"الكاميرا الخفية".. "فتشني فتش".. أقوى التعليقات على كلمة مبارك

فور ظهور شريط على قناة العربية يعلن عن إذاعة كلمة مسجلة للرئيس المخلوع مبارك خلال نشرة الثالثة عصرا، انفجر المصريون فى التعليقات والتوقعات الساخرة، والتنكيت... ترى ماذا سيقول الرئيس السابق فى هذا التوقيت؟.
بدأت التعليقات - التي نشرتها جريدة الشروق - على موقع فيس بوك خلال فترة الانتظار، "والله أنا خايف ليطلع يقول شعبى حبيبى دى كانت الكاميرا الخفية وأنا راجع تانى بعد إجازة استجمام فى شرم الشيخ".
فيه أكتر من حريقة.. وفى كل بيت شهيد.. فاكر أهل الدويقة؟.. فاكر قطر الصعيد؟... كلمات انتشرت على موقع فيس بوك عقب الكلمة المسجلة للرئيس المخلوع مبارك بعد أن امتزجت النبرة الساخرة بالغضب.
وكانت أكثر التعليقات الساخرة بعد إذاعة الكلمة القصيرة على موقعى (تويتر، وفيس بوك)، أن ملخص خطاب الرئيس السابق هو "فتشنى فتش"، كما كان إسماعيل ياسين يكررها فى فيلم (ابن حميدو).
على موقع تويتر ظهرت التعليقات سريعة وساخرة من كلمة الرئيس السابق: "مبارك بيقول انتوا فاكرين الثورة أثرت عليا، أبسلوتلى.. أنا اللى أثرت على الثورة وعملت لى دماغ جامدة".
وتوالت التعليقات والنكات على موقع تويتر، "شكرا على حسن تباطؤكم معنا".
"يحز فى نفسى ما ألاقيه من بنى وطنى من حقد على القصر اللى مأنتخ فيه".
"القذافى طلع على التوك توك، ومبارك طالع على العربية".
"ده أول سينجل لمبارك، وناوى يعمل ألبوم تسجيلات كامل، ويجرى التفاوض مع روتانا".
"أنا مش حرامى، انا مش خرونج، انا كينج كونج"، على غرار أغنية المطرب أبوالليف.
"أنا طاهر وهفضل طول عمرى طاهر، يا أم المطاهر رشى الملح سبع رشات".
وعلى موقع فيس بوك، دون الكثير من المشتركين على صفحاتهم نكات ساخرة عن الكلمة المسجلة.
عاجل "هالة من النور حول رأس مبارك، وشهود عيان يؤكدون خروج جناحين كأجنحة الوزة من ظهر مبارك".
الجمعة المقبلة شعارها "مبارك زى القطط ياكل وينكر".
وجاءت إحدى النكات تشبه لزمة عادل إمام فى مسرحية (شاهد ماشفش حاجة): أنا برىء يا خونا ده أنا غلبان.
"مرة شعب بيسأل رئيسه المخلوع، عندك فلوس؟، قاله ما عنديش وهو عنده جوه".
"خلاويص.. لسه، خبيت فلوسك.. لسه، خبيتهم.. خلاص، جهز يا بنى خطاب من إياهم.. وكتر الدموع".
وفى صفحة (رأيك إيه فى خطاب مبارك)، على موقع فيس بوك، كتب ميدو حسنى، يعنى ايه كوكا زيرو؟.
يعنى تفضل تسرق 30 سنه وفى الآخر تقول انا برىء.
يعنى تحطم شعبك وبلدك وفى الآخر تقول انا بخدم الوطن.
يعنى يبقى ما فيش عندك دم وتسمعنا صوتك تانى.
أما علاء حسن، فكان رأيه، إن الرئيس المخلوع "عايز يخلى الشعب يقلب على بعضه تانى بس ده مش هيحصل مهما عمل لأن اللى عملوا فى اول خطاب ليه مش ممكن يتكرر تانى واكيد ما حدش هيصدقوا".
وتعجب علاء من كلمة مبارك المسجلة، "هو بيشتغل زى اسامة بن لادن بيبعت تسجيلات، وبعدين ليه ما ظهرش بنفسه وهو بيتكلم كأنه مواطن عادى وبيدافع عن نفسه؟".
أما مجدى المهدى فوصف كلمة مبارك بأنها "مملة ومثيرة للشفقة".
ويرى مجدى أن مبارك رجل عجوز، ولكنه "لسه فاكر نفسه رئيس وبيكلم شوية الخدامين اللى حواليه، وكان المفروض يشرف مع عصابته فى السجن من شهرين، لكن هو ظبط أوراقه وبعدين طالع يتكلم".
يذكر أن الكلمة التى ألقاها الرئيس المخلوع كانت مدتها 6 دقائق، فى أول خطاب له منذ 59 يوما، عقب تنحيه عن السلطة فى الحادى عشر من فبراير الماضى.
وكان آخر خطاب ظهر فيه مبارك قبل التنحى يوم 10 فبراير الماضى، عندما أعلن تفويض مهامه إلى نائبه السابق عمر سليمان، وبالمصادفة ظهر يوم 10 أبريل فى كلمة مسجلة للدفاع عن نفسه.