رسالة خطيرة من طبيب تم اعتقاله وتحطيم منزله لرفضه تزييف تقرير طبى لمعتقل

نشر الناشط الحقوقي هيثم ابو خليل - مدير مركز ضحايا لحقوق الإنسان - عبر صفحته الشخصية على موقع التواصل الاجتماعى "فيس بوك" رسالة تحت عنوان عاجل وخطير حول طبيب تم اعتقاله وسحله لتدوينة تقرير طبى كما يراه عن حالة معتقل.
وجاء نص الرسالة : (عاجل وخطير.. اعتقال طبيب وسحله وتحطيم منزله لأنه كتب تقرير طبي حقيقي لحالة معتقل والتقرير معجبش ضابط المباحث..!)
الاستاذ الفاضل . هيثم أبوخليل
كلمت حضرتك قبل كده عن الحالة اللى اتطلب منى اشوفها ..لعل حضرتك تتذكر التفاصيل .. فى المستشفى لما روحت علشان أكتب التقرير .. اتكلمت مع رئيسى فى القسم عن اللى شوفته وانهم طالبين فبركة تقرير طبى وان الحالة تستدعى عناية مركزة طارئة .. رئيسى فى القسم اشفق عليا و قالى لو كتبت غير اللى طالبينه انت عارف البلد ماشية ازاى .. و سكت للاسف !! المهم خروجاً من المأزق ده قررت كتابة التقرير بالانجليزى علشان أنا عارف مستوى غبائهم و بكده أكون ريحت ضميرى ..واى حد متخصص هيقرى التقرير هيعرف خطورة الحالة .. اللى حصل ان الطالب اللى معتقل فى قسم شرطة كفرالدوار
اخدوا التقرير بعد تدهور حالته و راحوا بيه لمستشفى دمنهور العام فى عربية الترحيلات ..والتقرير والحالة لما دخلوا ..الدكتور اللى هناك قالهم ده المفروض بيموت لأنه كان المفترض يتنقل للعناية المركزة من وقت زى ما التقرير مكتوب و رفض علاجه بالمستشفى.. اول امبارح فوجئت بأمن الدولة يقتحم بيتى الساعة 2 ونص الفجر.. و اخدونى بالبيجامه و حافى وسط استغاثات زوجتى و ابنى الطفل البالغ من العمر 3 سنوات و سكان العمارة اللى طلع يدافع عنى اضرب و اتثبت بالرشاشات.. بعد تعرضى للضرب ووابل من اقذر الالفاظ تم تهديدى انى لو فتحت يقى ..هيتعمل فيا زى الحالة اللى كتبت فيها التقرير.
احتجزونى 48 ساعة فى زنزانه جنائيين وبعدها اطلقوا سراحى .. انا حاليا اخدت مراتى و ابنى وروحت مكان غير معلوم علشان التهديدات وعلشان كرهت نفسى بعد اللى شوفته و كرهت البلد باللى فيها !! كل ده علشان كتبت تقرير !! كل ده علشان قلت كلمة حق !! قول للناس اللى بتقول الدكتور عمل ايه ؟!! وازاى سكت ..انى مسكتش ودى كانت النتيجة ..و للعلم انا حاصل على ماجستير فى الامراض النفسية والعصبية من انجلترا ..وابن ناس !! واللى ضربنى مخبرين وامناء شرطة !! واللى هددنى هو الرائد .محمد حمادى بقسم شرطة كفرالدوار ..فى صورة للتقرير و صور للاصابات نتيجة الضرب اللى حصلتلى و صور لبيتى اللى اتكسر فيه اجهزة يوم الاقتحام
زيقزل أبو خليل :" انتهت قصة اجرام الشرطة في حق طبيب محترم يبقي ان انشر رسالته السابقة لكي تفهموا حضراتكم بداية الموضوع :
كنت نابتشى امبارح فى المستشفى ..وانا دكتور نفسية وعصبية .. جيه طلب من قسم شرطة كفرالدوار ان لازم يخرج دكتور يشوف حالة هناك ضرورى لان الدكتور المسئول مش موجود.. طلعت مع ظابط اسمه . احمد الديب برتبة نقيب و 2 مخبرين ..لما وصلت القسم طلبوا انى ادخل الحجز اشوف الحالة ..لما دخلت كانت الاضاءة سيئة جدا والريحة قذرة كأنها حمام عام ومش شايف كويس فطلبت من الظابط انه يخرج الحالة برا الحجز او يشوف الاضاءة.. قالى ممنوع هى الاضاءة كده !! ومينفعش يخرج من الحجز ..المهم ان الحالة كانت لطالب ثانوى عنده حمى وتشنجات وحالته سيئة للغاية و بيجز على سنانه ..فتحت
كشاف الموبايل علشان اشوف جسمه كويس لقيت جسمه عليه سحجات وكدمات شديدة واثار تعذيب واضحة جدا..شكله ابن ناس ..وانا خارج قلت للظابط انه ضرورى يتنقل للمستشفى لان حالته متقدمة جدا.. ولد فى نفس الزنزانه صرخ بصوت عالى وقال : قولهم يا دكتور ان محمد ذنبه انه بيقول كلمة حق..المخبريين دخلوا عجنوا الولد اللى بيكلم بمعنى الكلمة ضرب وشلاليط وسب بالدين .. الظابط قالى : اكتبله اى حاجة علشان نعمل اللى علينا وظبطلنا تقرير علشان مش ناقصين وجع دماغ..الكلام ده انا بقوله علشان حياة انسان انا معرفهوش لكن واضح انه مش مجرم .. كان موجود الظابط احمد الديب ..و امين شرطة امن دولة. علاء مبارك و اتنين مخبرين . والولد فى حدود 18 سنة بالكتير ونحيف جدا . شكرا لسعة صدرك).