وائل غنيم: لا توجد حلول سريعة لمشكلة الكهرباء.. ولا بديل عن الترشيد

أشاد الناشط السياسى وائل غنيم بالمؤتمر الصحفى الذى عقده الدكتور هشام قنديل، قائلًا: بعد ما شفت مؤتمر قنديل بالكامل قررت أغرد خارج السرب، وأعرب عن سعادته بمستوى المؤتمر، مشيرًا إلى صراحة الدكتور قنديل، وسرده للأرقام بشكل حقيقى، وطريقة عرضه للحلول".
قال غنيم صباح اليوم السبت، في رسالة نشرها في صفحته على موقع التواصل الاجتماعي "الفيس بوك": إن فكرة ترشيد استهلاك الكهرباء مهمة؛ لأن الحلول السريعة لمشاكل الكهرباء مش موجودة، ولأن عدم ترشيد استهلاك الكهرباء هيتسبب في قطعها عن المنطقة، بمجرد وصولها للحد الأقصى للاستخدام في أية لحظة".
وأعتبر أن "ترشيد استخدام الطاقة والمياه أساسًا، هو واجب مجتمعي وإنساني بشكل عام، والدول المتحضرة دائمًا بتعمل حملات توعية له".
وأضاف غنيم قائلًا: "ترشيد استهلاك الكهرباء بييجي بفايدة على الناس، لأن الفاتورة هتكون أقل"، متابعًا: "احرص إن ميكونش فيه أجهزة كهربائية كتير شغالة، وأنت مش محتاجها، أو مثلًا تقدر تستخدمها في وقت تاني، (مثال الغسالة أو المكواة)".
ونصح غنيم عند استخدام التكييف قائلًا: "متسيبش أوضة التكيف فيها مفتوح، ومحدش قاعد فيها،(متستغربش عشان ده بيحصل كتير في بيوتنا بشكل يومي)"، داعيًا في الوقت نفسه لاستخدام اللمبات الموفرة للطاقة، و"إنك تفصل الأجهزة عن الكهرباء بعد استخدامها، ومتسيبهاش في ال Stand By(اللمبة الحمرا)، وإنك تقفل السخان الكهرباء في الأوقات اللي مش بتستخدمه فيها"
واختتم بقوله: "مش لازم يا سيدي تلبس قطن لو بيضايقك الموضوع ده، فيه ناس بتعتبر النصائح دي تافهة ومش بتأثر، بس فكرة التوفير الجمعي بيعمل فرق كبير، لو مليون بيت في مصر التزموا بالنصائح دي، مفيش كهرباء هتقطع طول الصيف في أي مكان".
كان الدكتور هشام قنديل رئيس مجلس الوزراء طالب المواطنين، بارتداء الملابس القطنية، وتخفيض عدد أجهزة التكييف والتجمع في غرفة واحدة لترشيد استهلاك الكهرباء، مشيرًا إلى أن هناك من المواطنين مَن يمتلك مِن 6 إلى 7 تكييفات في منزله.
وقال قنديل- في مؤتمر صحفي بمقر مجلس الوزراء أمس- إن هناك زيادة في استهلاك الكهرباء هذا العام، بلغت 12%، بسبب زيادة أجهزة التكييف، والتعديات على الأراضي الزراعية، واستخدام وصلات كهربائية غير قانونية.