د. حمزة زوبع يكتب: استعمال مرة واحدة Disposable!

زمان وأظن الموضوع دا شغال حتى الآن، لما كان حد يحب يبيع عربيته ويحصل على سعر عالي كان يكتب عليها استعمال طبيب.
لماذا؟ لأن استعمال حنين والمشاوير قليلة وكده يبقى موتور العربية لسه بحالته.
قارن الحكاية دي بما يحدث حاليا مع بعض من يظهرون على شاشة الجزيرة ليدافعوا عن الانقلاب، وتصور معي لو أن أحدهم قرر أن يبيع واحدا من هؤلاء فماذا سيكتب على ظهره؟
استعمال انقلاب؟ صح برافو هي دي الاجابة المثالية.
السؤال الثاني هو هل يشتري أحد شخصا مستعملا ومستهلكا على أيدي الانقلابيين؟ بالطبع لا؟ فلماذا تشتري الجزيرة هؤلاء إذًا!
سؤال وجيه ومنطقي وطبيعي، والإجابة أن الجزيرة كوسيلة إعلامية محترمة لا تشتري أحدا لا من اليمين ولا من الشمال، والمشتري الوحيد هو حضرتك، أيوة انت الزبون وانت من يقرر، فالجزيرة شاشة عرض وليست صالة بيع، بمعنى أنها تعرض الجميع اللي يسوى واللي ما يسواش والبركة في الزبون.
أعتقد من خلال متابعتي للقنوات الفضائية عموما أن الصنف بتاع استعمال انقلاب لا يباع إلا في قنوات الانقلاب وزبونه معروف ومسجل تحت اسم العلامة التجارية فوضني شكرا.
هذا الزبون المضحوك عليه بتاع فوضني شكرا لا يتحمل مشاهدة الجزيرة ولو لربع ساعة لأنه على الفور سيكتشف أنه انخدع وانضحك عليه وأن الصحفي أو المتحدث باسم الانقلاب طلع مضروب وما يعرفش يقول كلمتين على بعضهم في الجزيرة بس شاطر ولبلب في القنوات إياها.
السؤال المهم هو ليه المتحدث من ماركة استعمال انقلاب بيتكلم كويس في قنوات الانقلاب؟
والإجابة سهلة وواضحة ولو ركزت على الوجوه هتعرفها لوحدك.
شوف ياسيدي الحكاية إن قنوات الانقلاب شغالة بالريموت أو بالسماعة أو ما يعرف بالإير بيسear piece يعني الأخ بيبقى قاعد أدام الشاشة بس ودانه مع الرجل بتاع التوجيه المعنوي اللي في الكواليس وكل شويه يمليه يقول إيه وما يقولش ايه.
ولو حصل زي ما بيحصل كثير إن الأخ أراد إنه يتفلسف أو يخرج عن النص فجأة تلاقيه وشه اصفر واخضر وقال للمذيع معلش فيه نقطة عايز أوضحها ويبدأ يا عيني يكُر اللي يتقال له في السماعة زي البغبغان.
في مرة طلع مذيع من بتوع الانقلاب اسمه أحمد موسى وبعدين أخذته الحماسة وقعد يهاجم ويشتم في حكومة الانقلاب ودخل على خط البطالة ووقف الحال وفجأة انقطع لسانه وبحلق في الكاميرة وحط إيده على السماعة وقال: طيب احنا ح نكمل الموضوع ده بعدين بس نشوف الأول التقرير دا وبعدين.. وفجأة سكت وقال لا دا فيه حاجة مهمة النهاردة حصلت ولازم نعلق عليها وهي كلام الفريق السيسي في مرسى مطروح وبعدين ساب نفسه يتكلم من السماعة اللي في ودانه.
الحقيقة التقرير المنشور عن زيارة السيسي لمرسى مطروح ذكر فيه أن السيسي قال عن الرئيس مرسي إنه راجل طيب بس التقرير التلفزيوني اللي اتوزع ما جابش سيرة الرجل الطيب لأن التوجيه المعنوى مش عايز أي حاجة تجيب سيرة الرئيس بالخير أبدا ولو من باب التعريض في الكلام.
دي عينة بس فيه كثير منها في سوق الفضائيات الانقلابية، وهؤلاء هم من يكتب على ظهورهم استعمال انقلاب، يحظر إعادة الاستعمال أو عبارة (استعمال مرة واحدة disposable ). وأذكرك بقول الشاعر في موضوع البيع والشراء دا:
لا تشتري العبد (يقصد استعمال انقلاب) إلا والعصا معه (معارضو الانقلاب) إن العبيد لأنجاس مناكيد.