زيزو يصرخ: الحقوا الأهلي .. أين أنت يا خطيب ويا حسن حمدي من اللى بيعمله جوزيه "

وجه عبد العزيز عبد الشافي "زيزو" مدير قطاع الناشئين في النادي الأهلي انتقادات حادة للبرتغالي مانويل جوزيه المدير الفني للنادي الأهلي بعد ظهور الفريق بمستوى متواضع للغاية أمام الإسماعيلي في المباراة المؤجلة بينهما من الجولة السابعة لبطولة الدوري المصري والتى انتهت بفوز الفريق الأحمر بهدف نظيف.
قال زيزو في معرض تحليله لأداء الأهلي على قناة النهار الفضائية مع الكابتن خالد بيومي في نبرة يعلوها الأسى "هو فين الأهلي .. أنا مش شايف أهلي خالص, مش هو ده النادي الأهلي اللى أنا أعرفه, لا فكر ولا تكتيك ولا تحركات لاعيبة, هي هي نفس الأشباح اللى بتجري من سبع سنين بدون أي تطوير".
وأضاف:" فين حسن حمدي وفين الخطيب من اللى بيعمله البرتغالي مانويل جوزيه, والأهلي دلوقتي بيعتمد على فاول أو لمسة يد لإحراز الأهداف, فين الأداء الخططي وخلق الفرص والتحركات بدون كرة, مفيش أي لمسة حلوة شفتها في المباراة والكرة دي متعة, وحرام بصراحة اللى بيحصل في الأهلي والمال اللى بيتم هدره في النادي الأهلي".
وتابع :" أول مرة اتمنى الأهلي يدخل فيه هدف من كثرة شعوري بالإحراج, الإسماعيلي مسيطر تماما على المباراة, وفي المقابل 7 أو 8 لاعيبة من الأهلي بيحصلوا على إنذارات ده ناتج لوجود ضغوط سلبية على اللعيبة اللى مش قادرين يقطعوا الكرة إلا عن طريق الفاول أو عن طريق لعبة خشنة لإيقاف خطورة الخصم ودي بصراحة مش كورة.
واختتم زيزو :"محدش يزايد على حبي للنادي الأهلي, لكن لما أشوف غلط لازم اتكلم واللى بيحصل ده عيب مدير فني وإدارة فنية في المقام الاول, يا إدارة الاهلي فيه اهدار لطاقاتك, فيه عندك افضل الناشيئن في مصر وفي الآخر بيذهبوا ويتألقوا في مكان تاني, تعالوا شوفوا احمد شكري عامل ايه في التليفوتات وشوفوا شهاب لما نزل الدقائق اللى لعبهم عمل ايه, وفي الاخر جوزيه ناوي يستغنى عنهم هو وسعد سمير وكتير من الشباب الرائع اللى بيتألق في أمكان تانية بالذمة ده كلام".
واندهش زيزو من المواعيد التى يفرضها البرتغالي مانويل جوزيه المدير الفني للنادي الاهلي على تدريبات الفريق والتى حددها بالساعة التاسعة صباحا ولمدة ساعتين, صحيح الكلام ده كان بيتعمل ايام هيديكوتي بس ساعاتها كان التدريب على فترتين, لكن كون اللاعب دلوقتي يخلص تدريباته الساعة 11 صباحا وطول النهار بيعمل ايه .. طبعا ولا حاجة علشان كده لازم يبقى الاهلي بالمستوى اللى شفناه فيه كلنا قدام الاسماعيلي.
وهنا تدخل خالد بيومي المحلل الرياضي بالقناة مؤكدا أن الاسماعيلي قدم مباراة ممتعة رغم عدم وجود البديل الكفء على مقاعد البدلاء وأن الاهلي وادارته لا يتقبلون النقد.
قال بيومي :" كما أن مانويل لا يقبل هو الاخر النقد، وهو ما يعد غير مقبول نظراً لانهيار مستوي الاهلي على مدار عام كامل. واضاف ان فريق الاهلي يواجه فترة حرجة، بعد ان فشل جوزية فى عمل توليفة جديدة من اللاعبين للمنافسة، وتحصن بفريق تولى الدفاع عنه هو ومجلس الادارة والجهاز الفني".