكي ماوس ومعهما رسام الكاريكاتير.. كانوا الثلاثة يصدرون أشهر مجلة فكاهية معارضة وكانت دار المجلة عبارة عن حجرة مكتب عزت في شقته المتواضعة.
هذه المجلة كانت تتضمن صفحة ثابتة بعنوانت "يوميات أم سحلول" وهي عبارة عن يوميات سيدة منزل وعلاقاتها بزوجها وطليقها.. وأولادها وجيرانها وزملائها في العمل.. إلي جانب الجزار والبقال والخضري والفكهاني وصاحب البيت والايجار الشهري وهي حلقات مسلسلة تصف- بأمانة- حياة أسرة متوسطة الدخل في ذلك العصر ولكن بأسلوب ضاحك.
من يومياتها
يااختي قطيعة تقطع الراديو ويوم ما سمعناه.. مش مكفيه انه بيدوشنا من كتر سماعه.. لا.. قال لازم كمان يدوخنا ويدينا مقالب.. امبارح يااختي سمعت الواد المذيع عمال يقول البطاطس ما اعرفش بكام والسبانخ بكام والطماطم بستة مليم.. قاللي عقلي والنبي دا عال.. أهو بدل ما اشتري من الحاج بسطويسي اللي طول عمره مغلواني وبيديني القوطة بثمانية مليم أروح أخذ من الاذاعة أحسن.
بس يا اختي ما طولش عليكي.. خدت ملايتي ولبست شبشبي ورحت علي محطة الاذاعة.. قلت للراجل اللي واقف علي الباب أنا عايزة طماطم وخد 12 مليم أهم.. يقوم المنيل يسخسخع من الضحك ويقولي: انتي اتجننتي يا وليه.. هنا محطة الإذاعة مش محل حضري.
شوفوا والنبي الجماعة الكدابين اللي قاعدين بس يضحكوا ع الناس ويمشوهم مشاوير.. والآخر يقولوا لهم مفيش.. ويبيعوا الطماطم من بدري لمحاسيبهم!
زكي مصطفي
حماده بيشتكي من إيه؟
"الزوجة" عادل عادل اصحي "الزوج" خير فيه ايه؟؟ عايز أنام شوية "الزوجة" قوم شوف اللي حصل وبعدين كمل نومك "الزوج" ها أنا صحيت خير بقي "الزوجة" ابنك حمادة "الزوج" اشمعنا "الزوجة" أنا مش بهزر "الزوج" طيب قولي بسرعة علشان عايز أنام "الزوجة" المدرسة بتقول انه مهذب ومحترم وكمان مش بيتخانق مع أصحابه "الزوج" يا خبر ده موضوع ما يتسكتش عليه لازم يروح للدكتور يكشف عليه هيتعامل ازاي في العصر اللي احنا فيه!! "الزوج" خلاص يلا بينا.. علي عيادة الدكتور مخلص للأمراض النفسية "الزوج" يلا.. "الزوج" عيادة الدكتور مخلص أيوه ده العنوان لو سمحتي يا آنسة عايز أحجز كشف مستعجل "الممرضة" اتفضل تقدر تدخل "الدكتور" أهلاً اتفضل خير "الزوج" ابني حمادة يا دكتور محترم ومهذب ومش بيتخانق مع أصحابه وبيساعد غيره "الدكتور" دي حالة نادرة جدا في العصر الحالي ابنكم عنده أخلاق ومسالم وشهم "الزوجة" ابني ابني طيب هو ممكن يعيش يا دكتور في العصر اللي احنا فيه؟! "الدكتور" ما تتخضيش يا مدام العلاج سهل وبسيط خليه يتفرج علي أفلام كرتون مترجمة هيتعلم العنف وكمان يتفرج علي برامج التوك شو مرتين في اليوم علشان يواكب العصر في كلامه. وكمان ممكن تعملي زي باقي الأمهات وتسيبي ابنك بالساعات أمام الأجهزة الحديثة يتابع النت بدون رقابة "الزوجة" وبعد كده ممكن يخف يا دكتور "الدكتور" أكيد وهيبقي خارج السيطرة ومواكب للعصر "الزوج" ومش مهذب "الدكتور" أكيد "الزوج" احنا متشكرين قوي يا دكتور "الدكتور" ثواني خلي حضراتكم هنا في حجرة وراجع حالا ابتسام "الممرضة" أيوه يا دكتور ابعتي لمستشفي المجانين عندي حالتين في غاية الخطورة زوج وزوجته وابعتي لحد من أقارب الولد يجي يستلمه.. يا أهلاً وسهلا حمادة بقي كان بيشتكي من ايه؟!!
غادة مصطفي