"الألش" على أزمة انقطاع كابل الإنترنت

"تصدقوا النت بعد قطع الكابل سلك أوى.. تقريبا كان مسدود وسلك، رب ضاره نافعة عقبال ما يتقطع كابل مدينة الإنتاج الإعلامى".. بهذه التغريدة الساخرة علق أحمد البدوى على انقطاع كابل الإنترنت فى البحر المتوسط والذى أدى إلى تباطؤ الخدمة وانقطاعها لدى قطاع عريض من جمهور المدونين الذين يسكنون جمهورية "فيس بوك" و" تويتر".
تعامل المدونين مع الأزمة بالسخرية والفكاهة، كما أن السياسة لم تغب عن المشهد تماما.
وعبر جداريات فيس بوك كتب أحد الشباب: "قالوا عن قطع كابل الإنترنت.
عماد أديب: النت شغال بهدوء، عمرو موسى: إن قطع كابل الإنترنت يهز أركان الدولة العميقة ويؤثر داخليا وخارجيا على أبعاد التفاهم الفيسبوكى، عمرو حمزاوى: القطع كان نتيجة لترسب عواقب وخيمة على إثر ترهلات المعاناة لدى البلطجية مما زاد من هيمنة الصراع الوجودى الممنهج تجاه القضية الفيسبوكية، صباحى: لا بد من القصاص ممن قطعوا الكابل، وأدعو لعمل كابل نت مبكر، عمرو مصطفى: القطع أصلا فوتو شوب".
بينما يروى أحد الشباب قصة طريفة على إثر انقطاع كابل النت قائلا: "لما كابل النت اتقطع حصل عندنا مشكلة فى النت فى الشغل.. دخل واحد صاحبى بيهزر معاى وبيقولى الإخوان هما السبب، قلتله فعلا وبتوع حماس حفروا نفق من سيناء لحد الإسكندرية وقطعوه ورجعوا تانى.. كله هزار فى هزار اتفاجئ بعدها بشوية بخبر من جريدة الوطن بتاعة مجدى الجلاد وعنوانه "تورط الإخوان وحماس فى قطع كابل الإنترنت بالإسكندرية".
إلا كابل النت
الموقف على "تويتر" كان أكثر حضورا وسخرية؛ حيث غرد أحد النشطاء قائلا: "خبير اتصالات مصرى أمريكى يؤكد استحالة قطع كابل النت بواسطة 3 أشخاص.. يا معلم ده فيه مصرى واحد قطع خط الغاز 14 مرة وبطّل بس لما صعبنا عليه!".. كما نقرأ أيضا ضمن التغريدات الساخرة:
أمجد أحمد: بعد قطع كابل النت البحرى أخاف أعمل داون لوود ألاقى اللاب عندى يرشح ميه.
محمد الأسوانى: لو سمحتم.. إلا كابل النت!!!!!!
saaam: بيقولك البحرية قبضت على 3 غواصين قطعوا كابل النت اللى فى البحر وسلمتهم إلى حرس الحدود دول أكيد كانوا بيمثلوا فيلم الطريق إلى "الكابلات".
على: على فكرة أهالينا هما المدبرين لحكاية قطع كابل النت دا علشان نذاكر.
بولا سوريال: لما تعرف إن كابل النت مقطوع من البحر الأبيض المتوسط U Feel Like حتى مصر طلعت واخدة واصلة.
صالح: بعد قطع كابل النت سرعة النت بتفكرنى بأيام الزمن الجميل.
هانى الهون: هو كابل النت ده مرمى فى الشارع كل شوية حد يقطعوا؟
بدوى السبيع: موضوع كابل النت بتاع مصر مش هيتحل غير لما نركب وايرلس.
جاد: وانت فاهم إن البحر المتوسط ده فيه سمك؟!.. أبسلوتلى.. دا كله أشياء بتقطع كابل النت اللى جاى مصر، بس..
كريم عطا: فاكرين الراجل اللى كان بيفجر خط الغاز؟؟ ربنا كرمه دلوقتى وبقى يفجر كابل النت.
ولاء: قطع كابل النت للمرة الثانية فى يومين مش بيفكركم بحاجة هو الملثم غير الكادر الوظيفى ولا إيه.
عبده فتحى: بخصوص انقطاع كابل النت ممكن بس الناس اللى بتقطع الكابل ديه تقولنا هما مش عاوزنا نشوف إيه عالنت ونوعدهم مش هنبص عليه خااالص.
حسن: إيه حكاية كابل النت دة اللى اتقطع تالت مرة؟ هو كابل صينى ولا إيه؟
شيماء: من له مصلحة فى قطع كابل النت؟ هو من يعلم جيدا أن الفضائيات جميعها ضد الرئيس، فلذلك وجب قطع الوسيلة الوحيدة التى عليها كل جرائم المعارضة.