نشطاء الإنترنت يرحبون بغياب الداخلية عن فتنة التحرير

لا تزال أحداث الجمعة الماضية تلقى بظلالها على حوارات ونقاشات المدونين عبر شبكات التواصل الاجتماعى "فيس بوك" و"تويتر"، حيث ظهر جدل حاد حول سر غياب الشرطة والداخلية عن ميدان التحرير للفصل بين المتشابكين، واعتبر نشطاء فيس بوك أن الغياب لعب دورا فى تحجيم الفتنة وعدم انتشارها، فيما رد المدونون عبر تويتر ساخرين "يبدو أن الداخلية بتاخد الجمعة والسبت إجازة".. لكن قراءة متأنية فى تعليقات المؤيدين لغياب الشرطة وعدم تدخلها تكشف ثمة ترحيب بهذا الغياب:
محمد فتحى: موقف سليم إن الداخلية لم تتدخل.. إنما المطلوب اعتقال من حرق وخرب وألقى المولوتوف.
محمود سعيد: اللى عملته وزارة الداخلية بعدم الوجود عند تلك المهزلة صح.. ولو كانت راحت كان الكل رمى الموضوع عليها.
محمد زكى: وزارة الداخلية لو كانت تدخلت.. كنت هاتسمع عبارات.. الشرطة تضرب الثوار.. ويسقط حكم العسكر.. وكنت هاتشوف شهداء عشان يقال إن هما اللى قتلوا الثوار.
فهد البحطيطى: لو الشرطة نزلت كانت هتبقى مجزرة والدم كان هيبقى للركب.
ماندو: لو الداخلية اتدخلت هيقولك الداخلية واقفة مع الإخوان.
سالى أحمد: اختفت لأنها لو ظهرت هيقولوا هى اللى عملت الإصابات دى كلها.
محمد أبو زيد: لو وزارة الداخلية كانت اتدخلت كنت هتسمع الصويت والنواح فى الفضائيات.. ده نفس نظام مبارك.. ده نظام قمعى.. ده مفيش فرق.. ده مفيش حريات.
تيم محمد: ده علشان تقعدو تغنو وتقولو الشرطة بتضرب فى الشعب؟
خالد عطية: وزير الداخلية راجل محترم وذكى.. لو تدخل كان الشرطة هتشيل كل الغم.. وكانت ستصبح المواجهة بين المتظاهرين والشرطة.
نظيم حامد: لما الداخلية حتدخل الطرفان حيضربوا فيها ولما تيجى تدافع عن نفسها حيقولوا وشهداء وجرحى حكاية سخيفة.
أشرف: هتعمل ايه وضد مين يعنى هتضرب الاتنين ولا هتكون زى أيام مبارك طرف واحد واتجاه واحد.
وعند قراءة التعليقات التى كتبها المغردون على تويتر يوم الجمعة 12 من أكتوبر نجد ثمة العديد من التساؤلات حول السر فى غياب الشرطة، وهو ما عبر عنه أحد الشباب، قائلا: "السؤال هنا.. الشرطة فين من اللى بيحصل فى التحرير؟!.. فيما نقرأ أيضا على المنوال ذاته بعضا من التعليقات الساخرة التى بدت رافضة للموقف السلبى من قبل الشرطة:
محمد الجارحى: الحمد لله الحمد لله الحمد لله!! أخيرا الداخلية اتحركت لاحتواء الموقف المشتعل!.. طلعت بيان، وقالت: "إن ما يحدث فى التحرير أمر مؤسف".
مشيرة أحمد: الشرطة: ما يحدث فى التحرير لا يعبر عن الثورة.. خير؟ قطعتوا الراحة امتى؟
صادق القماح: طيب أيام الثورة قلنا الشرطة اتكسرت طب فين الشرطة والجيش فى أحداث ميدان التحرير.