وائل غنيم: ترشيد الطاقة «واجب إنساني».. و«مش لازم تلبس قطن لو بيضايقك»

قال وائل غنيم، الناشط السياسي، صباح السبت، إن «فكرة ترشيد استهلاك الكهرباء فكرة مهمة، لأن الحلول السريعة لمشاكل الكهرباء مش موجودة، ولأن عدم ترشيد استهلاك الكهرباء هيتسبب في قطعها عن المنطقة، بمجرد وصولها للحد الأقصى للاستخدام في أي لحظة«.
واعتبر «غنيم» في رسالة نشرها في صفحته على «فيس بوك»، أن «ترشيد استخدام الطاقة والمياه أساساً، هو واجب مجتمعي وإنساني بشكل عام، والدول المتحضرة دائما بتعمل حملات توعية لهذا»، حسب تعبيره.
وأضاف: «ترشيد استهلاك الكهرباء بييجي بفايدة على الناس، لأن الفاتورة هتكون أقل»، متابعاً بقوله: «احرص إنه مايكونش فيه أجهزة كهربائية كتير شغالة، وأنت مش محتاجها، أو مثلاً تقدر تستخدمها في وقت تاني، (مثال الغسالة أو المكواة(».
ونصح «غنيم» عند استخدام التكييف، بقوله: «متسيبش أوضة التكييف فيها مفتوح، ومحدش قاعد فيها، (متستغربش عشان ده بيحصل كتير في بيوتنا بشكل يومي)»، داعياً في الوقت نفسه لاستخدام اللمبات الموفرة للطاقة، و«إنك تفصل الأجهزة عن الكهرباء بعد استخدامها، ومتسيبهاش في الStand By(اللمبة الحمرا)، وإنك تقفل السخان الكهرباء في الأوقات اللي مش بتستخدمه فيها»، حسب قوله.
واختتم بقوله: «مش لازم يا سيدي تلبس قطن لو بيضايقك الموضوع ده، فيه ناس بتعتبر النصائح دي تافهة ومش بتأثر، بس فكرة التوفير الجمعي بيعمل فرق كبير، لو مليون بيت في مصر التزموا بالنصائح دي، مفيش كهرباء هتقطع طول الصيف في أي مكان».
يأتي ذلك بعد أن طالب الدكتور هشام قنديل، رئيس مجلس الوزراء، المواطنين، بارتداء الملابس القطنية، وتخفيض عدد التكييفات، والتجمع في غرفة واحدة لترشيد استهلاك الكهرباء، مشيرًا إلى أن هناك من المواطنين مَن يمتلك مِن 6 إلى 7 تكييفات في منزله.
وقال قنديل في مؤتمر صحفي بمقر مجلس الوزراء، الجمعة، إن هناك زيادة في استهلاك الكهرباء هذا العام، بلغت 12%، بسبب زيادة أجهزة التكييف، والتعديات على الأراضي الزراعية، واستخدام «وصلات كهربائية» غير قانونية.