رسالة من زوجة بالعباسية إلى زوجها الشهيد المهندس محمود مصطفى

ننشر كلمات سارة مصطفى زوجة الشهيد المهندس محمود مصطفى أحد شهداء منطقة العباسية. والتي تنعي فيها زوجها بقولها: "و الله العظيم راضيه بقضاء الله و عارفه إنك في مكان أحسن وأحتسبك من الشهداء... أنا ببكي علي حالي وحال الناس إللي أعرفها.... أشهد الله يا محمود إنك أنقي قلب إنسان عرفته في الدنيا ديه... نشأت علي طاعة الله و حبه، كل الناس سواء متفقين أو مختلفين معاك بيحبوك و بيحترموك .... دائما متواضع مع كل الناس".
وتابعت: "وانت في الجامعة كنت بتيدي دروس رياضة للأطفال في الجوامع... ياما كنت بسمع أمهات بتدعيلك يا محمود و تقول لولادها يا رب أشوفك زي الباشمهندس محمود.. كل ديونك في وصيتك كانت تبرعات لسوريا وفلسطين.... المرة الأولي إللي كتبت فيها وصيتك كانت 27 يناير 2011..... كنت شايل طوبه جت في دماغك وجاكيت محروق عندك من أيام المظاهرات وتقولي دول شرف ليا.... والمرة الثانية كانت يوم التفويض... وقلتلي بالنص إحنا حانموت واحنا بنضف بلدنا... كده كده حيبيدونا فنموت واحنا رجاله في الشوارع لا ياخدونا من بيوتنا ويعدمونا".
واختتمت رسالتها بقولها: "الحمد الله أستشهدت وانت صائم واتعملك عمرتين في أسبوع وكل ماتوحشني أشوف صورتك وانت مبتسم وراضي وكأنك بتقولي لرضي أنا راضي.. والله راضيه يا محمود بس انت وحشتني قوي".