د. حمزة زوبع يكتب: والتهمة "نفخ" النفافيخ!

والنفافيخ أي البلالين، وهي جمع بالونة، ويقال إن الجمع بالونات، والعهدة على من يحرر محاضر النيابة في عصر الانقلاب، إذ بات كل شيء منفوخ هدفا عسكريا يجب قنصه أو اعتقال من يمسك به حتى ولو كان طفلا بريئا خرج في مظاهرة توزع فيها البلالين، أي النفافيخ.
نفيخة الأطفال أصبحت سلاحا يرعب قادة الانقلاب مع أن لديهم دبابات وصواريخ وقناصة ومصفحات ورشاشات، وقد جربوها ولم تفلح في إسكات صوت الحرية في بلادي.
اعتقال أربع صبايا على رأي إخواننا اللبنانيين فضيحة جديدة، إذ من بين التهم حيازة بالونة عليها شعار رابعة، طيب افرض أن البالونة كان عليها صورة السيسي، ماذا سيكون موقف وكيل النيابة؟ حضرتك ح ترد علي وتقول لي: لن يعتقلوا من أصله. شاطر، الإجابة صحيحة والجايزة بالونة أو نفيخة بدون شعار رابعة، بس عليها صورة الرئيس مرسي، وكده تاخد إعدام على طول.
نرجع تاني لتنظيم النفافيخ ونتخيل شكل الحوار في المحكمة:
محكمة
نادي على المتهمين
سلمى يسري حسين 14 سنة .. أفندم
ليلى عبد الله حسن 13 سنة .. أفندم
يسرا إسماعيل أبو النجا 12 سنة .. أفندم
أم الهنا السعيد إبراهيم 17 سنة .. أفندم
القاضي: انتم متهمين يا ولاد بأنكم كنتم في مسيرة وشايلين نفافيخ عليها شعار رابعة، ما قولكم؟
المتهمون: تمام مش بس النفافيخ يا سيادة القاضي، دا احنا كمان كنا معلقين شعار رابعة على الملابس.
القاضي: يعني بتعترفوا؟!
المتهمون: طبعا بنعترف هي دي حاجة نخجل منها، طب دا احنا معانا شوية دبابيس ونفافيخ من بتوع رابعة تحب تاخد نفيخة سيادتك؟.
(تضج المحكمة بالضحك)
القاضي: سكوت، احنا في محكمة، احنا ح نهزر واللا إيه؟
طيب أنا عايز أساعدكم لأنكم شباب في سن المستقبل، قولوا لي مين اللي اداكم النفافيخ؟ هه المرشد واللا الشاطر؟
المتهمون: مرشد مين وشاطر إيه؟! يا باشا احنا اشترينا النفافيخ من المحل من مصروفنا وأم الهنا عملت الشعار بعلبة الحنة اللي أمها بتحني بيها شعرها عشان بيتقصف، وبعدين قمنا احنا الاربعة وزعنا الكمية على العيال اللي في المظاهرة.
القاضي: يعني مفيش تمويل جالكم من هنا واللا هنا؟ صدقوني أنا عايز أساعدكم.
المتهمون: تساعد مين يا باشا، احنا ما نرضاش الظلم لحد، وبعدين هو المرشد أجدع مننا واللا إيه، احنا جدعان يا باشا ونعرف الأصول.
القاضي: طيب آخر محاولة، مش يمكن محل النفافيخ اللي اشتريتم منه تبع حد من الجماعة المحظورة؟.
المتهمون: بس ما تقولش محظورة، ثم جماعة إيه يا باشا، الجماعة في السجن، احنا ولاد النهاردة.
القاضي: يعني مفيش فايدة فيكم!
المتهمون: لا مؤاخذة يا باشا هي ح تفرق مع سيادتك يعني، مش كده كده إعدام، احكم يا باشا واتوكل على الله.
القاضي: الحكم بعد المداولة.
محكمة
القاضي ينظر إلى اليمين واليسار ثم يتلو الحكم: حكمت المحكمة حضوريا على المتهمات الأربعة بالسجن سنة مع الشغل بتهمة نفخ البلالين البريئة التي صنعت للترفيه، فقام هؤلاء بنفخها عنوة ودون مراعاة للضمير ولا الأخلاق المصرية التي تدين مثل هذا العمل الإجرامي. إن اعتراف هؤلاء بنفخهم البلالين وتطييرها في الجو يؤكد انتزاع الرحمة من قلوبهم تجاه هذه المخلوقات البريئة المسماه بالنفافيخ. رفعت الجلسة
تمتلأ سماء القاعة بالنفافيخ التي تحمل شعار "شامخ من يومك"!!.